VOV4.Êđê - Djŏ tuôm kơ klei bi rai dliê hnơ̆ng prŏng ti čuê dliê 238, să Ea Bung, kdriêk Ea Sup, čar Dak Lak, hruê 28/4, Nguyễn Thiên Văn –  Khua dlăng bruă Đảng kdriêk hâo hưn, anôk bruă djŏ tuôm bi mklă leh đa đa phung djŏ tuôm kơ klei bi rai dliê. Ară anei, anôk bruă djŏ tuôm dôk mă kơ̆ng 4 čô čiăng ksiêm dlăng, msir mgaih klei mâo. Truh mmông anei, Kahan ksiêm kdriêk Ea Sup dôk mkra mlih hră mơar čiăng kčŭt kđi phung bi rai dliê ti čuê dliê 238, 239 ti să knông lăn Ea Bung. Knơ̆ng bruă sang čư̆ êa să Ea Bung (anôk bruă pô dliê) leh anăn Anôk bruă ksiêm dlăng dliê kmrơ̆ng kdriêk ăt dôk ksiêm yap hnơ̆ng kyâo, mta kyâo leh anăn ênhă dliê arăng bi rai.

H’Zawut pô mblang