VOV4.Êđê- Hŏng klei čih yap mâo 500 čô mnuih ruă hlăm wang 10 hruê hlăm mlan 1, kdriêk Lăk jing kdiêk hjăn ti čar Dak Lak jing anôk hră – Anôk mâo klei hyưt ktang. Ti anăp klei dleh dưi ksiêm dlăng mơ̆ng klei ruă tưp Covid-19, dŭm êpul êya ngă bruă mơ̆ng Kdriêk Lăk hmar kdăr hlăm klei ngă bruă hŏng klei gĭr ktưn bi hrŏ hnơ̆ng klei ruă tưp. Hdră hruê anei, hmei mâo klei čih hưn dŭm klei gĭr mơ̆ng dŭm êpul êya ngă bruă ti kdriêk Lăk, čar Dak Lak hlăm bruă bi hrŏ hnơ̆ng klei ruă tưp, rơ̆ng kơ mnuih ƀuôn sang drông Tết êđăp ênang.

 Jing F1 leh bi tuôm giăm hŏng mnuih ruă ti să Đăk Nuê, amai H’Phil Nêung, ti ƀuôn Bàng, să Đăk Liêng, ară anei dôk mă bruă ti să Đăk Nuê brei thâo, tal êlâo ñu ăt rŭng răng, leh anăn ñu iêô đĭng blŭ kơ Anôk bruă mdrao mgŭn leh anăn phung aê mdrao ti anôk bruă mdrao mgŭn ktrâo lač hdră bi ktlah hjăn ti sang ăt msĕ mơh dŭm hdră gang mkhư̆ klei ruă tưp, ñu dôk ngă kơ pô leh anăn kơ jih gŏ sang. Kyua anăn, jih gŏ sang ñu êđăp ênang hgao jih klei rŭng răng tal êlâo.   Amai H’Phil lŏ brei thâo, leh gưl păt čiăng jing mnuih djŏ Covid, ñu hŏng gŏ sang thâo săng hĭn kơ klei huĭ hyưt mơ̆ng klei ruă tưp leh anăn ăt thâo săng hĭn kơ dŭm hdră kčah gang mkhư̆ klei ruă tưp.

        “Sĭt pô bi tuôm hŏng F0 snăn ăt rŭng răng mơh ƀiădah pô blei mnơ̆ng pioh mhŭk 1 hruê 2 blư̆ hlăm aguah leh anăn tlam, leh anăn toỉ pô tŭk êa hlơr leh năn hrip. Kâo ngăn snăn ƀuh tŭ dưn, kâo ƀuh jih gŏ sang êđăp ênang sơaĭ.”

Să Dak Nuê ară anei hlăk jing sa hlăm 2 krĭng mâo klei lu mnuih ruă ti kdriêk Lăk. Aê mdrao Đặng Thị Mỹ Hạnh. K’iăng Khua anôk bruă mdrao mgŭn să Đăk Nuê brei thâo: Mơ̆ng hruê 17/12 truh ară anei boh klei ruă tưp ti să dleh ktuê dlăng hŏng lu anôk tưp djŏ hlăm epeul êya, năng mđing hĭn ti ƀuôn Pai mâo 80 čô F0. Hŏng anôk mâo klei ruă anei, să kwang dar kluôm ƀuôn leh anăn hluê ngă hdră hiu duah hlăm kluôm să. Mâo đa đa amâo bi hgŭm ôh, Anôk bruă mdrao mgŭn tiŏ nao mnuih nao ti hma čiăng mă mta ksiêm mkă leh anăn hâo hưn kơ mnuih ƀuôn sang. Amai Hạnh brei thâo, klei mnuih ƀuôn sang amâo bi hgŭm jing sa klei huĭ hyưt tưp lar klei ruă ti alŭ wăl.

    “Ti alŭ wăl kâo ƀuh dleh dlan hĭn kyua klei mưng hdĭp mda ti alŭ wăl, mnuih ƀuôn sang pô mâo klei bhiăn mnăm kpiê čeh snăn mnăm sa đĭng, tal dua klei hdĭp mda huă mnăm êpul lu mâo lu, hâo hưn mtô mblang ƀiădah klei čiăng bi mlih klei mưng hdĭp jing dleh snăk. Tal 2 sĭt bi mklă F0 snăn arăng amâo brei hiu ôh, mnuih ƀuôn sang lač ya kâo ƀuh mâo klei ruă hĕ, kâo suaih snăk, Anôk bruă gĭt gai wăt phung dlăng bruă Đảng, phung Khua să nao truh ti sang mtrŭt mjhar čiăng bi ktlah hjăn.”

Kdriêk Lăk dôk mđĭ ktang bruă tlŏ vaccin gang mkhư̆ Covid-19 kơ mnuih ƀuôn sang

       Hluê si Nguyễn Thanh Hưng,  Khua dlăng bruă Đảng să Đăk Nuê, kdriêk Lăk, truh wưng anei să mâo leh êbeh 250 čô F0. Đaŏ knăl klei huĭ tưp lar ăt adôk mâo tơdah bruă sang čư̆ êa alŭ wăl amâo pŏk ngă bi ktang dŭm hdră gang mkhư̆ klei ruă tưp, anăn leh mâo nanao dŭm anôk mâo klei ruă hlăm wưng giăm anei, Anôk bruă gĭt gai gang mkhư̆ klei ruă tưp ti să bi kƀĭn leh anăn ksiêm dlăng ya mta phŭn leh anăn mâo hdră msir gang mkhư̆ klei ruă tưp bi djŏ guôp čiăng hnưm gang mkhư̆ klei ruă tưp bluh mâo.

        “ Hmei khăng mkŏ mjing klei bi kƀĭn ksiêm wĭt mñă kơ anôk bruă kriê dlăng ti dŭm alŭ ƀuôn lŏ dơ̆ng hâo hưn mtô mblang kơ mnuih ƀuôn sang hlăm gưl Tết nguyên đán dơ̆ng truh ngă bi jăk 5K. Mơ̆ng hdră gang mkhư̆ klei ruă tưp ti să snăn hmei ƀuh bruă 5K jing klei yuôm bhăn hĭn, boh nik čhiăm guôm ƀô̆ snăn hmei mđĭ ktang bruă hâo hưn kơ mnuih ƀuôn sang truă čhiăm guôm ƀô̆ nanao leh anăn dôk bi kbưi, amâo bi kƀĭn lu mnuih čiăng amâo tưp klei ruă. Hlăm gưl Tết snăn gĭr hiu ksiêm dlăng čiăng thâo păn kjăp boh klei ti să čiăng si beư ngă klei mnuih ƀuôn sang thâo săng hlăm klei hdĭp hŏng bruă čhiăm guôm ƀô̆ čiăng gang mkhư̆ klei ruă tưp.”

Phung ngă bruă mdrao mgŭn kdriêk Lăk mă mta ksiêm mkă klei ruă tưp

Phạm Phú Anh,  K’iăng Khua anôk bruă mdrao mgŭn kdriêk Lăk brei thâo, ti anăp klei ruă tưp dleh ktuê dlăng, kdriêk ba mdah leh dŭm hdră msir msĕ si mđĭ ktang bruă hâo hưn mtô mblang čiăng mnuih ƀuôn sang ngă jăk  hdră 5k, mđĭ ktang hdră tlŏ vaccin, rơ̆ng jih mlan 1 kluôm kdriêk mâo êbeh 90% ênoh mnuih êbeh 18 thŭn kơ dlông tlŏ ênŭm vaccin aruăt tal 1 leh anăn mbĭt anăn tlŏ aruăt tal 3 kơ phung huĭ ênưih tưp, leh anăn tlŏ vaccin kơ hđeh sang hră mơ̆ng 12 truh 17 thŭn. Kdriêk ẳt mkŏ mjing krĭng wăl čiăng mdrao phung F0 ti Anôk bruă mdrao mgŭn hđăp hŏng 50 jhưng đih mdrao phung ruă amâo mâo klei knăl leh anăn bi knăl hdjul. Khădah ară anei, krĭng anei ka ngă bruă ôh, leh anăn hlăk jing anôk dôk guôn phung F0 ba nao mdrao kơ dŭm Sang êa drao mdrao phung Covid-19. Bruă čuăl krĭng, ktuê dlăng ti dŭm krĭng wăl ênưih tưp ti alŭ wăl tuh êyuh jih ai tiê.

        “ Tal sa mkra mđĭ hdră gang mkhư̆ klei ruă tưo mơ̆ng kluôm kdriêk mơ̆ng tur knơ̆ng jih jang bruă anei, mơ̆ng anôk bruă gĭt gai ti kdiêk, să leh anăn truh dŭm alŭ ƀuôn, leh anăn ti să mkŏ mjing leh dŭm Anôk mdrao mgŭn êrô hiu. Kơ kdrăp mnơ̆ng mprăo djăp ênŭm mâo sơaĭ oxi, masin sensir čiăng mkă hnơ̆ng oxi hlăm êrag, kdrăp mkă hnơ̆ng hlơr asei mlei, leh anăn êa drao ăt dưi pioh, hriăm mjuăt kơ dŭm êpul kriê dlăng êpul êya leh năn hriăm mjuăt kơ phung ti ƀuôn sang čŏng mă mta test hlăm êpul êya thâo ƀuh phung F0”

Klei ngă bruă jih ai tiê dŭm anôk bruă djŏ tuôm leh anăn bruă sang čư̆ êa alŭ wăl ti kdriêk Lăk ba leh dŭm klei bi knăl jăk leh dŭm hruê giăm anei, ênoh mnuih ruă mrâo ăt hrŏ lu. Anei jing klei bi knăl mơak čiăng Lăk hnưm bi mlih hnơ̆ng klei ruă tưp jing krĭng mâo ƀiă mnuih ruă leh anăn lŏ wĭt jing krĭng amâo lŏ mâo ôh mnuih djŏ Covid.

Pô mblang: H’Zawut Ƀuôn Yă