Dŭm hruê krah mlan 11, Tạ Hồng Triều, dôk ti alŭ mrô 10, ƀuôn hgŭm Ƀuôn Ama Thuôt, nao ti anôk bruă ngă hră mơar mkra anăn hlăm Hdră kkiêng kơ anak kluič mprăp mŭt hriăm gưl prŏng. Triều brei thâo, khădah tal êlâo ka thâo bĭt êlan klông, ƀiădah knuă druh Êpul bruă sa ƀăng bhă ktrâo lač klă klơ̆ng, djăp bruă dưi ngă leh ka truh mơh 10 mnĭt.

“Ară anei kâo nao ngă hră, phung knuă druh mniê ti êpul bruă sang ƀăng bhă ktrâo lač ngă ênưih mơh, knŏng yua hră kkiêng pô čiăng mkra anăn leh anăn pô čih anăn djŏ, ba kơ diñu yơh. Phung mă bruă lač dưi leh, kâo wĭt yơh, dôk guôn ảăng ba wĭt boh tŭ hluê êlan dăng kông kyua anăn kâo ƀuh jăk găl êdi.

Ngă hră bi kuôl ung mô̆ ti Anôk bruă ngă hră mơả knŭk kna ti ƀuôn hgŭm Ƀuôn Ama Thuôt, ayŏng Phan Thế Hưng lehanăn amai Nguyễn Diễm Quỳnh brei thâo, kyua diñu ngă online êlâo kyua anăn hdră msir mghaih ti anôk bruă “Sa ƀăng bhă” gơ̆ pral, jăk găl hĭn mơh. Dŭm klei bi mlih hlăm hdră ktrâo lač ngă online, tŭ mă hră mơar truh kơ hdră ngă brei ƀuh anôk bruă knŭk kna mâo lu klei bi mlih mơ̆ng hdră “kriê dlăng” truh kơ hdră “mkăp”.

“Tal êlâo kâo ngă ti hră mơar lehanăn ngă online hlăm đĭng blŭ săn dlăng mtŭk mtŭl mơh. Ƀiădah mâo knuă druh ktrâo lač, snăn klei ngă gơ̆ khuăt, pral mơh. Anei jing mta mrâo, brei ƀuh ai tiê ngă bruă dưi mkra mđĭ, pral hĭn.

          Ƀuôn hgŭm Ƀuôn Ama Thuôt, čar Dak Lak dưi bi mŭt mbĭt mơ̆ng dŭm ƀuôn hgŭm êlâo adih mâo: Thành Công, Tân Tiến, Tân Thành, Tự An, Tân Lợi leh anăn să Čư̆ Êbur (hlăm ƀuôn prŏng Ƀuôn Ama Thuôt hđăp) hŏng giăm 170 êbâo čô mnuih. Trần Thị Minh Thủy, mnuih mă bruă ti Êpul bruă sang ƀăng bhă Anôk bruă ngă hră mơar ƀuôn hgŭm Ƀuôn Ama Thuôt brei thâo, grăp hruê mâo 130 – 160 čô mnuih hriê ngă hră mơar. Čiăng msir mghaih lu bruă snăn, anôk bruă kah mbha 2 êpul, mă hlăm lam lehanăn wăl ti êngao. Mnuih ƀuôn sang mâo ktrâo lač snăn diñu ngă pral dưi mkiêt mktiêm hruê mmông hluê ngă.

Dua êpul, grăp êpul mâo 6 čô, nao đru kơ mnuih ƀuôn sang. Êpul ti tač đru mnuih ƀuôn sang ngă online, hlăm lam srăng tŭ mă, msir mghaih hră mơar. Hmei đru kơ mnuih khua thŭn, mnuih amâo jăk asei mlei, bi phung mda asei đru yua kdrăp mrâo, gơ̆ diñu pral, thâo hĭn hlăm bruă anei.

Ksiêm yap mơ̆ng Knơ̆ng bruă sang čư̆ êa čar Dak Lak, mơ̆ng hruê 1/7 truh jih mlan 10, kluôm čar tŭ mă hlăm brô 481 êbâo hră mơar hluê Mbah hâo hưn ala čar, msir mghaih hră mơar mơ̆ng čar, dŭm anôk bruă mbĭt hŏng 102 să, ƀuôn hgŭm. Hlăm ênoh anăn, êbeh 437 êbâo hră mơar, êbeh 91% dưi ngă leh. Leh hdră bi mŭt mbĭt, bruă knŭk kna alŭ wăl 2 gưl hŏng hdră ngă bruă hơĭt kjăp, bruă msir mghaih pral mơh. Hnơ̆ng sa ai mơ̆ng mnuih ƀuôn sang, anôk bruă duh mkra kơ klei anei mâo 100%, bi bruă tŭ mă msir mghaih hră mơả mâo giăm 91%, dưi tĭng dlăng bi knar hŏng kluôm ala.

Đỗ Đức Hà, Kơiăng khua knơ̆ng bruă kriê dlăng hdră bhiăn čar Dak Lak brei thâo, čiăng mđĭ boh tŭ bruă mă, mbĭt hdră mđĭ klei thâo kơ phung knuă druh, čar brei mkŏ mjing sa hdră bi hgŭm klei hâo hưn online mơ̆ng čar truh kơ nah gŭ. Đỗ Đức Hà brei thâo:  

“Dŭm anôk bruă djŏ tuôm brei mâo klei hâo hưn mbĭt, mơ̆ng klei hưn mbĭt anei brei čih mkra phần mềm kdrăp mrâo čiăng mkŏ jih jang klei hao hưn hlăm klei ngă hră mơar, mơ̆ng anăn, mnuih ƀuôn sang, anôk bruă duh mkra srăng mâo djăp ênŭm klei hâo hưn čiăng ksiêm dlăng, hluê ngă dŭm mta hră mơar djŏ tuôm hŏng pô. Mbĭt anăn, anôk bruă knŭk kna ăt mao klei hâo hưn anei čiăng msir mghaih klei ngă hră mơar hluê djŏ si klei čiăng mơ̆ng mnuih ƀuôn sang, anôk bruă duh mkra”.

Dak Lak leh bi mŭt mbĭt mâo hlăm brô 3,46 êklăk čô mnuih lehanăn 102 anôk bruă knŭk kna gưl să. Hŏng krĭng lăn prŏng, mnuih ƀiă, bruă msir mghaih hră mơar lu brei ƀuh klei gĭr prŏng mơ̆ng êpul knuă druh, mnuih mă bruă. Boh tŭ anei ăt ƀuh klă hdră bi mlih ktang phĭt mơ̆ng klei mĭn “Kriê dlăng” jing “Mkăp ngă bruă” hluê hdră êlan mtrŭn mơ̆ng Knŭk kna, leh hdră bi mŭt mbĭt./.