VOV4.Êđê - Đru kơ phung êdam êra dưi mă prăk čan, mkŏ mjing dŭm êpul hgŭm bruă čiăng bi trông klei thâo, kah mbha klei thâo kơ hdră mphŭn čô̆ kơ bruă amâo dah mkŏ mjing dŭm klei bi lông kơ hdră mphŭn čô̆ kơ bruă jing hdră mâo čar Dak Lak dôk pŏk ngă čiăng đru, hrăm mbĭt hŏng phung êdam êra, boh nik phung êdam êra krĭng ƀuôn sang hlăm hdră mphŭn čô̆ kơ bruă.

Leh tlâo thŭn rông abao (tuôr), ayŏng Huỳnh Ngọc Hội dôk ti alŭ 10, să Ea Ƀar, kdriêk Ƀuôn Đon, čar Dak Lak dưi mâo leh anôk ba čhĭ hơĭt. Hlăm brô sa mlan hŏng anei, Ayŏng Hội lŏ pŏk phai ênao rông abao mơ̆ng 350 m² jing 2000 m². Kah knar grăp mlan, ayŏng ba čhĭ mơ̆ng 20 truh kơ 30 êbâo drei abao mjeh hŏng ênoh 300 prăk hlăm sa drei, leh anăn 4 mlan blư̆ ba čhĭ 1 tôn abao hŏng ênoh kah knar 65 êbâo prăk hlăm sa kg.

Ayŏng Huỳnh Ngọc Hội ăt mkŏ mjing leh anăn ngă khua êpul bi mguôp hđeh êdam êra rông abao ti kdriêk Ƀuôn Đon hŏng 25 čô nao hgŭm. Mbĭt hŏng bruă mtô lač klei ngă bruă, mkăp brei mjeh kơ phung nao hgŭm, Ayŏng Hội lŏ hrui brei abao leh anăn tui hriăm klei mkra mjing abao čiăng mđĭ hnơ̆ng tŭ jăk leh anăn ênoh mnơ̆ng dhơ̆ng. Ayŏng Huỳnh Ngọc Hội brei thâo, hlăm klei čô̆ kơ bruă, ayŏng mâo bruă hđeh êdam êra kdriêk đru leh anăn mtô lač bruă ngă hră mơar, ăt msĕ hŏng hưn mdah brei anôk ba čhĭ. Kyuanăn ayŏng dưi ƀrư̆ ƀrư̆ dưi găn klei dleh dlan čiăng mđĭ kyar dŭm klei bi hmô. Bruă hđeh êdam êra kdriêk ăt đru mtrŭt mjhar čiăng kơ phung ayŏng adei kñăm mđĭ kyar leh anăn hưn mdah pô hŏng dŭm anôk bruă hrui blei, đru brei čan prăk kăk amâodah klei ngă hră mơar čiăng dưi ba čhĭ mnơ̆ng dhơ̆ng jăk hĭn. Mâo klei đru mơ̆ng bruă hđeh êdam êra kdriêk leh anăn dŭm anôk bruă, dhar bruă ti kdriêk, klei bi hmô mơ̆ng pô dưi đĭ kyar leh anăn pŏk phai, leh anăn mkra mnơ̆ng dhơ̆ng bi êăt čiăng mâo anôk ba čhĭ hơĭt kơ mnuih ƀuôn sang leh anăn dưi ba čhĭ mâo ênoh hĭn.

Hluê si ayŏng Nguyễn Quang Trung, khua bruă hđeh êdam êra kdriêk Ƀuôn Đon, êpul bi mguôp hđeh êdam êra rông abao kdriêk Ƀuôn Đon jing êpul bi mguôp tal êlâo mơ̆ng hđeh êdam êra dưi mkŏ mjing ti kdriêk dôk bruă bruă hđeh êdam êra kdriêk. Mbĭt hŏng anăn, bruă hđeh êdam êra kdriêk ăt mkŏ mjing êpul bi mguôp hđeh êdam êra čô̆ kơ bruă mă dưi iêo mthưr lu phung hđeh êdam êra nao hgŭm.

Čiăng mkŏ mjing klei găl kơ phung hđeh êdam êra krĭng ƀuôn sang ti alŭ wăl kdriêk čô̆ kơ bruă mă, êpul êya bruă hđeh êdam êra mâo leh klei đru kơ phung hđeh êdam êra dưi lĭng čan hŏng prăk mnga hdjul, mkŏ mjing dŭm êpul bi mguôp ngă bruă duh mkra, êpul bruă duh mkra, êpul bi mguôp prăk kăk. Truh kơ ară anei, dŭm gưl bruă hđeh êdam êra kdriêk Ƀuôn Đon dôk kriê dlăng giam 67 êklai prăk hlăm ênoh prăk dưi jao. Mâo 33 čô leh anăn klei bi hmô dưi lĭng čan ênoh prăk čô̆ kơ bruă mă mơ̆ng keh prăk ala čar mgiah msir bruă mă leh anăn dŭm ngăn prăk alŭ wăl. Kdriêk kñăm leh kơ bruă mkŏ mjing leh anăn mđĭ kyar dŭm klei bi hmô lông ngă, klei bi hmô mrâo mâo boh tŭ hlăm bruă duh mkra čiăng pŏk phai kơ phung hđeh êdam êra. Kyuanăn, hlăm 3 thŭn hŏng anei, hdră čô̆ kơ bruă mă ti kdriêk Ƀuôn Đon mâo lu klei jăk leh anăn nao kơ êlam hĭn, djăp ênŭm hnơ̆ng čoh čuăn, klei hmăng hmưi mơ̆ng phung hđeh êdam êra. Dŭm klei bi hmô mơ̆ng phung hđeh êdam êra leh ană grăp čô ăt mâo lu boh tŭ dưn, boh nik jing phung jhŏng ba mdah dŭm mta mnơ̆ng dhơ̆ng pô nao hlăm dŭm klei bi lông mơ̆ng kdriêk amâodah čar mkŏ mjing. Hmei srăng lŏ dơ̆ng tă êlan leh anăn hâo hưn kơ phung hđeh êdam êra ti kdriêk dưi thâo dŭm klei hâo hưn djŏ tuôm hŏng dŭm hdră mtrŭn, hdră êlan mơ̆ng čar. Čuăn ruah dŭm klei găl leh anăn mâo mnơ̆ng dhơ̆ng djŏ guôp hŏng klei đĭ kyar bruă duh mkra alŭ wăl čiăng lŏ dơ̆ng ktrâo lač, đru kơ diñu dưi bi leh bruă pô.

Ayŏng Y-LêPas Tơr, K’iăng khua bruă hđeh êdam êra, khua gĭt gai êpul hgŭm bruă hđeh êdam êra čar Dak Lak brei thâo, hlăm 4 thŭn giăm anei, hdră čô̆ kơ bruă mă mơ̆ng phung hđeh êdam êra ti alŭ wăl čar Dak Lak ƀrư̆ hruê ƀrư̆ đĭ kyar leh anăn mâo lu klei jăk. Phung hđeh êdam êra êdah êdi hlăm klei čô̆ bruă mă tŭ jing, mđĭ ai phung hđeh êdam êra mkăn mâo klei hmăng hmưi gĭr ktưn.

Thâo klă klei čiăng čô̆ kơ bruă mă mơ̆ng phung hđeh êdam êra, êpul êya bruă hđeh êdam êra dŭm gưl mâo leh klei bi mguôp leh anăn dôk bi mguôp hŏng dŭm anôk bruă, dhar bruă, alŭ wăl čiăng mkŏ mjing klei găl, hdră êlan jăk găl đru kơ phung hđeh êdam êra čô̆ kơ bruă. Boh nik, khădah găn lu klei dleh dlan kyua klei ruă tưp Covid-19, ƀiădah hruê mmông êgao ti dŭm kdriêk, wăl krah hlăm čar, dŭm klei bi hmô mrâo, klei ngă bruă mrâo ăt mâo phung hđeh êdam êra ksiêm hriăm, bi mguôp hdơ̆ng pô čiăng mtrŭt mđĭ klei čô̆ kơ bruă mơ̆ng grăp čô. Tal 1, bi kơ bruă mtô mjuăt bi hriăm ăt srăng mâo klei ksiêm duah dŭm hdră êlan djŏ guôp, boh nik hlăm wưng klei ruă tưp. Tal 2 jing ngăn prăk, hmei ăt mâo klei čiăng bi mguôp, mtô kơ diñu čiăng dưi lĭng čan hŏng ênoh lu hĭn. Tal 3 jing bruă gĭr bi mguôp, hgŭm hŏng dŭm êpul čiăng si ngă srăng ngă čiăng mâo lu hdră plah wah knơ̆ng bruă êlâo leh anăn knơ̆ng bruă êdei ăt msĕ hŏng klei bi mguôp, ba čhĭ mnơ̆ng dhơ̆ng leh anăn mkŏ hŏng phung thơ̆ng kơ bruă, phung mnia mblei êdah êdi čiăng diñu kah mbha klei thâo, mđĭ ai phung hđeh êdam êra.

Hŏng dŭm klei đru mơ̆ng bruă sang čư êa leh anăn dŭm êpul êya mkăn, lu hđeh êdam êra ti čar Dak Lak jhŏng găn hgao klei dleh dlan čiăng čô̆ kơ bruă mă. Dŭm klei dleh dlan kơ ngăn prăk, hră mơar knŭk kna, anôk ba čhĭ ƀrư̆ ƀrư̆ dưi mgiah msir srăng đru kơ klei čô̆ kơ bruă mă mơ̆ng phung hđeh êdam êra krĭng ƀuôn sang jing jăk găl hĭn. Mơ̆ng anăn dưi mkŏ mjing boh kdrŭt čiăng bi lar hdră ngă bruă, bi lar bŏ tŭ klă klơ̆ng hĭn mơ̆ng klei bi hmô čô̆ kơ bruă mơ̆ng hđeh êdam êra.