VOV4.Êđê - Čiăng mprăp bi jăk kơ klei bi lông leh anăn hrŏng ruah mŭt hriăm adŭ 10, Knơ̆ng bruă sang hră - mtô bi hriăm čar Dak Lak mtă kơ dŭm sang hră mkŏ mjing hdră hrŏng ruah čiăng rơ̆ng hnơ̆ng jăk mtô bi hriăm. Ti ƀuôn prŏng Ƀuôn Ama Thuôt, mâo 14 sang hră  hrŏng ruah mŭt hriăm adŭ 10. Hlăm anăn mâo Sang hră gưl 3 Chuyên Nguyễn Du, Sang hră gưl 3 knŭk kna čiêm rông Nơ Trang Lơng mkŏ mjing klei bi lông ruah mŭt hriăm; Sang hră gưl 3 Thực hành Cao Nguyên hlăm Sang hră gưl prŏng Lăn Dap Kngư leh anăn 4 sang hră êngao knŭk kna (mâo Phú Xuân; Victory; Hoàng Việt; Đông Du) ruah hlue si klei bhiăn mdê hjăn.

Dŭm sang hră knŭk kna adôk ruah hlue si hră hriăm hlăm gưl 2. Mĭn tĭng bruă hrŏng ruah mŭt hriăm adŭ 10 ti Dak Lak srăng mkŏ mjing hlăm krah mlan 6. Knơ̆ng bruă sang hră - mtô bi hriăm čar Dak Lak  brei thâo: Kyua klei ruă Covid-19 dleh ktuê dlăng, thŭn hriăm 2021-2022 lu mmông hđeh hriăm online anăn bruă ksiêm dlăng hnơ̆ng jăk tui hriăm phung hđeh dưi mdưm mrô sa hlăm hdră ksiêm dlăng./.

H’Zawut pô mblang