VOV4.Êđê- Leh anôk bruă răng mgang ana kyâo mtâo, Phŭn bruă lŏ hma leh anăn mđĭ kyar krĭng ƀuôn sang brei thâo, hruê 11/7, anôk bruă ksiêm dlăng klei mŭt kbiă China bi klă hdră mtrŭn ksiêm dlăng hnơ̆ng tŭ jăk hŏng boh durian mơ̆ng Việt Nam ba čhĭ kơ ala čar anei. Hluê anăn, boh durian mơ̆ng Việt Nam srăng dưi ba čhĭ hlăm jih jang ƀăng jang knông lăn mơ̆ng China leh mâo ênŭm hnơ̆ng čoh čuăn klei blei mnia. Hdră mtrŭn anei mâo boh tŭ hlăm 3 thŭn.

Anei jing klei bi knăl jăk hŏng phung pla mjing boh durian hlăm kluôm ala leh anăn wăt kơ čar Dak Lak. Hluê si knơ̆ng bruă lŏ hma leh anăn mđĭ kyar krĭng ƀuôn sang čar Dak Lak, kluôm čar mâo hlam brô 17.000 ha durian, hlăm anăn mâo hlăm brô 15.000 ha hlăk hlê mboh, hnơ̆ng boh mnga hlăm brô 140.000 tôn. Kah knar grăp thŭn mâo êbeh 70% hnơ̆ng boh durian mơ̆ng Dak Lak ba čhĭ kơ anôk mnia mblei China hŏng êlan điêt.

Pô mblang: Y-Ƀel Êban