Dôk ruah ƀêñ ti anôk čhĭ ƀêñ trung thu ti êlan Lê Thánh Tông, ƀuôn prŏng Ƀuôn Ama Thuôt, amai Phùng Thị Thúy Hạnh, ƀuôn hgŭm Tân An, ƀuôn prŏng Ƀuôn Ama Thuôt brei thâo, phung anak khăp êdi ƀơ̆ng ƀêñ Trung thu. Thŭn anei, ƀêñ mâo lu mta mơ̆ng, lu anôk mkra, ƀiădah amai ăt khăp dŭm klŏ ƀêñ ngă hlue knhuah đưm, mâo anăn knăk thâo klă anôk mkra:

“Tơdah ruah ƀêñ trung thu kâo srăng ruah dŭm mta ƀêñ mâo anăn knăl, thâo klă anôk mkra, mâo leh mơ̆ng sui hlăm wăl anôk mnia mblei čiăng rơ̆ng klŏ ƀêñ siam lehanăn jăk ƀơ̆ng”.

Čhĭ ƀêñ trung thu êbeh 30 thŭn hŏng anei, amai Nguyễn Thị Tuyết Mai, ti ƀuôn hgŭm Tân Lợi, ƀuôn prŏng Ƀuôn Ama Thuôt brei thâo, ƀêñ trung thu kreh mâo wưng dưi ƀơ̆ng bhiâo kyua anăn amai amâo blei lu sa blư̆ ôh, ƀiădah amai srăng blei lu blư̆ čiăng ba čhĭ hlăm wưng sui ƀiă. Klei anei đru bi hrŏ ênoh ƀêñ adôk tơdah amâo mâo mnuih blei, rơ̆ng hnơ̆ng tŭ jăk mơ̆ng ƀêñ.

“Pô mă ƀêñ amâo mă sa blư̆ ôh, ƀiădah pô mă hlăm lu blư̆ kyua anăn pô dôk nanao ƀêñ mrâo čiăng ba čhĭ kơ tuê gơ̆ hơĭt ai tiê blei. Klei anei jing klei mđing tal êlâo”.

Ti siêu thị Go Ƀuôn Ama Thuôt, anôk čhĭ ƀêñ Trung thu dưi dăp mbĭt hŏng anôk čhĭ boh kroh čiăng kơ ƀêñ dưi kriê pioh ti anôk jăk hĭn. Bùi Văn Quân, Khua Siêu thị Go Ƀuôn Ama Thuôt brei thâo:

“Hmei ksiêm dlăng hnơ̆ng tŭ jăk mơ̆ng hdră blei lehanăn dăp anôk rang mdah ƀêñ ba čhĭ rơ̆ng kơ hnơ̆ng tŭ jăk. Ară anei, ƀêñ anei hmei kriê pioh mơ̆ng 25 truh kơ 27 độ C lehanăn hmei mkăp mta ƀêñ trung thu bi hrŏ yua mta kriê pioh lu hlăm ƀêñ.

Rơ̆ng klei suaih pral kơ mnuih blei ƀơ̆ng, hdră ksiêm dlăng klei doh êƀăt mnơ̆ng dhơ̆ng êlâo, hlăm lehanăn êdei kơ Têt trung thu mâo čar Dak Lak mđing êdi. Hluê anăn, Anôk bruă sang čư̆ êa čar mkŏ mjing leh 2 êpul ksiêm dlăng mlir dhar bruă kơ klei doh êƀăt mnơ̆ng dhơ̆ng wưng Têt trung thu thŭn 2024 ti ƀuôn prŏng Ƀuôn Ama Thuôt, wăl krah Ƀuôn Hô lehanăn dŭm kdriêk Krông Pač, Êa Kar, Čư̆ Kuiñ lehanăn Lăk. Mbĭt hŏng Anôk kriê dlăng anôk mnia mblei čar Dak Lak lehanăn dŭm kdriêk, wăl krah, ƀuôn prŏng ăt mkŏ mjing dŭm êpul nao ksiêm dlăng kñăm pral gang mkhư̆, msir mghaih dŭm klei ngă soh hlăm bruă mkra mjing, čhĭ dŭm mta mnơ̆ng mkăp kơ wưng Têt trung thu thŭn anei.

Hlăm hdră ksiêm dlăng, dŭm êpul mđing kơ mnơ̆ng yua mkra ƀêñ, bruă ba yua dŭm mta kăp mkra ƀêñ, klei doh êƀăt mnơ̆ng dhơ̆ng hlăm bruă mkra mjing, kriê pioh mnơ̆ng dhơ̆ng lehanăn ƀêñ; ksiêm dlăng phŭn agha, anôk mkra, hnơ̆ng tŭ jăk, wưng dưi ba yua ƀêñ, hră mơar, ênoh čhĭ… Vương Minh Sơn, Kơiăng khua knơ̆ng bruă kriê dlăng anôk mnia mblei čar Dak Lak brei thâo, dŭm êpul ksiêm dlăng bi mguôp hdră mtô mblang truh kơ dŭm anôk bruă mkra, čhĭ hluê ngă kjăp klei kčah mtrŭn djŏ hŏng hdră bhiăn hlăm klei čhĭ mnơ̆ng dhơ̆ng lehanăn rơ̆ng klei doh êƀăt mnơ̆ng ƀơ̆ng, bruă hluê ngă dŭm mta čuăn, hưn mthâo hnơ̆ng kčah mtrŭn kơ klei tŭ jăk mnơ̆ng ƀơ̆ng.

“Hmei gĭt gai dŭm êpul êya bruă mđing kơ hră mơar bi mklă phŭn agha anôk mkra mjing. Tal dua jing hruh đŭng, hlăm anăn brei čih djăp ênŭm mta klei ti êngao hruh đŭng, boh nik bi mklă hnơ̆ng tŭ klă, wưng ba yua, wưng mkra, wưng kriê pioh. Tơdah ngă soh srăng msir mghaih djŏ si klei kčah mtrŭn mơ̆ng hdră bhiăn”.

Mơ̆ng leh ksiêm dlăng, truh kơ ară anei, Êpul ksiêm dlăng anôk mnia mblei mrô 1 ƀuh leh 2 anôk čhĭ ƀêñ ti ƀuôn prŏng Ƀuôn Ama Thuôt čhĭ dŭm mta mnơ̆ng, ƀêñ amâo thâo klă phŭn anôk mkra mjing, mâo: 42 klŏ ƀêñ trung thu (mta 500g/klŏ); 50 kg boh pom hrah bi krô, êbeh 2.300 mta mnơ̆ng hlăp kơ phung hđeh (phao, dhŏng, đao, hna) mâo ênoh êbeh 33 êklăk prăk. Jih jang mnơ̆ng anei jing mnơ̆ng mơ̆ng ala tač êngao, amâo mâo hră m’ar bi mklă anôk mkra djŏ hdră bhiăn. Êpul nao ksiêm, đŭ bi kmhal leh hŏng 2 anôk čhĭ mnơ̆ng anei lehanăn brei lui jih dŭm mta mnơ̆ng anei./.