H’Hương H’Wing, mnuih djuê ana Êđê, ti ƀuôn M’Blô̆c B, să Krông Jing, kdriêk Mdrak, čar Dak Lak lu thŭn dơ̆ng dưi đăo knang păn khua khua bruă Đảng nah gŭ.  Mbĭt hŏng bruă hâo hưn, mtrŭt mjar mnuih ƀuôn sang hluê ngă jăk dŭm hdră kčah mtrŭn, hdră êlan mơ̆ng Đảng leh anăn knŭk kna, Amai H’Hương lŏ jing gru hmô hlăm bruă mkŏ wĭt ana pla mjing, rông mnơ̆ng, mđĭ kyar bruă duh mkra gŏ sang. Amai brei thâo, kyua nao hgŭm hlăm dŭm hdră bi hriăm mđĭ hnơ̆ng tŭ jăk kơ knuă druh krĭng mnuih ƀuôn sang, ñu dưi hriăm lu klei čih jăk, klă klơ̆ng đru klă anăp kơ bruă pô.

 “Bruă lăm lui klei ƀun ƀin hlăm ƀuôn jing bruă yuôm bhăn êdi. Hlăm ƀuôn kñăm nanao kơ hdră mtrŭt gĭt gai jing jĕ hŏng mnuih ƀuôn sang, giăm hŏng mnuih ƀuôn sang, mtô kơ mnuih ƀuôn sang mđĭ kyar bruă duh mkra, thâo dưn yua klei kreh knhâo mrâo mrang hlăm bruă rông êmô, rông ŭn. Thâo klă wưng rah mjeh, srăng ƀrư̆ ƀrư̆ đru kơ ƀuôn sang lăm lui klei ƀun ƀin”.

Kyua thâo săng klă klei hdĭp, klei bhiăn djuê ana pô, mbĭt hŏng klei jhŏng mĭn, jhŏng ngă, jhŏng đua klam, phung knuă druh đang viên mnuih djuê ƀiă dưi ngă jăk bruă klam jao kơ pô. Hluê anăn, đru răng mgang klei êđăp ênang alŭ wăl, mtrŭt mđĭ bruă bi hrŏ ƀun, mđĭ kyar bruă duh mkra ala ƀuôn hlăm alŭ wăl. Trần Hồng Tiến, khua bruă Đảng kdriêk Krông Pač brei thâo:

 “Bi hŏng phung knuă druh, hmei čuăn ruah phung mda asei mnuih djuê ƀiă ti alŭ wăl mâo klei thâo srăng ba wĭt čiăng păn ngă dŭm mta bruă kmeh gơ̆ng hlăm alŭ wăl, tal êlâo srăng dưi ƀuh hŏng klei ksiêm dlăng, bi klă hmei ƀuh diñu dưi bi leh bruă klam dưi jao leh anăn mâo mnuih ƀuôn sang đăo knang”.

Hlăm čar Dak Lak ară anei, ênoh phung knuă druh, phung mă bruă knŭk kna jing mnuih djuê ƀiă mâo hnơ̆ng 13%. Nai prĭn Nguyễn Thành Dũng, khua kiă kriê sang hră bruă kđi čar čar Dak Lak brei thâo, phung knuă druh mnuih djuê ƀiă dưi mâo klei găl čiăng hluê hriăm mđĭ klei thâo ngă bruă leh anăn klei hlăk mblang bruă kđi čar:

 “Hlăm 10 thŭn êgao, ênoh phung hriăm jing êbeh 25.000 čô, hlăm anăn phung hriăm jing mnuih djuê ƀiă mâo êbeh 4.500 čô. Anei jing boh tŭ dưn mơ̆ng sang hră đru mguôp mtô mjuăt mnuih mă bruă hnơ̆ng tŭ jăk đru kơ bruă Đảng dŭm anôk bruă mkŏ mjing êpul êya knuă đru hnơ̆ng tŭ jăk kơ anôk bruă pô tŭ dưn hĭn”.

Hluê si Lê Nam Cao, K’iăng khua êpul mkŏ mjing bruă Đảng čar Dak Lak, bi klă mkŏ mjing, mđĭ kyar êpul knuă druh, đảng viên, phung mă bruă knŭk kna jing mnuih djuê ƀiă jing bruă klam yuôm bhăn hlăm bruă knuă druh, čar nao klă hŏng Hdră mtrŭn klei kƀĭn kluôm tal 13 mơ̆ng Đảng leh anăn dŭm hdră mtrŭn hlăm alŭ wăl, hluê ngă dŭm hdră êlan hrăm mbĭt hŏng bruă ba mdah dŭm hdră êlan djŏ guôp. Klei anei mkŏ mjing boh kdrŭt ktang, rơ̆ng hluê ngă dŭmg mta kñăm kơ bruă mkŏ mjing, mđĭ kyar êpul knuă druh, đảng viên, phung mă bruă knŭk kna jing mnuih djuê ƀiă, Lê Nam Cao brei thâo:

“Mkŏ mjing dŭm mta bruă mă hlăm bruă kđi čar, hlăm anăn mđing tal êlâo kơ dŭm mta bruă kmeh gơ̆ng čiăng kơ knuă druh mnuih djuê ƀiă srăng ruah mă knuă druh mnuih djuê ƀiă. Čar ăt hluê ngă dŭm hdră êlan tiŏ nao bi hriăm kơ anka čô mnuih djuê ƀiă”.

Hluê si hdră mtrŭn bruă Đảng čar Dak Lak gưl 17, wưng thŭn 2020 – 2025, bruă mđĭ kyar êpul knuă druh, đảng viên, phung mă bruă knŭk kna jing mnuih djuê ƀiă srăng lŏ dơ̆ng mâo klei uêñ mĭn. Čar gĭr truh ti thŭn 2025, hnơ̆ng knuă druh, phung mă bruă knŭk kna jing mnuih djuê ƀiă hlăm jih jang ênoh phung knuă druh, phung mă bruă knŭk kna kluôm čar mâo 15% kơ dlông./.