VOV4.Êđê- Hruê 17/5, Êpul bi ala anôk bruă kƀĭn ala čar Dak Lak mă leh bruă hŏng Anôk bruă sang čư̆ êa čar lehanăn dŭm knơ̆ng, dhar bruă čiăng mprăp nao ti Klei bi kƀĭn tal 3, anôk bruă kƀĭn ala gưl 15. Lu klei akâo djŏ tuôm kơ hdră mtrŭn mđĭ kyar bruă duh mkra ala ƀuôn mơ̆ng alŭ wăl dưi thiăm mbŏ hlăm klei hưn mdah kơ anôk bruă kƀĭn ala.

Ti anôk mă bruă, bi ala phung khua kiă kriê dŭm anôk bruă ti Dak Lak hưn mthâo leh klei dleh dlan lehanăn čiăng kơ gưl dlông msir mghaih hlăm wưng ti anăp, msĕ si mđĭ kyar bruă pui kmlă mkra mjing tă hdră êlan truh ti thŭn 2045, knŭk kna, Phŭn bruă tuh tia mnia mblei brei ksiêm dlăng mđĭ hnơ̆ng ngă bruă čiăng mđĭ kyar hdră bruă anei ti Dak Lak. Phung bi ala ăt hưn mdah lu bruă djŏ tuôm kơ bruă dŭm mta mnơ̆ng hlăm gŭ lăn, ksiêm dlăng hdră mđĭ kyar Ƀuôn Ama Thuôt, hdră čuăl mkă; ba yua lăn, bruă dŭm ktuê êlan jhat rai ƀiădah ka mâo prăk lŏ mkra wĭt. Êpul bi ala tŭ mă jih klei blŭ, klei hưn mơ̆ng phung bi ala bi klin, ksiêm dlăng čiăng ba mdah kơ anôk bruă kƀĭn ala lehanăn dŭm Phŭn, dhar bruă./.

Pô mblang: H’Nêč Êñuôl