VOV4.Êđê - Hŏng bruă ngă klă sĭt msĕ si klei đru kơ sang dôk; tŭ klei kriê dlăng, rông ba phung amĭ Việt Nam jhŏng ktang jih klei hdĭp, êmuh hrăm mđĭ ai klei hdĭp ai tiê mnơ̆ng dhơ̆ng… đru bi juh klei ênguôt hnĭng kyua klei blah ngă, đru kơ gŏ sang knŭk kna dlăng ba, phung mâo ai krŭ kdơ̆ng ti čar Dak lak mâo klei hdĭp ƀrư̆ jăk siam hĭn.

Hlăm sa boh sang mrâo mkra ăt dôk mnâo êa mil mrsâo leh mia, aduôn Lê Thị Tường Vân ti wăl krah Quảng Phú, kdriêk Čư̆ Mgar, čar Dak Lak m’ak brei thâo: Mlan 3 leh êgao, gŏ sang ñu mâo đru 50 êklăk prăk, mnuih ƀuôn sang, găp djuê, pô lu pô ƀiă lŏ brei mañ, ñu dưi mkra leh sa boh sang. Ară anei, ayŏng ñu amâo jăk asei mlei mâo leh anôk dôk prŏng hĭn čiăng mdrao klei ruă, anôk ngă yang kơ Ama diñu djiê hlăm klei bi blah hŏng Mi ăt jăk hĭn mơh. “Gŏ sang kâo dleh dlan mơh. Mă bruă rông ayŏng knap êdi, mâo knŭk kna đru mkra sang m’ak êdi. Lač jăk kơ Adŭ bruă kahan êka êkeh đru leh kơ hmei.

Mbĭt hŏng bruă mkra sang khăp čiăng, hdră mđing dlăng kơ gŏ sang knŭk kna dlăng ba, mnuih mâo bruă tŭ dưn ăt mâo kdriêk Čư̆ Mgar mđing dlăng hluê ngă tŭ dưn. Bùi Đức Khương, Kahan êka êkeh 3/4 ti thôn 2B, xã Ea M’nang brei thâo, êngao klei đru; bruă Đảng, bruă sang čư̆ êa lehanăn êpul êya bruă kreh nao čuă êmuh, mđĭ ai wăt kơ mnơ̆ng dhơ̆ng lehanăn ai tiê klei mĭn. “Dlăng kluôm anak čô kâo hriăm hră m’ar tŭ dưn ăt mâo knŭk kna đru jing anak kahan êka êkeh êdei anei knŭk kna ăt đru dưn lu hdră jăk găl mơh. Amâo djŏ knŏng gŏ sang kâo, lu sang kahan êka êkeh, djiê êngiă lehanăn gŏ sang mnuih mâo bruă tŭ dưn snăn Adŭ bruă kahan êka êkeh lehanăn yang ƀuôn ăt mđing êdi. Tơdah ruă duam, dleh dlan, pưk sang tuôm hŏng angĭn êbŭ, êa lip mâo nanao êpul hriê đru.

Kdriêk Čư̆ Mgar ară anei mâo êbeh 3 êbâo čô mâo bruă tŭ dưn hŏng Cách mạng; 5 čô Amĭ Vịêt Nam Jhŏng ktang. Nguyễn Hồng Minh, Khua Adŭ bruă mnuih mă bruă, kahan êka êkeh, yang ƀuôn kdriêk Čư̆ Mgar brei thâo, dŭm gưl bruă, bruă sang čư̆ êa dŭm gưl mđing êdi kơ bruă hluê ngă hdră mtrŭn jăk găl kơ mnuih mâo bruă tŭ dưn hŏng cách mạng. “Truh ară anei păt čiăng jih gŏ sang knŭk kna dlăng ba ti alŭ wăl mâo hnơ̆ng hdĭp kah knar amâo dah đĭ hĭn hnơ̆ng kah knar kluôm ti alŭ wăl, dŭm hdră mtrŭn kơ mnuih mâo bruă tŭ dưn dưi hluê ngă djăp ênŭm, djŏ si klei kčah mtrŭn, boh nik hdră đru prăk kăk dưi truh ti kiê kngan mnuih mâo bruă tŭ dưn”.

Kluôm čar Dak Lak mâo êbeh 45 êbâo čô mnuih mâo bruă tŭ dưn hŏng cách mạng. Hdră mđing dlăng kriê klei hdĭp mnơ̆ng dhơ̆ng lehanăn ai tiê kơ dŭm gŏ sang knŭk kna dlăng ba, mnuih mâo bruă tŭ dưn mâo nanao knŭk kna mđing dlăng. Mbĭt hŏng bruă hluê ngă jăk hdră mtrŭn mơ̆ng Đảng, Knŭk kna, hlăm 5 thŭn giăm anei, dŭm alŭ wăl hlăm čar hluê ngă leh jăk hdră dlăng kriê, đru prăk kăk lŏ krŭ wĭt, mkra mrâo, mkra wĭt pưk sang kơ mnuih hlăm gŏ sang knŭk kna dlăng ba êbeh 70 êklai prăk.

Hluê si Nguyễn Quang Thuân, K’iăng khua knơ̆ng bruă mnuih ngă bruă kahan êka êkeh lehanăn yang ƀuôn čar Dak Lak, khădah hdră dlăng kriê kơ mnuih mâo bruă tŭ dưn, gŏ sang knŭk kna dlăng ba dưi mtrŭt mđĭ hlăm dŭm thŭn êgao, ƀiădah ka dưi ngă kluôm ênŭm mơh. Ti alŭ wăl čar ăt dôk 165 gŏ êsei ƀun jing gŏ sang knŭk kna dlăng ba, giăm 1 êbâo čô mâo bruă tŭ dưn dôk dleh dlan kơ sang dôk. Nguyễn Quang Thuân mñă klă, dŭm klei kpăk đuôm anei srăng dưi msir mghaih hlăm wưng hnưm êdi: “Ti anăp anei srăng mâo hdră ksiêm dlăng grăp gŏ êsei, grăp alŭ wăl, tal sa jing kƀah sa hnơ̆ng čuăn, tơdah gŏ sang anăn amâo lŏ dưi mă bruă srăng akâo kơ Phŭn bruă bi mlih jing gŏ sang čiăng klei đru mơ̆ng yang ƀuôn kñăm dưi dưn hdră mtrŭn lehanăn gĭr truh thŭn 2022 srăng msir mghaih 165 gŏ êsei ƀun, ti ya anôk kƀah ya hnơ̆ng čuăn srăng đru mjing klei găl tlaih kơ ƀun. Hŏng dŭm gŏ sang dleh dlan kơ sang dôk srăng gĭr jih thŭn 2023 msir mghaih klei kơ sang dôk kơ mnuih mâo bruă tŭ dưn ti alŭ wăl čar.

Ti krĭng Lăn dap kngư dôk lu dleh dlan, dŭm bruă ngă klă sĭt mơ̆ng dŭm gưl dhar bruă ti čar Dak Lak wưng êgao đru mguôp mđĭ mlih leh klei hdĭp mnơ̆ng dhơ̆ng, ai tiê klei mĭn kơ dŭm gŏ sang knŭk kna dlăng ba, mnuih mâo bruă tŭ dưn hŏng cách mạng, hluê ngă klei bhiăn “Mnăm êa hdơr kơ akŏ” mơ̆ng djuê ana drei./.