VOV4.Êđê- Dak Lak brei kƀĭn ruh mgaih klei gun kpăk čiăng mđĭ pral brei čan prăk knŭk kna. Anei jing klei Êpul gơ̆ng bruă ƀuôn sang čar kčah hlăm Klei bi kƀĭn Êpul gơ̆ng bruă ƀuôn sang čar tal 4, gưl X, wưng 2021-2026 mphŭn pŏk hruê mbruê 13/7.

Mbĭt hŏng bruă ksiêm dlăng kơ boh klei, klei tŭ hlue ngă hdră kčah mđĭ kyar bruă duh mkra- ala ƀuôn, klei êđăp ênang 6 mlan akŏ thŭn leh anăn dŭm bruă klam msir mgaih boh phŭn 6 mlan knhal jih thŭn, hlăm klei bi kƀĭn anei, Êpul gơ̆ng bruă ƀuôn sang čar Dak Lak srăng bi trông, bi mklă lu hdră mtrŭn yuôm bhăn msĕ si: Hdră mtrŭn kčah kơ bruă mđĭ prăk jia hŏng bruă rŭ dmơ̆ng ti čar; Hdră mtrŭn kčah hnơ̆ng hrui mă prăk hŏng dŭm mta bruă leh anăn prăk kčah kơ bruă mkra mđĭ hdră duh bi liê dŭm hdră bruă đru mđĭ kyar krĭng knông lăn - Hdră bruă đơđiêt čar Dak Lak; Hdră mtrŭn kčah kơ klei bhiăn, hnơ̆ng mbha prăk knŭk kna ngă hdră kñăm ala čar mđĭ kyar bruă duh mkra- ala ƀuôn krĭng mnuih djuê ƀiă leh anăn krĭng čư̆ čhiăng, wưng thŭn  2021 – 2030.

Pô mblang: H’Zawut Ƀuôn Yă