VOV4.Êđê -  Leh sa wưng sui hmăi mơ̆ng klei ruă tưp Covid-19, bruă hiu čhưn ênguê Dak Lak mâo klei bi knăl lŏ kơrŭ wĭt jăk siam. Mbĭt hŏng bruă mđĭ hnơ̆ng tŭ hdră hiu čhưn dôk mâo, čar dôk gĭr ngă mrâo lehanăn bi lu jơr hdră hiu čhưn kñăm jak iêu lu phung tuê hriê čhưn.

Hlai mbĭt hlăm ênhiang jăk mơak hlăm hdră rang mdah kdrăp tông ayŭ djuê ana Lăn Dap Kngư ti Sang kriê pioh Dak Lak, Nguyễn Văn Sơn, tuê hiu chưn ênguê mơ̆ng ƀuôn prŏng Hà Nội ƀuh hơ̆k mơak leh anăn khăp snăk. Sơn brei thâo, ñu hmư̆ leh leh anăn thâo kơ Dak Lak mơ̆ng kdrăp hâo hưn ƀiădah anei jing gưl tal êlâo dưi hriê čhưn ênguê tinei. Dŭm bruă hiu čhưn hlue si tuor jăk snăk.Jăk snăk. Kâo mnuih krĭng Dưr hruê tinei ƀuh krĭng Lăn Dap Kngư snei jing siam snăk, mrâo truh ƀuh leh klei mmuiñ ênhiang djuê ana Lăn Dap Kngư snăn jăk snăk leh anăn lăn čư̆ êa jăk siam, ară anei dưi ƀuh. Hdră hiu čhưn ênguê dưi mâo snei jăk snăk. Ƀuh hơ̆k mơak snăk leh dưi bi tuôm hŏng phung ti Lăn Dap Kngư leh anăn ktưn hưn kyua mâo thiăm sa djuê ana dơ̆ng, pô lŏ thâo sa krĭng lăn mrâo.

Dŭm hruê êgao, kah knar grăp hruê sang kriê pioh Dak Lak drông dŭm êtuh gưl tuê hiu čhưn ênguê, mâo hruê, hnơ̆ng tuê hiu truh dŭm êbâo čô. Đinh Một, Khua Sang kriê pioh Dak Lak brei thâo, anei jing klei bi knăl mơak kyua leh sa wưng sui kriêp êyăng kyua hmaĭ mơ̆ng klei ruă Covid-19, leh bruă hiu čhưn ênguê dưi lŏ wĭt pŏk snăn bruă hiu čhưn ênguê Dak Lak mâo leh knhuang kơrŭ wĭt. Hnơ̆ng tuê hriê čhưn dŭm hruê êgao ăt lač kơ klei gĭr ktưn mơ̆ng bruă hlăm klei bi blŭ hrăm hŏng tuê hiu čhưn hlăm lu hdră hâo hưn.Hlăm yan klei ruă tưp snăn hmei khăng blŭ hrăm hŏng tuê hlăm mrô internet. Hmei mkŏ mjing lu bruă ngă hlăm anăn, si tôhmô hưn mthâo dŭm klei rang mdah online, hmei hưn mthâo klei yăl dliê, mnơ̆ng dhơ̆ng hlăm anăn leh anăn khăng bi blŭ hrăm hŏng tuê hiu čhưn hlăm Fanpage leh anăn Youtube mơ̆ng sang kriê pioh. Kyua anăn plah wah Sang kriê pioh Dak Lak leh anăn tuê hiu čhưn mâo klei bi blŭ hrăm jăk leh anăn leh mâo hdră mtrŭn pŏk ƀăng hiu čhưn ênguê snăn tuê hriê. Hmei mâo lu gưl čih anăn hiu dlăng, tuê hriê lu snăk.

Mbĭt hŏng klei mđĭ kyar mnơ̆ng dhơ̆ng hiu čhưn ênguê, mơ̆ng akŏ thŭn truh ară anei, čar Dak Lak ăt gĭr ktưn hưn mdah, mđĭ kyar hiu čhưn ênguê hŏng dŭm čar čiăng bi hgŭm krĭng hiu čhưn ênguê leh anăn mđĭ kyar bruă hiu čhưn ênguê hluê si gưl. Hlăm gưl 1 thŭn anei, čar hgŭm leh hlăm Knăm mơak rang mdah lu ala čar, bi siñê hgŭm hŏng dŭm čar Phú Yên, Bình Định, Quảng Ngãi, Gia Lai, Kon Tum, amâodah mđĭ ktang bruă mkŏ mjing mnơ̆ng dhơ̆ng hiu čhưn ênguê hŏng čar Khánh Hoà. Nguyễn Thị Lệ Thanh, Khua Knơ̆ng bruă hiu čhưn ênguê čar Khánh Hoà bi mni kơ klei čang hmăng bi hgŭm krĭng plah wah 2 čar mđĭ kyar bruă hiu čhưn ênguê.Klei găl mơ̆ng 2 čar snăn mnơ̆ng dhơ̆ng hiu čhưn ênguê mơ̆ng dua kwar mdê snăk, amâo mâo klei msĕ ôh snăn hmei ngă klei bi hgŭm jing găl snăk.  Hŏng klei găl mơ̆ng Khánh Hoà anăn jing hiu čhưn ênguê êa ksĭ, plao ksĭ mguôp hŏng hiu chưn ênguê hlăm dliê kmrơ̆ng ti čar Dak Lak snăn đru bi lu jơr mnơ̆ng dhơ̆ng leh anăn mơ̆ng bruă pŏk ngă klei bi hgŭm krĭng snăn hmei čang hmăng hŏng mnơ̆ng dhơ̆ng anei snăn klei bi hgŭm srăng mâo klei tŭ dưn hlăm wưng kơ anăp.

Hluê si klei ksiêm yap mơ̆ng čar, hlăm gưl 1 thŭn anei, Dak Lak drông leh giăm 240 êbâo gưl tuê hiu chưn, hiu čhưn ênguê ti čar. Hjăn hlăm mlan 4 anei, hnơ̆ng tuê hriê ti čar ƀrư̆ đĭ, boh nik hlăm gưl mdei, lu anôk sang jưh bŏ mnuih. Dŭm êpul tuê mơ̆ng čar, ƀuôn prŏng msĕ ƀuôn prŏng Hồ Chí Minh, Hà Nội, Quảng Ninh… ăt ruah Dak Lak jing anôk truh hlăm hdră hiu čhưn ênguê kwar krah leh anăn Lăn Dap Kngư. Hlue si Đặng Gia Duẩn, K’iăng Khua Knơ̆ng bruă Dhar kreh - mjuăt ktang asei mlei leh anăn hiu chưn ênguê Dak Lak, hŏng klei găl leh anăn lăn čư̆ êa, knhuah dhar kreh, Dak Lak dôk gĭr ktưn lu snăk čiăng kơrŭ wĭt bruă hiu čhưn ênguê.Sa hlăm dŭm gru hmô jih jang phung tuê mơ̆ng djăp krĭng kwar khăp snăk sĭt hriê ti Dak Lak anăn jing hiu dlăng lăn čư̆ êa. Dak Lak mâo kphê, dhar kreh čing čhar hŏng lu jơr jăk siam, boh nik mâo dhar kreh êman. Ară anei snăn čar dôk pŏk ngă hiu čhưn ênguê siă suôr hŏng êman snăn knŏng anăn pia hmư̆ jăk, bi tluh leh phung tuê hiu čhưn. Êngao anăn snăn ară anei dŭm gŏ sang pral pŏk dŭm homestay, farmstay mguôp hŏng bruă hiu čhưn ênguê mtah leh anăn hơĭt kjăp, boh nik mguôp hŏng bruă lŏ hma snăn čar drei ăt mâo klei găl kơ lŏ hma snăn anăn ăt jing klei găl tur knơ̆ng čiăng mđĭ kyar hiu čhưn ênguê lŏ hma hlăm wưng kơ anăp.

Leh sa wưng sui hmaĭ mơ̆ng klei ruă tưp, hlăm boh klei mrâo, Dak Lak dôk gĭr pŏk ngă lu bruă ngă čiăng mđĭ kyar hiu čhưn ênguê. Hŏng dŭm hdră msir kơ klei rơ̆ng êđăp ênang gang mkhư̆ Covid-19, blŭ tlao djŏ hnơ̆ng hŏng tuê F0, čar ăt dôk gĭr ktưn čiăng mkŏ mjing mnơ̆ng dhơ̆ng hiu čhưn ênguê lu jơr, lu mta leh anăn dưi ba yua jih klei găl ti alŭ wăl./.