Nguyễn Tài ti alŭ 15, să Ea Yông, kdriêk Krông Pač, čar Dak Lak nao ngă hră mơar ti anôk bruă “Sa ƀăng bhă” ti anôk bruă sang čư̆ êa să Ea Yông. Nguyễn Tài lač, bruă dŭm gưl bruă sang čư êa mtrŭt mđĭ klei mlih mrâo klei ngă hră mơar knŭk kna hlăm wưng êgao dưi ba wĭt boh tŭ dưn klă klơ̆ng kơ mnuih ƀuôn sang, êpul êya, knơ̆ng bruă. Hlăm anăn, klei đĭ kyar êdah êdi jing klei bi hmô “Hla pŏk Zalo mkŏ jih jang mnuih ƀuôn sang” hlăm bruă mgaih msir hră mơar knŭk kna ti alŭ wăl.

“Êjai kâo hriê ngă hră mơar ti anôk bruă knŭk kna să. Kâo ƀuh anăn jing klei thơ̆ng kơ bruă leh anăn klei đru jih ai mơ̆ng phung knuă druh să. Tơdah mâo anôk ƀuôn sang ka thâo srăng srăng dưi êmuh mtam hlăm êpul ti Zalo”.

Mbĭt hŏng klei bi hmô “Hla pŏk zalo mkŏ jih jang mnuih ƀuôn sang”, hlăm wưng êgao, dŭm klei bi hmô msĕ si: “Hruê 3 online”, “Hruê amâo mâo čih”, “Hruê amâo mâo ƀuăn” mâo leh dŭm alŭ wăl ti čar Dak Lak hluê ngă čiăng bi ênưih klei ngă hră mơar knŭk kna. Êjai mnuih ƀuôn sang hriê ti anôk bruă “Sa ƀăng bhă” ngă dŭm mta hră mơar bi klă, ngă hră bi dôk ung mô̆, hră hưn hruê k’kiêng leh anăn bi klă hưn mnuih djuê srăng dưi mgaih msir sa anôk hŏng hdră 5 knhuang: đru kčĕ, tŭ mă, mgaih msir, bi klă leh anăn ba wĭt. Aduôn Nguyễn Thị Thúy Sinh, knuă druh adŭ bruă Tĭng mkă bruă sang čư êa să Ea Yông, kdriêk Krông Pač, čar Dak Lak brei thâo:

          “Bruă sang čư̆ êa să ngă leh lu klei bi hmô čiăng bi truh hŏng mnuih ƀuôn sang. Bi mguôp hŏng êpul gĭt gai hdră mkăp mrô 06, êpul gĭt klei mlih mrâo bruă ngă hră mơar knŭk kna hluê ngă klei bi hmô “1000 čô mnuih ƀuôn sang mrô” ti alŭ wăl să Ea Yông. Mnuih ƀuôn sang êjai hriê ngă dŭm mta hră mơar knŭk kna ti alŭ wăl srăng čŏng mơĭt hră êlan online čiăng bi hrŏ prăk bi liê leh anăn bi hrŏ mmông’.

Bruă hluê ngă dŭm klei bi hmô dưi bi hrŏ leh mmông mgaih msir đa đa hră mơar knŭk kna gưl să, ƀuôn hgŭm. Mnuih ƀuôn sang knŏng nao mă sa blư̆, guôn mă bhiâo čiăng mă hră mơar. Dŭm klei bi hmô anei amâo mâo djŏ knŏng đru mđĭ hnơ̆ng hră mơar knŭk kna gưl să, ƀuôn hgŭm dưi mgaih msir djŏ mmông, đru kơ mnuih ƀuôn sang, knơ̆ng bruă bi hrŏ mmông, prăk bi liê êjai nao ngă dŭm mta hră mơar ƀiădah lŏ mkŏ mjing êpul knuă druh, phung mă bruă knŭk kna mâo bruă klam, mâo knhuah hdĭp bruă knŭk kna. Nguyễn Thanh Vũ, khua bruă sang čư êa kdriêk Krông Ana bi klă:

“Hŏng bruă mlih mrâo hŏng klei mbruă hlăm bruă ngă hră mơar knŭk kna, khua kiă kriê dŭm anôk bruă gĭt gai hluê ngă jêñ jêñ bruă ksiêm dlăng, mtrŭt mjhar knuă druh, phung mă bruă knŭk kna hluê ngă hdră bhiăn bruă knŭk kna, hdră bhiăn mă bruă mơ̆ng anôk bruă leh anăn bi klă dŭm klei hưn mơ̆ng mnuih ƀuôn sang kơ ai tiê, klei mă bruă ăt msĕ hŏng klei blŭ tlao hŏng mnuih ƀuôn sang.

          Hluê si klei bi klă hlăm Klei kƀĭn trông ksiêm wĭt 9 mlan kơ bruă mlih mrâo klei ngă hră mơar knŭk kna mơ̆ng čar Dak Lak thŭn 2023”, kyua klei nao hgŭm hrăm mbĭt, ktang phĭt mơ̆ng dŭm êpul dhar bruă, anôk bruă hlăm wưng êgao đru leh kơ bruă mlih mrâo klei ngă hră mơar knŭk kna mơ̆ng čar dưi bi hơĭt, đru bi ênŭm klei čiăng mơ̆ng mnuih ƀuôn sang leh anăn knơ̆ng bruă. Bruă tŭ mă, mgaih msir đa đa hră mơar knŭk kna dôk hlăm klei kriê dlăng mơ̆ng čar dưi hluê ngă jăk, bi hrŏ klei hnui hlăm bruă mgaih msir hră mơar, ngă jăk bruă akâo klei pap mnai mơ̆ng mnuih ƀuôn sang, mkŏ mjing êjai mâo klei ƀuăn hnui. Klei tĭng mkă brei ƀuh, boh tŭ mgaih msir hră mơar djŏ wưng kčah, êlâo kơ wưng kčah ti alŭ wăl čar mâo êbeh 99%. Čiăng lŏ dơ̆ng hluê ngă mta kñăm “Mă mnuih ƀuôn sang leh anăn knơ̆ng bruă jing mta kñăm ngă klei đru”, Nguyễn Tuấn Hà, khua bruă sang čư̆ êa čar Dak Lak mñă klă.

“Hlăm wưng kơ anăp srăng mkŏ mjing sa klei kƀĭn trông čiăng ksiêm wĭt klei ngă bruă ăt msĕ hŏng dŭm klei dleh dlan pô tuôm čiăng mâo klei gĭt gai ruh mgaih klei dleh dlan. Tal 2 jing ksiêm wĭt tĭng mkă čiăng bi klă ênoh hră mơar dưi ba mdah hlăm mbah klei čih pioh ala čar. Tal tlâo jing gĭt gai đru kčĕ hŏng mnuih ƀuôn sang čar hră mơar gĭt gai hluê ngă dŭm bruă klam mlih mrâo klei ngă hră mơar knŭk kna mơ̆ng ară anei truh kơ jih thŭn 2023. Bi klă kluôm dŭm mta bruă knŭk kna online čiăng mơ̆ng anăn ruah dŭm mta bruă knŭk kna klă klơ̆ng, hnơ̆ng ba yua lu, nao mbĭt hŏng klei čiăng grăp hruê mơ̆ng mnuih ƀuôn sang, knơ̆ng bruă.”

Bruă Dak Lak gĭr mtrŭt mđĭ bruă mlih mrâo hră mơar knŭk kna dưi dlăng jing knhuang yuôm bhăn, mkŏ mjing boh kdrŭt kơ čar đĭ kyar hmar leh anăn kjăp, djŏ guôp hŏng klei čiăng đĭ kyar mbĭt hluê si Hdră mtrŭn mrô 23-NQ/TW hruê 06/10/2022 mơ̆ng Phŭn bruă kđi čar kơ hdră êlan mđĭ kyar bruă duh mkra ala ƀuôn leh anăn răng mgang klei êđăp ênang krĭng Lăn Dăp Kngư truh ti thŭn 2030, tă hdră truh ti thŭn 2045./.