Tlam 23/10, hlăm Klei bi kƀĭn tal 2 Anôk dlăng bruă Đảng čar Dak Lak, Khua dlăng bruă Đảng čar Lương Nguyễn Minh Triết mñă klă klei čiăng bi mklă bruă klam phŭn, lač kơ klei êdah êdi mơ̆ng wưng păn bruă 2025–2030. Hưn mdah hlăm klei bi kƀĭn brei ƀuh, mơ̆ng akŏ thŭn truh kơ ară anei, GRDP ti čar đĭ giăm 7%; ênoh prăk hrui wĭt ba čhĭ kơ ala tač êngao mâo êbeh 2,3 êklai USD, đĭ 37,8% mkă hŏng wưng anei thŭn dih.

Ênoh hrui wĭt prăk knŭk kna đăo tĭng mâo giăm 12 êbâo êklai prăk, mâo 97% hdră mĭn tĭng Gưl dlông jao. Anôk dlăng bruă Đảng čar mkŏ mjing Hdră ngă bruă mơ̆ng Klei bi kƀĭn hlue si ai tiê “6 klei bi klă: Klă bruă klam, klă bruă, klă mnuih, klă bruă klam, klă wưng mmông leh anăn klă mnơ̆ng dhơ̆ng ba čhĭ”. Khua dlăng bruă Đảng čar Dak Lak mtă kơ dŭm anôk bruă mjêč bi leh klei Čuăl mkă čar, ksiêm dlăng anăn knăl hdră mđing, phŭn prăk hlue ngă. Hlăm anăn, mđĭ kyar bruă mkŏ dliê kmrơ̆ng - êa ksĭ ktuê êlan dơ̆ng ala čar mrô 29 dưi bi mklă jing hdră bruă phŭn, mâo klei bi knăl kơ wưng păn bruă.