Hluê si klei hưn, hdră ruah khua dưi mkŏ mjing djŏ hŏng klei ngă phŭn mil pô, djŏ hdră bhiăn, rơ̆ng kjăp klei êđăp ênang lehanăn klă sĭt jing hruê mơak mơ̆ng jih jang mnuih ƀuôn sang. Kluôm čar mâo 2.120 krĭng mplĕ hră hŏng 2.118 êpul ruah khua, hlăm anăn mâo 11 anôk mkŏ mjing klei ruah khua hnưm hruê 14/3. Ênoh mnuih ƀuôn sang Dak Lak nao ruah khua mâo 99,66%. Boh tŭ tal êlâo, čar Dak Lak ruah ênŭm leh 15 čô bi ala bruă kƀĭn ala gưl XVI hluê ênoh mâo kčah mtrŭn. Hŏng Êpul gơ̆ng bruă ƀuôn sang čar wưng thŭn 2026–2031, mâo 84 čô djŏ ruah, rơ̆ng djŏ hdră mtrŭn. Ti gưl să, kluôm čar mao 2443 čô djŏ ruah Êpul gơ̆ng bruă ƀuôn sang (kƀah 1 čô mkă hŏng ênoh kčah).

Ti anôk bi kƀĭn, Dhar bruă ruah khua čar Dak Lak hưn mthâo leh anăn phung djŏ ruah êpul gơ̆ng bruă ƀuôn sang čar wưng thŭn 2026–2031 hluê grăp êpul ruah. Bruă hưn mthâo boh tŭ klei ruah khua dưi hluê ngă klă mngač djŏ hdră bhiăn. Leh hưn mthâo boh tŭ, dhar bruă ruah khua čar srăng ngă hră mơar ba mơĭt kơ Gưl dlông djŏ hdră mtrŭn./.