Hlăm mkrah thŭn anei, kluôm ala mâo 23 klei truh hlăm klei yua pui kmlă ngă 11 čô djiê leh anăn 23 čô êka. Mta phŭn jing kyua mnuih ƀuôn sang čŏng mkra mjing hdră bruă, pŏk hưn mdah, kdrăp pui kmlă, ngă soh hŏng hdră êđăp ênang hlăm bruă yua pui kmlă, boh nik kyua hiu tlĕ mă kdrăp mnơ̆ng bruă pui kmlă. Ti čar Dak Lak, kñăm gang mkhư̆ klei truh hlăm bruă yua pui kmlă hlăm yang ƀuôn, Bruă pui kmlă Dak Lak mđĭ ktang bruă ksiêm dlăng grăp gưl hdră êlan klei pui, bi mguôp mơĭt klei hưn mdah, mbha hră hâo hưn kơ bruă rơ̆ng êđăp ênang êlan klei pui, ktrâo lač ba yua pui kmlă êđăp ênang.

Boh nik êlâo kơ yan hjan angĭn êbŭ thŭn anei, dŭm anôk bruă bi hgŭm hŏng bruă sang čư̆ êa alŭ wăl hâo hưn nanao kñăm mđĭ klei thâo săng phung yua pui kmlă. Hlăm anăn, bruă pui kmlă mđing amâo dăp ôh ăng ten pui kmlă, klei yuôl, pra rŭ mdơ̆ng, pla ana kyâo soh hŏng klei kčah êđăp ênang; amâo mnah ôh čĭm gam dlông klei pui, anôk mđĭ mtrŭn pui kmlă; amâo mđĭ ôh hla, mnơ̆ng phiơr giăm êlan klei pui; amâo yua ôh gơ̆ng pui kmlă, anôk mđĭ mtrŭn pui kmlă kă mnơ̆ng rông… Mbĭt anăn, grăp hruê, hlăm hdră kih mdoh êlan klei pui, mkra pui kmlă kơ phung yua, brei rơ̆ng grăp gưl êlan klei pui leh anăn dŭm anôk mđĭ mtrŭn pui kmlă, phung mă bruă pui kmlă bi mguôp ksiêm dlăng hŏng êlan klei pui nah tluôn mmông mkă pui kmlă, hâo hưn kơ grăp čô yua čiăng rơ̆ng êđăp ênang./.