Ƀuôn hgŭm Ea Bă leh bi mŭt mbĭt prŏng 130km2, mnuih ƀuôn sang êbeh 8.300 čô, hlăm anăn mâo hlăm brô 60% jing mnuih Êđê. Anôk bruă knŭk kna ƀuôn hgŭm kbưi hŏng wăl krah čar Dak Lak hlăm brô 130km. Nguyễn Hoài Vũ, khua dlăng bruă Đảng ƀuôn hgŭm brei thâo, mơ̆ng hruê 1/7 truh kơ ară anei, khădah bruă mkŏ mkra mrô dưi ba yua mơ̆ng dua anôk să hđăp ƀiădah ăt dưi ngă 80% hră mơar knŭk kna online đru kơ mnuih ƀuôn sang leh anăn 90% klei kƀĭn online hŏng bruă Đảng čar, bruă sang čư̆ êa čar, dŭm knơ̆ng, dhar bruă. Anei jing klei gĭr mơ̆ng jih jang phung knuă druh, phung mă bruă anôk bruă Đảng leh anăn bruă sang čư̆ êa ƀuôn hgŭm. Nguyễn Hoài Vũ bi êdah klă sĭt đa đa klei akâo bi mlih mrô ti alŭ wăl:

 “Kyua ƀuôn hgŭm jing alŭ wăl krĭng dleh dlan, bruă mkŏ mkra mrô adôk lu klei kƀah, masin, kdrăp yua ăt bi mguôp mbĭt, ka hriăm mbĭt, klei thâo yua kdrăp mrâo mrang mơ̆ng phung mă bruă ăt adôk awăt êdu. Hmei hmăng hmưi čar hnưm uêñ mĭn duh bi liê mđĭ hnơ̆ng, bi kluôm bruă mkŏ mkra mrô, pŏk dŭm adŭ hriăm kơ phung mă bruă kơ kdrăp mrâo mrang mrô, klei hưn mthâo mrâo mrang, klei yua Ai čiăng bi djăp ênŭm hlăm bruă klam wưng mrâo.”

Ăt msĕ sơăn, ƀuôn hgŭm Ea Hiao ăt jing ƀuôn hgŭm taih kbưi mơ̆ng čar Dak Lak, kbưi hŏng wăl krah čar êbeh 100km. Phạm Văn Đảng, khua bruă sang čư̆ êa ƀuôn hgŭm brei thâo: ti anôk bruă knŭk kna ƀuôn hgŭm, êbeh 65% hră mơar leh anăn êbeh 90% klei kƀĭn mơ̆ng ƀuôn hgŭm hŏng gưl nah dlông dưi ngă online. Ƀiădah, kyua bruă mkŏ mkra mrô ka hriăm mbĭt, lu hră mơar ăt dleh kpăk, dŭm klei kƀĭn ênưih mâo klei kpăk, ñu akâo kơ čar hnưm duh bi liê hriăm mbĭt. Phạm Văn Đảng brei thâo:

 “Hŏng dŭm gưl kƀĭn online ti să hŏng bruă Đảng čar, bruă sang čư̆ êa čar,m dŭm knơ̆ng, dhar bruă ƀuh klei mkŏ online ka jăk ôh. Hmei hmăng hmưi êlan dăng kông dưi mkŏ nanao, amâo mâo klei kpăk. Lu mmông dôk kƀĭn, khua gĭt gai ktrâo lač ƀiădah amâo mâo hmư̆ ênai leh anăn mklăk hŏng anăn, hmei tơl lŏ iêo đĭng blŭ êmuh. Lui mmông lu sơnăk. Hmăng hmưi čar duh bi liê êlan dăng kông jăk, čiăng kơ kƀĭn ăt ênưih, ngă hră mơar ăt pral.”

Trung tá Phạm Việt Hùng, Khua knơ̆ng bruă Viettel Dak Lak brei thâo, anôk bruă dôk bi mguôp hŏng bruă sang čư̆ êa čar ngă lu bruă mrô. Bi hŏng bruă mkŏ mkra đru ngă hră mơar knŭk kna ti ƀuôn hgŭm, kyua alŭ wăl prŏng, lu alŭ wăl jing krĭng tlung kyuanăn dăng kông awăt, čiăng duh bi liê thiăm kơ anôk mđung êlan dăng kông.

 “Hlăm klei bi mŭt mbĭt čar leh anăn ngă hdră mtrŭn mrô 57, Viettel Dak Lak đru kčĕ hŏng bruă sang čư̆ êa čar ngă bi kluôm klei mlih mrô. Êngao kơnăn, hưn mdah dŭm adŭ bui kƀĭn amâo mâo hră mơar, bi hơĭt klei kƀĭn online leh anăn adŭ bi kbĭn hŏng kdrăp eOffice.”

Bùi Thanh Toàn, Khua knơ̆ng bruă kreh knhâo leh anăn mrâo mrang čar Dak Lak brei thâo, bruă Đảng čar mkăp leh 300 êklai prăk mđĭ hnơ̆ng bruă mkŏ mkra mrô, mbĭt anăn gĭt gai dŭm knơ̆ng, dhar bruă ksiêm dlăng čiăng đru thiăm ngăn prăk găl guôp kơ grăp alŭ wăl. Mbĭt hŏng anăn, čar ăt mtrŭt mjhar hdră mnuih ƀuôn sang hriăm kơ bruă mô, bi mguôp hŏng bruă pui kmlă, dăng kông čiăng rơ̆ng kơ êlan dăng kông, mbĭt anăn pŏk adŭ hriăm bruă mrô kơ êpul mă bruă nah gŭ.

 “Knơ̆ng bruă kreh knhâo leh anăn mrâo mrang mă leh bruă hŏng dŭm anôk bruă dăng kông leh anăn bruă pui kmlă čiăng rơ̆ng klei mkăp brei pui kơ dŭm anôk bruă. Bi kơ êlan dăng kông ka jăk djŏ tuôm hŏng êlan mbĭt, Viettel leh anăn VNPT Dak Lak dôk gĭr mgaih msir. Nao mbĭt hŏng mgaih msir êlan dăng kông, bruă mđĭ hnơ̆ng dŭm kdrăp yua ăt yuôm bhăn leh anăn dŭm alŭ wăl dôk ngă. Bruă anei wăt kơ gưl čar, ƀuôn hgŭm leh anăn dŭm knơ̆ng dhar bruă dôk ngă čiăng mghaih msir.”

Dak Lak dôk ti anăp dŭm klei čiăng mjêč kơ bi mlih mrô leh bi mŭt mbĭt čiăng đru kơ mnuih ƀuôn sang jăk hĭn. Bruă alŭ wăl jhŏng duh bi liê dŭm êtuh êklai prăk čiăng mđĭ bruă mkŏ mkra mtô, mbĭt anăn mtrŭt mđĭ bruă mtô bi hriăm kơ kdrăp mrâo mrang brei ƀuh klei gĭr prŏng mơ̆ng bruă kđi čar. Êjai bruă mkŏ mkra dưi bi kluôm, ai dưi mơ̆ng phung mă bruă knŭk kna dưi mđĭ hĭn, ăt dưi brei ƀuh klei thâo săng mnuih ƀuôn sang hlăm klei bi mlih mrô, bruă mkŏ mjing tŭ jing bruă sang čư̆ êa mrô ti krĭng čưl dliê Lăn Dap Kngư jing klei amâo lŏ kbưi ôh./.