VOV4.Êđê- Tlam mbruê 6/5, bruă sang čư êa čar Dak Lak mkŏ mjing klei kƀĭn bruă klei mrâo mlan 4/2022, hâo hưn kơ boh sĭt klei đĭ kyar bruă duh mkra ala ƀuôn hlăm mlan 4 leh anăn wĭt lač dŭm mta phŭn mơ̆ng dŭm anôk bruă klei mrâo bơ̆k bâo, mâo phung ktuê dlăng uêñ mĭn. Djŏ tuôm hŏng bruă ksiêm duah, bi klă klei ngă soh hlăm bruă blei kdrăp yua ksiêm mkă kman SARS-CoV-2 mơ̆ng anôk bruă ksiêm dlăng klei ruă tưp čar Dak Lak, Đại tá Nguyễn Văn Quy, Khua adŭ bruă đru kčĕ, kahan ksiêm čar Dak Lak brei thâo, bruă anei djŏ tuôm hŏng klei ngă soh blei kdrăp yua ksiêm mkă kman SARS-CoV-2 mơ̆ng knơ̆ng bruă Việt Á mâo hlăm kluôm ala hlăm hruê mmông êgao.

Truh kơ ară anei, anôk bruă ksiêm duah, kahan ksiêm čar Dak lak bi klă anôk bruă ksiêm dlăng klei ruă tưp čar Dak Lak blei leh êbeh 63.000 kdrăp ksiêm mkă kman hŏng ênoh êbeh 10 êklai prăk. Hlăm klei ksiêm duah, bi klă, hrui mă hră mơar, anôk bruă djŏ tuôm bi klă leh bruă anei mâo klei bi knăl ngă soh hŏng klei bhiăn ala čar. Djŏ tuôm hŏng bruă mrâo lač, Pô ksiêm duah čar Dak Lak ăt dôk ksiêm duah kơ bruă blei kdrăp yua, mnơ̆ng yua bruă mdrao mgŭn, kdrăp ksiêm mkă, vaccine leh anăn êa drao mdrao klei ruă tưp Covid-19 ti alŭ wăl čar.

Pô mblang: Y-Ƀel Êban