Yan mdei prŏng thŭn 2023 anei jing gưl mdei amâo mâo dưi wơr ôh hŏng adei Huỳnh Tấn Đạt, adŭ 5, sang hră gưl 1 Lê Hồng Phong, kdriêk Mdrak, êjai mâo amĭ ama brei nao hlăm adŭ hriăm lông ngă lĭng kahan gang mkhư̆ truih mdjiê klei pui ƀơ̆ng ti Anôk bruă gĭt gai lĭng kahan gang mkhư̆ truih mdjiê klei pui ƀơ̆ng leh anăn tui duah đru dŏng mơ̆ng kahan ksiêm čar Dak Lak. Hlăm gưl nao hriăm anei, Đạt dưi đĭ êdeh truih mdjiê pui, đoh đĭng êa mbĭt hŏng phung lĭng kahan gang mkhư̆ truih mdjiê pui leh anăn bruă kčhiêt êa mdjiê pui, dŏng mtlaih hlăm boh klei pui ƀơ̆ng.

 “Nao hlăm adŭ hriăm, kâo dưi hriăm klei đuê̆ mơ̆ng klei pui ƀơ̆ng, leh anăn dưi hriăm lu mta klei jăk mkăn.”

Ăt nao hlăm adŭ hriăm lông ngă lĭng kahan truih mdjiê pui ƀơ̆ng, adei Nguyễn Ngọc Quỳnh Anh, hđeh sang hră adŭ 5, sang hră gưl 1 Hoàng Việt, ƀuôn prŏng Ƀuôn Ama Thuôt brei thâo:

  “Hruê anei jing gưl tal êlâo kâo djă đĭng krih êa čiăng truih mdjiê pui, kâo ƀuh mơak êdi. Hlăm bruă anei, kâo khăp êdi kơ bruă mă mơ̆ng phung lĭng kahan truih mdjiê pui”.

Êngao kơ dŭm adŭ bi hriăm, dhar kreh yan mdei prŏng, amâodah brei hđeh čŏng hlăp lêñ hlăm sang, dŭm thŭn hŏng anei, dŭm gŏ sang leh anăn sang hră mơar ti čar Dak Lak mâo leh klei uêñ mĭn truh kơ bruă brei hđeh nao hgŭm hlăm dŭm mta bruă msĕ sĭ ksiêm hriăm kơ dliê kmrơ̆ng, hƀuê ênuk, lông ngă ƀĭng ngă lŏ hma, dŭm adŭ mtô kơ dŭm klei thâo hlăm klei hdĭp, wưng hriăm lĭng kahan, kahan êa, lĭng kahan truih mdjiê pui, hriăm klei Angle, dŭm adŭ mtô luê êa, hriăm čăm, pah mlâo mnŭ, čưng boh… Ayŏng Nguyễn Văn Hiển, ti ƀuôn hgŭm Tân Lập, ƀuôn prŏng Ƀuôn Ama Thuôt lač dŭm mta bruă anăn srăng đru lu sơnăk kơ phung hđeh:

 “Klei hmăng hmưi mơ̆ng gŏ sang jing čiăng kơ phung hđeh mâo anôk hlăp lêñ jăk, tal 2 jing diñu dưi nao jĕ, lông ngă leh anăn dưi mâo klei hriăm klă sĭt. Dŭm klei anăn srăng hrăm mbĭt hŏng diñu hlăm klei hdĭp. Anei jing hdră tŭ dưn, đru kơ phung hđeh dưi thâo klă leh anăn đĭ kyar kluôm ênŭm hĭn.”

Čar Dak Lak ară anei mâo hlăm brô 508.000 čô hđeh, klei čiăng nao hlăm dŭm adŭ bi hriăm hlăm wưng yan mdei prŏng jing lu êdi. Aduôn Nguyễn Thị Thúy Hiền, k’iăng khua kiă kriê Sang dhar kreh phung hđeh lăk čar Dak Lak brei thâo, ƀrư̆ hruê ƀrư̆ mâo lu phung amĭ ama ngă hră mơar kơ anak pô nao hlăm dŭm gưl hriăm klei thâo hlăm klei hdĭp, dhar kreh kdŏ mmuñ, mjuăt asei mlei, lông ngă lĭng kahan, phung truih mdjiê pui, kahan êa. Čiăng bi mâo klei čiăng anăn, yan mdei prŏng thŭn 2023 anei, anôk bruă mkŏ mjing leh êbeh 100 adŭ hriăm dŭm mta leh anăn iêo jak giăm 5.000 gưl čô hđeh ti ƀuôn prŏng Ƀuôn Ama Thuôt, dŭm kdriêk riêng gah msĕ si Ƀuôn Đon, Čư̆ Mgar, Krông Pač… Hluê si aduôn Nguyễn Thị Thúy Hiền, mơ̆ng ară anei truh kơ jih yan mdei prŏng, srăng mâo thiăm lu mta bruă jăk kơ phung hđeh ti dŭm kdriêk hlăm čar:

 “Mprăp kơ dŭm mta bruă yan mdei prŏng thŭn 2023, Bruă đoàn čar ngă leh lu hdră êlan kơ bruă yan mdei prŏng ti dŭm kdriêk, wăl krah čiăng mkŏ mjing dŭm adŭ hriăm yan mdei mtah kơ jih jang phung hđeh hlăm čar Dak Lak. Hluê si klei hmei ksiêm dlăng leh anăn ƀuh, lu anôk bruă mkŏ mjing leh adŭ hriăm, hdră mă bruă kơ yan mdei prŏng hŏng phung hđeh nao hgŭm djŏ guôp hŏng ênuk thŭn leh anăn klei čiăng mơ̆ng phung hđeh, hŏng boh sĭt ti dŭm anôk bruă. Klă klơ̆ng, dŭm bruă đoàn kdriêk Krông Ana, Krông Pač amâodah wăl krah Ƀuôn Hô mkŏ mjing leh dŭm hdră klă klơ̆ng kơ phung hđeh hriăm hluê êa amâo mâo mă prăk, hriăm dhar kreh klei kdŏ mmuñ, mkŏ mjing dŭm hdră hlăp lêñ kơ phung hđeh.”