VOV4.Êđê - Hlăm wưng giăm anei, hlăm kluôm ala mâo lu klei pui ƀơ̆ng ba klei amâo jăk luič liê kơ mnuih leh anăn ngăn drăp. Hlăm lu mta phŭn ngă pui ƀơ̆ng jing kyua jhat kdrăp klei pui kmlă. Gang mkhư̆ klei truh anei, dŭm anôk bruă pui kmlă Dak Lak dôk mđĭ ktang hâo hưn mtô mblang kơ mnuih ƀuôn sang dŭm hdră ba yua pui kmlă êđăp ênang, mkiêt mkriêm leh anăn gang mkhư̆ klei truh jhat kyua ksĭng mmiă wăl êlan klei pui kmlă nah dlông.

Êdah kdlưn msĕ si ti Čư̆ Kuin, hŏng bruă hâo hưn mtô mblang hlăm hdră mđung asăp dŭm să dua blư̆ sa mlan, bruă pui kmlă lŏ mbha hră mơar kơ klei yua pui kmlă êđăp ênang, mguôp hŏng klei hiu hâo hưn mtô mblang ti dŭm anôk hrui mă prăk pui, ti sang phung yua pui kmlă mrâo mkŏ dăp công tơ; bi hgŭm hŏng dŭm Anôk bruă Dang kông să mbha hră mơar hlăm hruê mbha prăk mlan kơ phung jih thŭn mă bruă grăp mlan…

Hluê anăn, mnuih ƀuôn sang dưi ktrâo lač čiăng thâo kơ klei huĭ hyưt kơ pui kmlă hlăm klei hdĭp grăp hruê leh anăn dŭm hdră gang mkhư̆ klei truh jhat msĕ si: ksiêm dlăng nanao êlan klei pui, kdrăp yua pui kmlă, anôk čŭt klei hlăm gŏ sang; mdjiê pui sĭt amâo čiăng yua; sĭt kngan msah đăm sô̆ ôh hŏng kdrăp dôk yua pui kmlă; amâo yua ôh pui kmlă čiăng gang mkhư̆ phung hiu tlĕ dăp, ƀêč ƀưi kơ kkuih, mă kan; amâo ƀhu čhum ao, yuôl mnơ̆ng hlăm êlan klei pui kmlă… Mnuih ƀuôn sang ăt dưi hâo hưn čiăng rơ̆ng êlan klei pui, msĕ si: amâo đĭ ti gơ̆ng pui kmlă amâodah mŭt hlăm wăl răng mgang êđăp ênang hdră bruă pui kmlă; amâo phưi hla giăm êlan klei kmlă; amâo mkŏ dăp mnơ̆ng dhơ̆ng amâodah pla ana kyâo soh kơ boh kbưi êđăp ênang kơ klei pui…

H’ Zawut  pô mblang