Hluê anăn, hlăm wưng mơ̆ng hruê 20/11/2023 truh kơ jih hruê 29/2/2024, dŭm êpul kriê dlăng anôk mnia mblei hlăm Anôk bruă kriê dlăng anôk mnia mblei čar Dak Lak srăng ksiêm dlăng hŏng 111 êpul êya, grăp čô hlăm bruă mkra mjing, mnia mblei ti alŭ wăl čar.

Bruă ksiêm dlăng srăng kñăm kơ dŭm mta mnơ̆ng mâo klei ba yua lu hlăm wưng knhal jih thŭn leh anăn Tết nguyên đán msĕ si bêñ kẹo, sĭk, biêr, kpiê, êa mmih, hăt djŭp, mnơ̆ng điện tử, čhum ao, hdruôm jơ̆ng, hlô mnơ̆ng leh anăn dŭm mta mkra mơ̆ng hlô mnơ̆ng, phao briêng leh anăn dŭm mta boh kroh…Mbĭt hŏng anăn dŭm êpul  srăng ktuê dlăng kjăp hŏng čhĭ mnia êa săng, êa pui, amâo mâo brei klei mkăm pioh, mđĭ ênoh kñăm bi hơĭt anôk mnia mblei čiăng đru kơ wưng tết mơ̆ng mnuih ƀuôn sang.