VOV4.Êđê - Hlăm klei kƀĭn phung bi ala gưl tal 8, wưng thŭn 2022 – 2027 mơ̆ng Êpul gru bi kal hrah čar Dak Lak mkŏ mjing hlăm 2 hruê mơ̆ng 20-21/6. Boh tŭ êdah êdi mơ̆ng êpul hlăm wưng păn bruă êgao jing dưi iêo mkrum êbeh 408 êklai prăk kơ dŭm mta bruă đru dŏng hlăm alŭ wăl, đĭ giăm 2 blư̆ mkă hŏng wưng ngă bruă êlâo anăn.

Hlăm 5 thŭn êgao, Êpul gru bi kal hrah čar Dak Lak ngă leh bruă đru dŏng mjêč kơ êbeh 868 êbâo gưl čô, hŏng ênoh prăk giăm 342 êklai prăk, hlăm dŭm mta bruă msĕ si: “Tết kyua mnuih ƀun ƀin leh anăn phung djŏ klei ruă diosin”, hdră knơ̆ng bruă êmô, hdră mđĭ siap klei hmăng hmưi. Kơ anăp, dŭm gưl Êpul gru bi kal hrah čar Dak Lak lŏ dơ̆ng hluê ngă mâo boh tŭ dưn klei mtrŭt mjhar “Grăp êpul êya, grăp čô nao mbĭt hŏng sa anôk ngă bruă đru dŏng”, rơ̆ng kriê dlăng leh anăn mđĭ kyar hdră knơ̆ng bruă êmô, đru kơ dŭm gŏ sang ƀun ƀin bi hơĭt klei hdĭp mda, dŭm klei bi hmô “Tết kyua mnuih ƀun ƀin leh anăn phung djŏ klei ruă diosin”, “Mlan ngă bruă jăk”, “Kpur pui klei khăp”, “Čhiên êsei ti mtih”, kriê dlăng klei suai pral mnuih ƀuôn sang.

Y-Ƀel pô mblang