Tlam mbruê 9/1, Bruă Đảng čar Dak Lak mkŏ mjing klei kƀĭn trông ksiêm wĭt 5 thŭn hruê ngă hdră mtrŭn mrô 35/2018 mơ̆ng Phŭn bruă kđi čar gưl 12 kơ “Mđĭ hĭn bruă răng mgang tur knơ̆ng klei mĭn mơ̆ng Đảng, bi kdơ̆ng hŏng klei mĭn soh čhuai, phung roh hlăm wưng mrâo”, Ksiêm wĭt bruă hâo hưn thŭn 2023, hluê ngă bruă klam thŭn 2024. Hlăm dŭm thŭn êgao, bruă bi kdơ̆ng hŏng dŭm hdră mnêč leh anăn bi rai mơ̆ng phung roh leh anăn bi kdơ̆ng ti čar Dak Lak dưi mâo boh tŭ dưn năng čih yap. Grăp anôk bruă Đảng mâo klei gĭr mlih mrâo, mđĭ hnơ̆ng tŭ jăk leh anăn boh tŭ dưn hlăm bruă klei mĭn dhar kreh. Biădah, ti Dak Lak ăt mâo dŭm klei arưp aram dleh dưi ksiêm dlăng kơ klei êđăp ênang, boh nik jing dŭm boh klei djŏ tuôm hŏng lăn ala, djuê ana, klei đăo knang.

Phung bi kdơ̆ng lŏ dơ̆ng kčŭt mčur, ktŭng ba, mkŏ mjing êpul êya bi kdơ̆ng hŏng Đảng, knŭk kna, klei kiă kriê. Blŭ hlăm klei kƀĭn trông, Phạm Minh Tấn, k’iăng khua Bruă Đảng čar Dak Lak mñă klă, hlăm wưng kơ anăp, dŭm gưl bruă Đảng, bruă sang čư êa lŏ dơ̆ng mtrŭt mđĭ bruă bi kdơ̆ng hŏng klei mĭn soh čhuai, klei bi roh, răng mgang tur knơ̆ng klei mĭn mơ̆ng Đảng, dlăng anăn jing bruă klam yuôm bhăn leh anăn ngă nanao mơ̆ng jar bruă kđi čar leh anăn grăp čô knuă druh, đảng viên. Mbĭt anăn lŏ dơ̆ng thâo klă, ksiêm duah čiăng hmao đru kčĕ, mgaih msir hnưm dŭm boh klei bluh mrâo mơ̆ng nah gŭ.