VOV4.Êđê- Ară anei, dŭm anôk bruă hiu atăt tuê, sang jưh mdei leh anăn dŭm anôk bruă hiu čhưn ênguê ti čar Dak Lak mprăp leh dŭm klei găl hĭn tŭ drông phung tuê hiu čhưn ênguê wưng hruê mdei knăm 30/4 leh anăn 01/05. Hluê si knơ̆ng bruă dhar kreh, mjuăt ktang asei mlei leh anăn hiu čhưn ênguê čar Dak Lak, truh kơ mmông anei, 225 anôk bruă mjưh mdeh, sang jưh ti ƀuôn prŏng Ƀuôn Ama Thuôt giăm bŏ leh. Ênoh phung tuê bi klă mưn adŭ jưh mdei lu hĭn hriê mơ̆ng ƀuôn prŏng Hồ Chí Minh, Hà Nội leh anăn dŭm čar Khánh Hòa, Bà Rịa Vũng Tàu, Bình Dương, Bình Phước… Čiăng kơ phung tuê mâo knăm hruê mdei hơ̆k mơak leh anăn êđăp ênang, čar Dak Lak mtă kơ dŭm anôk bruă hiu čhưn ênguê bi klă ênoh mnơ̆ng dhơ̆ng, rơ̆ng amâo dưi mâo klei mdăp pioh adŭ sang jưh, mđĭ ênoh mnơ̆ng dhơ̆ng mă prăk mnga soh hŏng hdră bhiăn. Mbĭt hŏng anăn, dŭm anôk mnia mblei mnơ̆ng ƀơ̆ng huă, êa mnăm srăng kñăm kơ mnơ̆ng ƀơ̆ng huă doh. Êngao kơ anăn, dŭm anôk bruă hiu čhưn ênguê srăng rơ̆ng klei êđăp ênang hlăm bruă gang mkhư̆ klei ruă tưp Covid-19. Blŭ tlao jăk hŏng phung tuê jing F0 hriê ti čar Dak Lak.

Pô mblang: Y-Ƀel Êban