Ti krah mlan 4 âdiê mđiă ktang, dliê Yŏk Đôn hlơr msĕ pui čuh, 8 čô hlăm êpul Kriê dlăng dliê mrô 1, Anôk bruă kriê dlăng dliê Khua knŭk kna Mkuôm Yŏk Đôn, čar Dak Lak ăt dôk ngă bruă êmiêt hla krô, hluê ngă bruă čuh êlâo mâo klei ksiêm dlăng. Nguyễn Hữu Tạo, k’iăng khua kiă kriê dliê knŭk kna mkuôm Yŏk Đôn brei thâo, dôk hlăm wưng adiê mđiă ktang, klei arưp aram pui ƀơ̆ng truh kơ gưl 5, jing gưl arưm aram hĭn. Čiăng gang mkhư̆ klei pui ƀơ̆ng, anôk bruă bi mguôp hŏng dŭm êpul êya mkăn tiŏ nao giăm 200 čô knuă druh, mnuih mă bruă čiăng hiu suang dlăng, răng mgang leh anăn gang mkhư̆ klei pui ƀơ̆ng dliê.

            “Jih jang dŭm anôk gak răng, êpul gak răng srăng ngă bruă 24/24 ti dŭm anôk ênưih pui ƀơ̆ng, hluê ngă bruă čuh êlâo mâo klei ksiêm dlăng ti dŭm bĭt anôk anăn. Bruă anăn jing pô mghaih msir sitôhmô anôk anei pô ƀih ênưih pui ƀơ̆ng pô srăng čuh hĕ êlâo dŭm mta ênưih pui ƀơ̆ng, hruê êdei lŏ nao ti anôk mkăn, kyuanăn srăng dưi bi hrŏ tơdah tăm mâo klei pui ƀơ̆ng, pui amâo srăng bluih lar hmar kơ ana kyâo dliê. Tal 2, mkŏ mjing djah brŭ čiăng kơ dŭm mta mnơ̆ng điêt ti gu dliê hdĭp mda, rơk čăt đĭ čiăng kơ hlô dliê mâo mnơ̆ng ƀơ̆ng.”

Mbĭt hŏng bruă gang mkhư̆ klei pui ƀơ̆ng dliê dôk hluê ngă hlăm kluôm čar. Dŭm anôk bruă hlăm êpul gak răng dliê leh anăn phung pô dliê ăt uêñ mĭn kơ bruă mđĭ ai dưi truih mdjiê klei pui ƀơ̆ng. Hồ Văn Lành, K’iăng khua kiă kriê Anôk bruă ksiêm dlăng dliê Krông Hnang - Ƀuôn Hồ brei thâo, kyua mâo klei mprăp jăk kơ ai dưi leh anăn mnơ̆ng yua hŏng dŭm hdră êlan gang mkhư̆, truih mdjiê klei pui ƀơ̆ng sa anôk, klei pui ƀơ̆ng dliê ti wăl 299, să Čư̆ Klông, kdriêk Krông Hnang hlăk akŏ mlan 4 anei dưi truih mdjiê.

 “Leh mâo klei hưn kơ klei pui ƀơ̆ng dliê, hmei bi mguôp hŏng Êpul răng mrang leh anăn gang mkhư̆ klei pui ƀơ̆ng dliê mrô 3, mơ̆ng Anôk bruă răng mgang dliê Dak Lak, phung pô dliê leh anăn bruă sang čư êa alŭ wăl tiŏ nao êbeh 40 čô ngă bruă truih mdjiê klei pui ƀơ̆ng. Jih jang hluê ngă klei čuăn 4 sa anôk čiăng truih mdjiê pui ƀơ̆ng, hŏng klei gĭr mơ̆ng phung ayŏng adei, dưi hmao truh mdjiê pui, amâo mâo truh kơ klei hmăi kjham”.

Hluê si Nguyễn Quốc Hưng – Khua kiă kriê anôk bruă răng mgang dliê čar Dak Lak, ară anei, păt čiăng mâo mkrah wah ênhă dlie ti čar, knar hŏng hlăm brô 237.000ha dôk hlăm klei ênưih pui ƀơ̆ng ktang. Hlăm anăn 189.000ha jing ktang hĭn leh anăn êbeh 48.000ha dôk hlăm gưl hưn brei răng  hĭn. Kyuanăn, Êpul răng mgang dliê, phung pô dliê amâodah bruă sang čư êa dŭm să dôk kñăm kơ bruă klam gang mkhư̆, truih mdjiê klei pui ƀơ̆ng. Nguyễn Quốc Hưng mñă klă:

   “Mơ̆ng wưng êdei Tết nguyên đán truh kơ ară anei, hmei čŏng pô mkŏ mjing dŭm hdră êlan leh anăn hluê ngă hrăm mbĭt ti dŭm anôk răng mgang dliê kdriêk, 3 êpul hiu gak răng čiăng bi mguôp hŏng dŭm alŭ wăl čiăng hluê ngă bruă gang mkhư̆, truih mdjiê pui ƀơ̆ng. Boh nik, hlăm wưng không kƀah êa mơ̆ng akŏ mlan 4 anei, Anôk bruă kriê dlăng dliê čar ăt mkŏ mjing leh Êpul ksiêm dlăng lu dhar bruă čŏng ksiêm dlăng, mtrŭt mjhar phung pô dliê ti dŭm kdriêk msĕ si: Ea Sŭp, Ea Kar, M’drak, Ƀuôn Đon, Krông Bông, Lak… srăng ngă jăk bruă gang mkhư̆, truih mdjiê pui ƀơ̆ng dliê. Hmei ăt ksiêm dlăng bruă mprăp kơ mnơ̆ng yua, ai dưi mơ̆ng phung pô dliê kñăm hluê ngă dŭm hdră êlan tơdad tam mâo pui ƀơ̆ng dliê, srăng mâo dŭm hdră êlan djŏ guôp hĭn”.