VOV4.Êđê - Hruê mbruê, Adŭ bruă gĭt gai krĭng ƀuôn sang mrâo čar Dak Lak mkŏ mjing leh klei kƀĭn hâo hưn mđĭ hĭn klei thâo srăng bruă mơ̆ng kđi čar leh anăn yang ƀuôn kơ hdră grăp să sa mnơ̆ng dhơ̆ng OCOP.

Leh êbeh 4 thŭn hluê ngă, truh kơ ară anei, čar Dak Lak mâo 72 mta mnơ̆ng dhơ̆ng OCOP dưi tŭ yap mơ̆ng 3 – 4 mtŭ. Hŏng hdră OCOP, dưi mâo lu klei bi hmô jăk, klei ngă bruă mâo boh tŭ dưn, mbruă, kdlưn hĭn, đru mđĭ hnơ̆ng tŭ jăk, ênoh mnơ̆ng dhơ̆ng bruă lŏ hma hlăm čar. ƀiădah, hlăm wưng hluê ngă hdră brei ƀuh, dŭm hdră êlan đru kơ phung pô mnơ̆ng dhơ̆ng OCOP ka klă klơ̆ng mâo klei uêñ mĭn, klei thâo kiă kriê, mkra mjing leh anăn mnia mblei mnơ̆ng dhơ̆ng dôk mâo klei dleh kpăk, klei mlih hlăm klei mĭn mơ̆ng phung blei ba yua hŏng mnơ̆ng dhơ̆ng OCOP ka lu ôh. Wưng thŭn 2021 – 2025, čar Dak Lak bi klă, OCOP jing mnơ̆ng dhơ̆ng kñăm mđĭ kyar bruă duh mkra krĭng ƀuôn sang, jing hdră êlan leh anăn hŏng bruă klam hluê ngă hdră ala čar kñăm mkŏ mkra krĭng ƀuôn sang mrâo ti čar Dak Lak.

VOV TâyNguyên/Pô mblang: Y-Ƀel Êban