VOV4.Êđê- Hlăm êbeh 1 mlan êgao, hnơ̆ng êrah pioh dŏng mdrao mjêč leh anăn mdrao mgŭn ti čar Dak Lak dôk nanao hlăm boh klei kƀah êrah kyua hnơ̆ng êrah pioh ti dŭm anôk mdrao mgŭn jih leh, hlăk êjai hdră kčah tŭ mă êrah myơr ăt ka dưi pŏk ngă. Hlue si klei hâo hưn mơ̆ng Anôk bruă gĭt gai iêo jak myơr êrah čar Dak Lak, hlăm wang mlan 3 leh anăn mlan 4, boh klei mkăp êrah kơ bruă dŏng mdrao mjêč leh anăn mdrao mgŭn tuôm hŏng lu klei dleh dlan.

Ti Sang êa drao prŏng krĭng lăn Dap Kngư, grăp mlan kah knar čiăng mơ̆ng 1.800 -200 ênoh êrah doh čiăng pioh dŏng mdrao mjêč leh anăn mdrao grăp hruê ƀiădah mrâo êgao  knŏng djăp kơ mkrah wah hnơ̆ng êrah hlue si klei čiăng. Nguyễn Đức Phú, Khua adŭ bruă Anôk bruă gĭt gai iêô jak myơr êrah čar Dak Lak brei thâo: Ară anei Anôk bruă gĭt gai iêô jak myơr êrah čar ngă leh hră mơar mơĭt kơ Knơ̆ng bruă sang čư̆ êa čar kčĕ kơ bruă mdrao mgŭn hmao mbŏ djăp ê adrao čiăng hnưm pŏk ngă hdră kčah myơr êrah, mđĭ hnơ̆ng êrah pioh kơ dŭm anôk bruă mdrao mgŭn leh anăn sang êa drao hlăm čar.

Pô mblang: H’Zawut Ƀuôn Yă