Mơ̆ng hdră anei đru leh dŭm êtuh gŏ sang mâo thiăm klei găl čiăng mđĭ kyar bruă duh mkra amâodah dưi mâo sa boh sang mrâo kjăp, siam.

Dôk mŭt hlăm sang mrâo prŏng siam, amai Nguyễn Thị Diệu Linh, mă bruă ti Anôk bruă gĭt gai lĭng kahan kdriêk Krông Bông, hơ̆k mơak brei thâo, čang hmăng dưi mâo sa boh sang kjăp siam mơ̆ng lu thŭn êgao ară anei dưi jing sĭt. Klei hdĭp dleh dlan leh ung ñu nao mă bruă kbưi, hjăn păn ñu mă bruă êjai kriê dlăng 2 čô anak êjai, hlăk anăn mâo 1 čô anak mâo klei ruă ñŭt huĭ. Tơdah amâo mâo ƀĭng găp, phung mă bruă mbĭt leh anăn 50 êklăk prăk mơ̆ng Keh mkiêt mkriêm hlue ngă asăp Awa mtô mơ̆ng bruă Đảng kdriêk Krông Bông mđup brei, ka thâo ôh hbĭl gŏ sang dưi rŭ mdơ̆ng sang.

Kâo ƀuh mơak kyua mâo klei đru mơ̆ng anôk bruă gưl dlông, phung ayŏng adei anôk bruă, mkŏ mjing boh sang ƀĭng hgŭm msĕ si hruê anei čiăng hơĭt ai tiê mă bruă. Kâo ƀuh hdră anei yuôm bhăn snăk, đru kâo đăo knang, bi hrŏ klei dleh dlan sui hŏng anei, đru kâo hgao čiăng hơ̆it ai tiê rông anak.

Kâo mơak leh mâo mă 20 êklăk prăk mơ̆ng keh mkiêt mkriêm hlue ngă asăp Awa, amai Trần Thị Vân, ti alŭ 2, să Hòa Thành, kdriêk Krông Bông ngă čuôr kơup leh anăn adring sang, mjing anôk hlăp kơ anak êkei điêt hrô kơ dôk hlăm jar êdai điêt dhiêt. Anak êkei ñu mâo klei ruă hlăm dlô, 7 thŭn leh ƀiădah klei thâo săng bi knar hŏng hđeh dŭm mlan.

Lu thŭn ăt tui mdrao kơ anak ti lu anôk anăn bruă duh mkra ăt kăn dưi mâo, leh anăn mrâo anei mâo klei đru mơ̆ng hdră jing mơak snăk, čiăng mkra adring sang leh anăn mtih sang kơ anak dlăng djăp mta mnơ̆ng riêng gah. Kyua anak jih hruê dôk hlăm sang, grăp blư̆ amĭ nao mă bruă wĭt mơak snăk, gŏ sang klă sĭt bi mni lač jăk lu.

Amai Linh leh anăn Amai Vân jing 2 hlăm dŭm êtuh čô đảng viên, mnuih ƀuôn sang mâo klei đru mơ̆ng Keh mkiêt mkriêm hlue ngă klei Awa mtô ti kdriêk Krông Bông.  Anei jing prăk kyua bruă Đảng kdriêk Krông Bông pŏk ngă mơ̆ng thŭn 2016. Hlue anăn, grăp anôk bruă, êpul bruă mtrŭt mjhar knuă druh, đảng viên, mnuih ƀuôn sang mkiêt mkriêm mơ̆ng ƀiă êdi 2000 prăk truh 20 êbâo prăk grăp mlan čiăng mâo prăk đru kơ phung dleh dlan ti kdriêk. Hŏng hdră ngă anei, hdră iêô mkrum leh 4 êklai prăk. Hồ Thị Thảo, K’iăng Khua Anôk bruă hâo hưn mtô mblang bruă Đảng kdriêk Krông Bông brei thâo, hdră jing bruă ngă klă sĭt tui hriăm leh anăn hlue ngă knhuah mnhač Hồ Chí Minh, đru lar bra asăp mtrŭn 05 mơ̆ng Phŭn bruă kđi čar truh kơ mnuih ƀuôn sang. Hlăm hdră pŏk ngă, hlue si wưng, Anôk bruă Đảng kdriêk bi mklă grăp êpul dưi dưn hdră mjêč čiăng dưi bi liê prăk đru.  Ênoh đru ba yua hŏng klei mbruă, hưn mdah, klă mngač, phung dưi dưn pŏk mlar leh anăn mkra mlih djŏ guôp. Kyua anăn, hdră anei dưi mâo lu mnuih ƀuôn sang, knuă druh, đảng viên mđing truh, nao hgŭm.

Hlăm wưng anăp, ksiêm hriăm hdră anei jing yuôm bhăn čiăng dưi mâo sa kdrêč đru kơ phung dleh dlan ti kdriêk. Mĭn tĭng leh brei čan jih keh anei snăn akŏ mlan 7/2023 snăn Anôk bruă hâo hưn mtô mblang srăng lŏ dơ̆ng kčĕ kơ bruă Đảng pŏk ngă hdră mkiêt mkriêm mrâo čiăng kkuh drông Klei bi kƀĭn Đảng dŭm gưl wưng 2025 - 2030.

Amâo djŏ knŏng đru mguôp klă klơ̆ng Asăp mtrŭn 05 mơ̆ng Phŭn bruă kđi čar truh kơ dŭm gưl mnuih ƀuôn sang, Hdră mkiêt mkriêm hlue ngă Asăp Awa ti Krông Bông ba klei tŭ dưn klă klơ̆ng, đru lu phung dưi dưn. Anei jing bruă yuôm bhăn čiăng kơ grăp čô mnuih ƀuôn sang thâo hrăm mbĭt, lar bra klei jăk siam hlăm bruă tui hriăm, hlue ngă knhuah mngač Hồ Chí Minh, kơ klei hdĭp ƀrư̆ hruê ƀrư̆ jăk siam hĭn./.