Dŭm hruê anei H Juaih Mlô (Amĭ Oanh), ti ƀuôn Pưk Prŏng, să Ea Ning, kdriêk Čư̆ Kuin, čar Dak Lak , mơ̆ng aguah ưm mprăp mnơ̆ng knă êsei tŭk djam kơ êpul bruă djŏ tuôm ti anôk gak răng knhal jih ƀuôn. Mnơ̆ng ƀơ̆ng jing bruă sang čư̆ êa alŭ wăl ba, bi mnơ̆ng ƀâo mngưi, hăng mnuih ƀuôn thiăm. Mbĭt hŏng klei đru tuưk knă mâo lu hđeh hlăm sang, hlăm ƀuôn, anăn dŭm hnư êsei hlơr nanao tơdah ba truh kơ anôk gak răng. Anei jing ai tiê mnuih ƀuôn sang hlăm ƀuôn mtrŭt phung knuă druh, lĭng kahan dôk mă bruă răng klei êđăp ênang hlăm dŭm hruê êgao.

“Mnŏng dhơ̆ng tŭk knă jih mnơ̆ng anei mơ̆ng gưl dlông mkăp, đa đa mnuih ƀuôn sang ăt mkăp đru ƀiă čiăng tŭk knă, đru mđĭ ai ayŏng adei lĭng kahan ăt msĕ mơh kahan ksiêm hlăm ƀuôn sang, mđĭ ai čiăng rơ̆ng êđăp ênang kơ mnuih ƀuôn sang ăt msĕ mơh să pô êđăp ênang”

Amâo djŏ hjăn H Juaih ôh, lu gŏ sang mkăn hlăm să Ea Ning ăt čih anăn hŏng bruă sang čư̆ êa alŭ wăl čiăng knă dŭm hnư êsei đru kơ dŭm êpul dôk ngă bruă răng mgang klei êđăp ênang ti kdriêk Čư̆ Kuin. Amai Nguyễn Thị Nhị,  Khua Êpul hgŭm phung mniê să Ea Ning brei thâo, êpul hgŭm phung mniê pŏk ngă čiăng kơ amai adei nao đru kơ mnơ̆ng dhơ̆ng leh anăn ai tiê čiăng mâo êsei huă djam ƀơ̆ng djăp mnơ̆ng tŭ jăk, rơ̆ng klei suaih pral leh anăn ai ktang bi kdơ̆ng kơ phung knuă druh, lĭng kahan dôk mă bruă. Dŭm hruê êgao, mâo dŭm êtuh hnư êsei, hnư mnơ̆ng ƀơ̆ng mâo mnuih ƀuôn sang mprăp leh anăn ba ti Knơ̆ng bruă sang čư̆ êa să ba kơ dŭm anôk gak răng.

“Amai adei ti dŭm alŭ ƀuôn hur har, mguôp ai tiê, đru ya mnơ̆ng pô mâo čiăng mprăp êsei huă djam ƀơ̆ng. Êngao kơ tŭk knă mâo đa đa phung mâo hŏng êpul lĭng kahan ti dŭm alŭ, ƀuôn. Lu jing dŭm êpul ya mâo snăn ba kơ Knơ̆ng bruă să, mguôp braih, djam tam, wăt prăk kăk. Hlăm dŭm hruê êgao snăn tŭk knă hlăm brô 500 hnư êsei. Êngao kơ dŭm anôk gak răng mơ̆ng să snăn lŏ mđuip brei kơ phung lĭng kahan mơ̆ng kdriêk, čar wĭt ti să”

 Leh klei mâo ti alŭ wăl, mnuih ƀuôn sang lač kơ klei jhat, ngă soh hŏng hdră bhiăn, mnuih ƀuôn sang bi mtă mđĭ klei thâo rămg, sa ai tiê hŏng bruă sang čư̆ êa leh anăn dŭm êpul bruă djŏ tuôm krơ̆ng kjăp klei êđăp ênang alŭ ƀuôn hŏng klei čang hmăng hnưm lŏ wĭt msĕ hŏng yang đar. Ti grăp boh ƀuôn sang, amâo mâo ôh pô lač ƀiădah jih jang thâo mđĭ klei thâo răng, bi hgŭm hŏng êpul bruă djŏ tuôm, hâo hưn tơdah phung mkăn ti alŭ wăl. Nguyễn Thừa Đức, ti alŭ 22 să Ea Ning, kdriêk Čư̆ Kuin lač:

“Êngao kơ bruă hâo hưn, mtrŭt mnuih ƀuôn sang snăn kâo pô ăt đru mguôp ai tiê čiăng mbĭt hŏng lĭng kahan, mnuih ƀuôn sang leh anăn bruă kđi čar čiăng mâo mă phung ngă soh, bi leh bruă răng mgang klei êđăp ênang ti alŭ wăl jăk hĭn”.

Wăt tơdag knŏng jing êsei huă djam ƀơ̆ng, amâodah giêt êa, ƀêñ, ƀiădah grăp čô mnuih mơĭt hlăm anăn jing klei khăp siă suôr, mđĭ phung knuă druh, lĭng kahan dôk mă bruă. Amai H Nalin Mlô, ti ƀuôn prŏng Pưk Prŏng, să Ea Ning, kdriêk Čư̆ Kuin bi êdah.

“Mnuih ƀuôn sang hlăm ƀuôn sang ară anei bi hgŭn, đăo knang jih ai tiê hlăm hdră êlan hdră bhiăn mơ̆ng knŭk kna, kriê dlăng bruă duh mkra hlăm gŏ sang. Hlăm klei thâo ƀuh phung đing jing hưn hŏng anôk bruă knŭk kna čiăng bi mguôp mă bruă, rơ̆ng êđăp ênang čar kwar hlăm ƀuôn sang”

 Năng ai dưi bi mklă klei hiu duah, bi kdơ̆ng hŏng lu hdră leh anăn tŭ dưn, knŏng hlăm wưng bhiâo, êđăp ênang lŏ wĭt hlăm dŭm alŭ ƀuôn ti să Ea Tiêu, sa Ea Ktur. Ăt mơ̆ng klei đăo anăn đru kơ mnuih ƀuôn sang hrăm mbĭt hŏng êpul kahan mă phung ngă soh, jing phung đru kjăp tơdah ba hnư êsei klei khăp đru êpul lĭng kahan gak răng amâodah kah mbha, đru mguôp kơ gŏ sang knuă druh, lĭng kahan, mnuih ƀuôn sang tuôm hŏng klei truh hlăm klei anei./.