Dak Lak ară anei mâo 2 hdră bruă FDI kyua pô duh bi liê Japon hlue ngă. Êngao anăn, anôk bruă bi hgŭm Japon (JICA) đru leh kơ čar Dak Lak ngă 21 hdră bruă, hdră bruă ODA hŏng ênoh prăk êbeh 24 êklăk đôlar Mi, kƀĭn hlăm bruă pui kmkă, êlan klông, mkăp êa leh anăn knơ̆ng kdơ̆ng êa. Mơ̆ng thŭn 2001 truh ară anei, čar tŭ mă leh 22 ênoh đru êngao knŭk kna mơ̆ng 3 pô bi liê mơ̆ng Japon hŏng ênoh êbeh 1 êklăk 6 êtuh êbâo đôlar Mi. Dŭm anôk bruă duh mkra mơ̆ng Dak Lak ară anei ba čhĭ kơ Japon lu mta mnơ̆ng msĕ si kphê asăr, kphê mnăm, hlĭn hnuê, cacao, măk ka.

Hlăm 5 thŭn êgao, Êpul bi hgŭm Việt Nam-Japon čar Dak Lak mkŏ, iêô jak đru êngao knŭk kna hŏng ênoh bi liê giăm 4 êklai 600 êklăk prăk. Hlăm klei bi kƀĭn, Êpul hgŭm Việt Nam – Japon čar Dak Lak wưng 2023-2028 bi mklă, hlăm wưng kơ anăp, Êpul hgŭm kƀĭn mđĭ klei hâo hưn hŏng tač êngao, mđĭ boh tŭ dŭm bruă ngă klei êđăp ênang, bi hgŭm Việt Nam- Japon ti alŭ wăl, lŏ dơ̆ng mđĭ klei tŭ dưn dŭm bruă đru êngao knŭk kna mơ̆ng ala tač êngao./.