VOV4.Êđê- Ti čar Dak Lak ară anei mâo truh 36 hdră bruă mkăp êa doh kƀĭn ti krĭng ƀuôn sang jhat rai, amâo lŏ dưi yua. Klei anei ngă luič liê prăk knŭk kna leh grăp hdră bruă duh bi liê lu êklai prăk, ƀiădah mnuih ƀuôn sang ăt dôk hlăm klei amâo mâo êa doh ba yua.

Anôk mkăp êa doh yua hlăm grăp hruê ti ƀuôn Trăp, să Čư̆ M’gar, kdriêk Čư̆ M’gar dưi duh bi liê mkŏ mkra mơ̆ng thŭn 2017 truh ti thŭn 2019 bi leh yơh. Kluôm ênoh prăk duh bi liê kơ knơ̆ng mkăp êa doh anei jing 12 êklai prăk, mă mơ̆ng ngăn prăk knŭk kna, mkăp brei êa doh giăm 500 gŏ sang ti ƀuôn Ƀling, ƀuôn Trăp leh anăn ƀuôn Dhŭng. Aduôn H’Bun Kƀuôr ti ƀuôn Trăp brei thâo, anôk mkăp êa anei knŏng yua mă 2 3 mlan đuč leh anăn mdei ngă bruă hlăm 3 thŭn êgao, ară anei lui hơăi, rơ̆k tơ̆k čăt đĭ. Gŏ sang ăt dleh dlan mơh kơ êa yua hlăm grăp hruê:

Yan bhang êa khuôt, kâo nao duah akâo êa amâodah blei êa giêt wĭt tŭk knă, huă mnăm, bi kơ mnei amâodah boh m’iêng ao, đĭ êdeh kai nao mdiăng êa ti knơ̆ng mkăp êa dih yơh”.

Kluôm čar Dak Lak mâo 36/123 hdră bruă knơ̆ng kdơ̆ng êa mdei ngă bruă

Hlak mblang kơ phŭn agha knơ̆ng mkăp êa doh 12 êklai prăk knŏng yua mă 2 3 mlan, Aduôn Phạm Thị Tiềm – khua bruă sang čư êa să Čư̆ Mgar brei thâo, mta phŭn jing bruă bi êran amâo mâo boh tŭ dưn. Phŭn kčưm, să jao kơ tlâo čô khua ƀuôn nao hgŭm ksiêm dlăng, bi êran. Mâo mă ƀiă mlan, jih tlâo čô anăn jao wĭt knơ̆ng mkăp êa anei kyua amâo mâo dưi hrui mă prăk mơ̆ng mnuih ƀuôn sang čiăng tla prăk pui. Thŭn 2020, să mkŏ mjing leh êpul bi êran knơ̆ng mkăp êa doh ti ƀuôn Trăp. Ƀiădah kyua klei kƀah hlăm klei ngă bruă leh anăn bruă hrui mă prăk pui mơ̆ng mnuih ƀuôn sang tuôm hŏng klei dleh dlan, kyuanăn knơ̆ng mkăp êa doh anei lŏ mdei ngă bruă. Aduôn Phạm Thị Tiềm lŏ lač klă hĭn.

 “Bruă sang čư êa să mâo leh klei hưn mdah hŏng anôk bruă êa doh leh anăn bi doh wăl hdĭp mda mơ̆ng knơ̆ng bruă lŏ hma leh anăn mđĭ kyar krĭng ƀuôn sang čiăng ksiêm dlăng bruă bi êran, bruă sang čư êa să hmei amâo mâo ênŭm ôh klei thâo dưi kiă kriê knơ̆ng mkăp êa doh anei. Hmei mâo klei rŭng lăn kyuadah jhat anôk anei, anôk dih, hlăm ală mnuih ƀuôn sang msĕ hmei amâo thâo bĭt leh anăn mkra wĭt ôh. Kyuanăn čiăng jao kơ anôk bruă thơ̆ng kơ bruă ksiêm dlăng čiăng bi êran mâo boh tŭ dưn.

Lu hdră bruă knơ̆ng kdơ̆ng êa krĭng ƀuôn sang jhat rai ngă luič liê prăk knŭk kna, mnuih ƀuôn sang amâo dưi dưn

Klei ksiêm dlăng mơ̆ng anôk bruă êa doh leh anăn bi doh wăl hdĭp mda čar Dak Lak brei ƀuh, kluôm čar mâo truh 36 hlăm 123 knơ̆ng mkăp êa doh ti krĭng ƀuôn sang jhat rai, mdei ngă bruă. Mta phŭn tal êlâo jing kyua duh bi liê hliê, điêt, mnuih yua ƀiă, êjai anăn ênoh prăk bi êran yuôm ngă kơ kƀah prăk duh bi liê. Dŭm knơ̆ng mkăp êa doh dưi jao leh kơ să amâodah khua êpul khua ƀuôn ksiêm dlăng bi êran, knuă druh bi êran amâo mâo djăp ênŭm klei thâo kơ bruă, kyuanăn truh klei luč liê, jhat rai, amâo mâo kbiă prăk mnga, kyuanăn truh kơ klei mdei ngă bruă.

        Hluê si Phạm Ngọc Bình – Khua kiă kriê anôk bruă êa doh leh anăn bi doh wăl hdĭp mda čar Dak Lak, čiăng krŭ wĭt klei ngă bruă knơ̆ng mkăp êa doh ti krĭng ƀuôn sang, anôk bruă dôk bi mguôp hŏng bruă sang čư êa dŭm kdriêk, wăl krah, ƀuôn prŏng ngă bruă ksiêm dlăng, mkŏ mjing hdră lŏ mkra wĭt, mbĭt anăn mđĭ hĭn bruă hâo hưn kơ mnuih ƀuôn sang dưi thâo săng klă kơ klei jăk mơ̆ng bruă yua êa doh. Bi kơ wưng sui čiăng mâo hdră yang ƀuôn hlăm bruă mkăp brei êa doh yua grăp hruê, duh bi liê kơ dŭm bruă mkŏ mkra mâo boh tŭ dưn hĭn.

 “Hlăm hruê mmông kơ anăp tơdah mâo klei duh bi liê, dŭm anôk bruă dưi jao ngă bruă srăng ksiêm dlăng si srăng ngă čiăng kơ dŭm knơ̆ng mkăp êa doh mâo boh prŏng man dưn mâodah prŏng kơ dlông, ênoh gŏ sang yua lu, mơ̆ng anăn ênoh prăk duh bi liê srăng hrŏ ƀiă, ba yua mâo boh tŭ dưn hĭn. Boh klei jao kơ anôk bruă bi êran ăt yuôm bhăn sơnăk, čiăng mtrŭt mjhar dŭm knơ̆ng bruă mâo klei thâo nao hgŭm hlăm bruă anei čiăng bi lông mă klei ngă bruă, ksiêm dlăng bi êran djŏ hŏng hdră bhiăn.

        Pô mblang: Y-Ƀel Êban