Mơ̆ng êbeh 10 hruê êlâo, ayŏng Nguyễn Xuân Lộc, dôk kƀĭn ti sang kƀĭn Khop Ea Tul, să Ea Tul, kdriêk Čư̆ Mgar mbĭt hŏng phung đăo nao hgŭm ngă bruă bi msiam sang kƀĭn, hŏng grăp boh klŏ hmlei, mƀlir kpŭng mbĭt hlăm ƀăng boh tâo ti sang kƀĭn. Pô mdưm ăngpul pui, pô ktŭng klei pui, pô mkra ƀăng boh tâo, pô mdơ̆ng ƀăng jang. Grăp čô hơ̆k mơak sơăi.

 “Hlăm ai êwa hơ̆k mơak yan Noel, hmei mbĭt hŏng grăp čô đăo hlăm krĭng đăo Ea Tul bi msiam kơ ƀăng boh tâo čiăng hơ̆k mơak hruê Khua Yang hruê, čiăng kơ grăp čô mâo yan Noel hơ̆k mơak, êđăp ênang, kâo ƀuh mơak êdi!”.

Hlăm wưng anei, khădah dôk mtluk mtlak hŏng bruă hrui pĕ kphê, ƀiădah phung đăo Khop krĭng anei ăt mkăp mmông čiăng bi msiam, kih êmiêt pưk sang, Drông Noel leh anăn thŭn mrâo dơ̆ng truh. Amai H’Ly Ktla, ti să Ea Tul, kdriêk Čư̆ Mgar hơ̆k mơak yăl dliê, thŭn anei dŭm mta boh mnga bruă lŏ hma mâo ênoh đĭ, mâo hnư hrui wĭt, kyuanăn mnuih ƀuôn sang bi drông Noel hŏng ai tiê hơ̆k mơak:

 “Thŭn anei sang kâo mprăp ngă ƀăng boh tâo čiăng drông Hruê Khua Yang hriê. Thŭn anei mdê hŏng thŭn mkăn jing ênoh kphê đĭ, anăn jing klei mơak prŏng hlăm thŭn anei, grăp čô mơak sơnăk.”

Linh mục Hoàng Nguyên Vũ, pô kiă krĭng đăo Ea Tul brei thâo, Noel thŭn anei dưi mđĭ dua blư̆ klei hơ̆k mơak êjai sang kƀĭn dưi duh bi liê rŭ mdơ̆ng mrâo. Mprăp kơ yan Noel thŭn anei, mơ̆ng akŏ mlan 12, phung đăo hrăm mbĭt bi mkrum mguôp, mguôp hruê ai, mbĭt hŏng pô kiă leh anăn êpul gơ̆ng phung kiă kriê mprăp kơ Knăm Noel êđăp ênang, klă nik, bi êdah ai tiê “Mpŭ kơ Aê Diê, khăp kơ lăn čar”, Bi mguôp djuê ana.

 “Noel thŭn anei hmei mprăp klei ngă sen, drông Noel, klei kƀĭn. Bi hŏng phung đăo, Noel yơh jing Knăm mơak prŏng, kyuanăn jing klei mơak êdi. Boh nik ti Ea Tul grăp sang ngă ƀăng boh tâo čiăng mơak hruê Noel, phung đăo hơ̆k mơak êdi. Thŭn anei mâo bruă sang čư êa dŭm gưl brei klei dưi rŭ mjing sang kƀĭn mrâo, anei ăt jing klei hơ̆k mơak mơ̆ng mnuih ƀuôn sang, čŏng pô rŭ mdơ̆ng sang kƀĭn, amâo mâo guôn mưn anôk mkăn ôh”.

            Kdriêk Čư̆ Mgar mâo 5 krĭng đăo, 2 êpul găp djuê đăo leh anăn sa anôk bi kƀĭn khop, Vũ Hồng Nhật, khua bruă sang čư êa kdriêk Čư̆ Mgar brei thâo, yan Noel thŭn anei, kdriêk mkŏ mjing leh 5 êpul čiăng nao čuă êmugh, mđup brei hnư mnơ̆ng leh anăn hơêč hmưi kơ dŭm anôk bi kƀĭn, khua kiă kriê klei đăo. Mbĭt anăn gĭt gai kơ dŭm să, wăl krah iêo mthưr phung đru mguôp čiăng nao čuă, mđuip brei hnư mnơ̆ng kơ gŏ sang phung đăo mâo klei hdĭp dleh dlan, đru kơ digơ̆ dưi drông Noel êđăp ênang, yâo mơak:

 “Yan Noel thŭn 2023 anei, bruă sang čư êa kdriêk gĭt gai kơ dŭm să, wăl krah mâo anôk bi kƀĭn klei đăo kriê dlăng đru kơ phung đăo kdrông Noel hơ̆k mơak, êđăp ênang hŏng ai tiê jing hluê ngă dŭm klei čuăn hlăm klei bhiăn lăn čar leh anăn boh nik jing kriê dlăng dŭm gŏ sang phung đăo ƀun ƀin, dưi drông sa yan Noel hơ̆k mơak, trei mđao”.

Dương Văn Tuệ, k’iăng khua kiă kriê Dhar bruă bi mguôp klei đăo Khop čar Dak Lak brei thâo, kluôm čar mâo 100 anôk bi kƀĭn hŏng 217.000 čô đăo. Thŭn 2023 klei hdĭp mơ̆ng phung đăo khop ti alŭ wăl dưi mâo klei bi hơĭt. Lu mta bruă ngă jăk bi êdah klei khăp, dŭm klei bi hmô răng mgang klei êđăp ênang ti dŭm Krĭng đăo, găp djuê đăo, hdră bruă jih jang mnuih ƀuôn sang bi mguôp mkŏ mkra krĭng ƀuôn sang mrâo leh anăn wăl krah mrâo mrang… mâo phung đăo Khop hur har sa ai leh anăn đru rŭ mjing ƀuôn sang čar Dak Lak ƀrư̆ hruê ƀrư̆ mdrŏng siam.

 “Thŭn 2023 phung đăo khop mâo klei bi ktưn mă bruă knuă čiăng mđĭ kyar klei hdĭp mda gŏ sang. Ai êwa drông Noel dôk mtuk mtlak ti dŭm krĭng đăo, êpul đăo leh anăn alŭ ƀuôn sang ti lu alŭ wăl hlăm čar. Sa ai êwa mơak mñai dôk lar bra hlăm phung đăo ti ƀuôn prŏng ăt msĕ mơh ti krĭng taih kbưi.”

Sa yan Noel lŏ truh hlăm klei drông, klei hơ̆k mơak mơ̆ng phung đăo ti čar Dak Lak. Grăp čô hŏng ai tiê mđing truh kơ sa yan Noel êđăp ênang, sa thŭn mrâo bŏ hŏng klei hơ̆k mơak leh anăn trei mđao.