VOV4.Êđê - Mâo lu klei găl dưi čiăng mđĭ kyar, ƀiădah truh kơ ară anei bruă hiu čhưn ênguê ti čar Dak Lak ăt dôk kbưi mkă hŏng klei hmăng hmưi. Čar dôk gĭr pŏk phai klei bi mguôp, wăt kơ hlăm leh anăn êgao čar čiăng mkŏ mjing ai dưi kơ bruă hiu čhưn ênguê đĭ kyar.

Quảng Bình jing sa hlăm dŭm čar mrâo mkŏ hiu čhưn ênguê hŏng Dak Lak kyua dŭm klei msĕ kơ wăl čư̆ čhiăng, êa krông. Giăm anei, 2 čar bi trông leh lu boh phŭn kơ klei ksiêm hriăm anôk hiu čhưn ênguê, pŏk êlan phiơr Đồng Hới - Ƀuôn Ama Thuôt leh anăn lu boh phŭn bi hgŭm mkăn hlăm 5 thŭn kơ anăp. Đặng Đông Hà, K’iăng Khua Knơ̆ng bruă hiu čhưn ênguê Quảng Bình lač, Dak Lak leh anăn Quảng Bình mâo sa klei čang hmăng mđĭ kyar bruă hiu čhưn ênguê mtah, msei msăn, ƀiădah ăt mâo lu klei mdê hĭn čiăng mđĭ lar, mkŏ mjing anăn knăl hiu čhưn ênguê mâo ênoh yuôm: “Mbĭt hŏng bruă mkŏ mjing mnơ̆ng dhơ̆ng hiu čhưn ênguê snăn mđĭ ktang bruă hưn mdah leh anăn bi hgŭm. Ară anei snăn bruă bi mlih mrô, hưn mdah, bi hgŭm, marketing jing yuôm bhăn snăk. Leh anăn klei knhal tuič jing dŭm anôk bruă duh mkra ăt pral leh anăn mâo anôk bruă kriê dlăng knŭk kna ăt mđĭ ktang bruă kriê dlăng knŭk kn amơ̆ng pô čiăng kriê dlăng ngăn dŏ hiu čhưn ênguê, mbĭt anăn ăt mjing klei găl kơ dŭm anôk bruă duh mkra mđĭ kyar hiu čhưn ênguê jăk hĭn.

Êlâo anăn, hlăm mlan 3/2022, Knơ̆ng bruă dhar kreh - mjuăt ktang asei mlei leh anăn hiu čhưn ênguê čar Dak Lak bi hgŭm leh hŏng Knơ̆ng bruă hiu čhưn ênguê čar Khánh Hoà mkŏ mjing klei bi trông mđĭ kyar, hưn mdah leh anăn mkŏ mnơ̆ng dhơ̆ng hiu čhưn ênguê. Nguyễn Thị Lệ Thanh,  Khua Knơ̆ng bruă hiu čhưn ênguê čar Khánh Hoà brei thâo: jih 2 čar mâo klei găl hjăn čiăng mđĭ kyar dŭm mta mnơ̆ng dhơ̆ng hiu čhưn ênguê, tơdah msĕ si Khánh Hoà dưi mâo klei găl kơ hiu čhưn ênguê hlăm êa ksĭ snăn Dak Lak lŏ êdah êdi hŏng hiu čhưn ênguê hlăm wă; hdĭp mda, čư̆ dliê jăk siam. Anei ăt jing klei bi đru jăk kơ jih dua čar, dưi mjing tuôr lu jơr kơ mnơ̆ng dhơ̆ng hiu čhưn ênguê hŏng klei hiu čhưn jak iêô lu tuê. “Hmei srăng gĭt gai dŭm knơ̆ng bruă hiu čhưn ênguê ăt msĕ mơh bi hgŭm hŏng Êpul hgŭm hiu čhưn ênguê Nha Trang – Khánh Hòa bi mkŏ čiăng hlue ngă klei bi hgŭm krĭng, bi blŭ hrăm nanao, mâo hdră ksiêm wĭt čiăng mă klei hriăm. Mơ̆ng tur knơ̆ng anăn Knơ̆ng bruă hiu čhưn ênguê ăt srăng kƀĭn klei blŭ mguôp leh anăn mâo dŭm bruă pŏk ngă čiăng mâo klei tŭ dưn hĭn kơ btuă klam mđĭ kyar krĭng plah wah Khánh Hoà leh anăn Dak Lak.”

Hŏng dŭm klei găl čư̆ êa jăk siam, Dak Lak lŏ jing wăl krah Lăn Dap Kngư, găl čiăng mkŏ bruă hiu čhưn ênguê hŏng dŭm čar hlăm krĭng wăl, boh nik hŏng čar Lâm Đồng, alŭ wăl dưi mkŏ mjing leh anăn knăl hiu čhưn ênguê hing ang. Nguyễn Thị Bích Ngọc, K’iăng Khua Knơ̆ng bruă dhar kreh - mjuăt ktang asei mlei leh anăn hiu čhưn ênguê Lâm Đồng brei thâo, dua čar dôk gĭr msir mgaih klei gun kpăk kơ êlan klông, čiăng kơ bruă hiu čhưn ênguê klă sĭt dưi mkŏ: “Ară anei mơ̆ng Lâm Đồng truh Dak Lak hlăm brô 200 km, êlan dleh dlan. Dua alŭ wăl dôk kčĕ hdră bruă mkŏ mjing êlan dơ̆ng êran pral mơ̆ng Lâm Đồng truh Dak Lak, mơ̆ng anăn mkŏ hŏng dŭm čar Lăn Dap Kngư. Leh anăn čang hmăng hnưm dưi mkra mđĭ mbĭt anăn mkra mrâo êlan klông, mjing klei găl jăk hĭn kơ tue ehiu čhưn hŏng 5 čar Lăn Dap Kngư. Sa bruă mkăn jing mkŏ mkra sa hnơ̆ng kčah sa anăn kơ bruă hiu čhưn hnơ̆ng jăk, mbĭt anăn mkŏ mjing hnơ̆ng kčah čiăng ksiêm dlăng kơ bruă hiu čhưn ênguê mơ̆ng pô”.

Hlue si Đặng Gia Duẩn, K’iăng Khua Knơ̆ng bruă dhar kreh - mjuăt ktang asei mlei leh anăn hiu čhưn ênguê Dak Lak, hŏng 49 djuê ana dôk hdĭp mda ti čar, Dak Lak mâo sa bruă dhar kteh lu jơr, lu mta leh anăn jăk siam. Hlăm wưng êgao, čar mâo lu hdră bruă klă klơ̆ng djŏ tuôm kơ mđĭ kyar hiu čhưn ênguê, răng kriê leh anăn mđĭ lar ênoh yuôm dŭm anôk hiu čhưn ênguê ăt msĕ mơh Hdră mtrŭn kơ bruă răng mgang dhar kreh čing čhar. Klei bi kƀĭn Đảng tal 17 mơ̆ng čar ăt bi mklă mđĭ kyar hiu čhưn ênguê jing sa hlăm dŭm bruă klam phŭn. Anei ăt jing hdră êlan tur knơ̆ng čiăng bi mguôp mđĭ kyar dhar kreh hŏng mđĭ kyar hiu čhưn ênguê ti čar. Đặng Gia Duẩn lač: “Hmei srăng gĭr hlue ngă dŭm bruă mđing, dŭm hdră mâo, ti anôk nao dưi mđĭ lar jăk ƀiădah iêô mthưr tuê hiu čhưn snăn srăng mđing duh bi liê, iêô jak ƀrư̆ hruê ƀrơ̆ lu tuê hiu čhưn leh anăn lu phŭn duh bi liê hlăm čar mơ̆ng dŭm bruă ngă anăn. Bi Dak lak mdê hjăn hŏng dŭm alŭ mkăn kơ ya mta? Snăn anăn jing knhuah dhar kreh mnuih djuê ƀiă ti čar, hlăm anăn mâo lu djuê ana mâo knhuah dhar kreh jăk siam leh anăn bi mguôp hŏng klei mđĭ kyar hiu čhưn ênguê, čiăng hmei čang hmăng mâo phŭn duh bi liê mơ̆ng mđĭ kyar hiu čhưn ênguê, ñu srăng đru mguôp yuôm bhăn hlăm GDP mơ̆ng čar hlăm wưng kơ anăp.”

Hŏng lu klei găl čiăng mđĭ kyar lu mta hiu čhưn ênguê, Dak Lak dôk mâo klei ngă čiăng ba yua leh anăn mđĭ kyar hiu čhưn ênguê hŏng klei ktang. Hlăm anăn, bruă mđĭ ktang klei mkŏ, bi hgŭm hŏng dŭm čar, ƀuôn prŏng hlăm kluôm ala dưi čang hmăng srăng mjing klei đĭ kyar kơ bruă hiu čhưn ênguê, đru kơ bruă tuh tia mkra mjing amâo mâo asăp pui dưi mjing lu ênoh yuôm hĭn kơ klei mđĭ kyar bruă duh mkra, ala ƀuôn ti alŭ wăl./.

H’ Zawut pô mblang