VOV4.Êđê -  Hlue si Knơ̆ng bruă dhar kreh - mjuăt ktang asei mlei leh anăn hiu čhưn ênguê čar Dak Lak hlăm gưl mdei 30/4 leh anăn 1/5 thŭn anei, čar drông leh 56 êbâo gưl tuê nao čhưn dlăng, mdei msăn, prăk hrui wĭt mâo giăm 17 êklai prăk, đĭ êbeh 80% mkă hŏng gưl mdei thŭn dih. Hnơ̆ng ba yua adŭ kah knar mâo êbeh 90%. Dŭm anôk bruă huă ƀơ̆ng leh anăn dôk jưh kčah ênoh leh anăn čhĭ djŏ ênoh kčah leh, amâo mâo klei mđĭ ênoh ôh. 

Nguyễn Thuỵ Phương Hiếu, K’iăng Khua Knơ̆ng bruă Dhar kreh - mjuăt ktang asei mlei leh anăn hiu čhưn ênguê Dak Lak bi mklă: “Hiu čhưn ênguê Dak Lak bi mklă leh klei găl pô kơ ngăn dŏ wăl hiu čhưn ênguê. Leh anăn čar mkŏ mjing leh klei bhiăn ƀlŭ tlao nao hriê mnuih Dak Lak jĕ giăm leh anăn kriê pioh anăn knăl pô. Čar srăng lŏ dơ̆ng gĭt gai dŭm anôk bruă hŏng Knơ̆ng bruă hiu čhưn ênguê si bĕ ngă čiăng mkŏ mjing mnơ̆ng dhơ̆ng hiu čhưn ênguê mrâo, bi mrâo mnơ̆ng dhơ̆ng hiu čhưn ênguê mâo leh. Ăt msĕ mơh mđĭ hnơ̆ng thâo bruă, mđĭ ktang bruă mtrŭt mjhar hưn mdah bi klă hŏng dŭm čar ƀuôn prŏng čiăng iêô jak phung tuê hriê ti Dak Lak.”

H’ Zawut pô mblang