VOV4.Êđê- Hŏng hđeh sang hră hlăm kluôm ala čar Dak Lak, hruê 29/8 anei, êbeh 15.200 čô hđeh sang hră mơ̆ng kdriêk knông lăn Ƀuôn Đon srăng klă sĭt nao sang hră klă sĭt nao sang hră mŭt hlăm thŭn hriăm mrâo 2022-2023. Hlăm wưng giăm anei, dŭm boh sang hră dôk gĭr mprăp bi jăk dŭm klei găl kơ mnơ̆ng dhơ̆ng, êpul nai mtô, ai êwa hơ̆k mơak drông hruê mphŭn nao sang hră.

 Thŭn hriăm anei, Sang hră hđeh điêt Họa Mi, să Krông Na, kdriêk Ƀuôn Đon mâo 12 adŭ hŏng 360 čô hđeh, hriăm ti 1 boh sang hră phŭn lehanăn 2 adŭ bruă mơ̆ng sang hră anei. Dŭm hruê anei, phung nai mtô dôk huai mdoh, bi msiam sang hră, mjing wăl anôk mngač tač, mtah mda mprăp drông phung hđeh nao sang hră. Nai mtô Lê Thị Phúc, K’iăng khua sang hră brei thâo:

“Sang hră mkŏ mjing leh hdră bi huai mdoh jih wăl. Kơ anôk bruă nah gŭ, sang hră đru kčĕ hŏng dŭm gưl alŭ wăl đru brei. Jih jang phung nai mtô dưi kah mbha adŭ mdê mdê, mprăp bi msiam adŭ hriăm čiăng hruê 29/8 anei drông phung hđeh nao sang hră”.

Mbĭt hŏng bruă mprăp kơ anôk bruă nah gŭ, mprăp kdrăp mtô bi hriăm, dŭm sang hră lŏ mđing kơ bruă mjuăt bi hriăm klei thâo kơ phung nai mtô. Kyua kdriêk Ƀuôn Đon amâo djŏ knŏng dleh dlan ƀiădah kyua jing krĭng knông lăn, mâo truh 50% ênoh hđeh ti kdriêk jing anak aneh mnuih djuê ƀiă. Kyua mâo lu hđeh mnuih djuê ƀiă, klei blŭ mdê kyua anăn phung nai brei mâo klei gĭr hlăm hdră mtô bi hriăm, boh nik hlăm bruă pŏk hdră mtô bi hriăm mrâo ti adŭ 1,2,3. Hồ Sĩ Lâm, Khua sang hră gưl sa Y Jŭt, să Krông Na, kdriêk Ƀuôn Đon, anôk mâo truh 80% ênoh hđeh jing mnuih djuê ƀiă, brei thâo: 

“Mŭt hlăm thŭn hriăm mrâo, sang hră srăng ksiêm dlăng jih, boh nik hŏng adŭ 1,2 srăng kah mbha adŭ kơ phung nai thâo klei blŭ mnuih djuê ƀiă čiăng ênưih mtô hđeh, boh nik adŭ 1. Hlăm klei hđeh nao sang ka thâo săng kluôm klei blŭ mnuih djuê lar snăn hđeh mnuih djuê ƀiă anăn srăng mâo nai mtô thâo klei blŭ djuê ƀiă anăn mtô lehanăn mblang čiăng mâo klei thâo săng.

Hluê Đỗ Ngọc Anh, Khua adŭ bruă mtô bi hriăm kdriêk Ƀuôn Đon, truh ară anei, dŭm sang hră mprăp leh ênŭm kdrăp mnơ̆ng, phung nai mtô. Kluôm kdriêk mâo 34 sang hră, mơ̆ng gưl hđeh điêt truh kơ gưl 3. Thŭn 2022 – 2023, mâo êbeh 15.200 čô hđeh, 50% hlăm ênoh anăn jing mnuih djuê ƀiă. Hlăm anăn, lu jing djuê ana M’Nông, ÊĐê, Jarai… Klei hdĭp dleh dlan. Kyua anăn, čiăng kơ phung hđeh dưi mprăp ênŭm nao sang hră, Adŭ bruă mtô bi hriăm gĭt gai sang hră mđing, tui ksiêm, đru kơ phung hđeh, amâo lui hđeh dleh dlan mdei sang hră. Đỗ Ngọc Anh brei thâo:

“Adŭ bruă gĭt gai sang hră čih mkra hdră kčah bi hgŭm hŏng bruă sang čư̆ êa alŭ wăl hŏng alŭ, ƀuôn nao truh kơ gŏ sang bi tuôm hŏng amĭ ama hđeh mtrŭt mjhar, mtô mtă brei kơ phung hđeh lŏ nao sang hră”.

 Khădah tuôm hŏng lu klei dleh dlan, ƀiădah hŏng klei mprăp djăp ênŭm, dŭm pluh êbâo čô hđeh lehanăn nai mtô ti kdriêk krông lăn Ƀuôn Đon, čar Dak Lak mprăp leh kơ thŭn hriăm mrâo hŏng dŭm boh tŭ dưn hĭn./.

                                                    Pô mblang: H’Nêč Êñuôl