Hruê 19/5/2024 jing sa hruê năng hdơr hŏng Y Jer Kpor, hđeh sang hră adŭ 12, sang hră gưl 3 Nguyễn Bỉnh Khiêm, kdriêk Krông Pač, čar Dak Lak tơdah ƀuăn rơ̆ng ti gŭ hla čhiăm gru Đảng. Y Jer Kpơr brei thâo, hdră ksiêm hriăm hƀuê ênuk Đảng, kơ gru hmô phung đảng viên cách mạng kjăp ktang leh anăn dôk hlăm êpul Đảng, Y Jer ktưn hưn, gĭr mtô mjuăt dơ̆ng, jing mnuih ƀuôn sang jăk, đảng viên bi hmô čiăng đry kơ ƀuôn sang:

“Tal êlâo snăn pô dôk jing hđeh mrâo, jing sa čô đảng viên mrâo, anăn tal êlâo brei mđĭ kyar pô čiăng jing sa čô đảng viên jăk hĭn, čiăng êdei anei pô hriê kơ prŏng hriăm lu lŏ wĭt kơ ƀuôn sang pô, đru mđĭ kyar bruă duh mkra, dhar kreh leh anăn lui hĕ klei amâo jăk hmăi kơ ƀuôn sang pô.”

Ăt ktưn hưn dôk hlăm êpul Đảng hlăm gưl bi hdơr 134 thŭn Hruê kkiêng kơ Khua gĭt gai Hồ Chí Minh, leh mrâo dưi mŭt hlăm Sang hră gưl prŏng duh mkra Hồ Chí Minh, Trần Phan Tường Vy hơ̆k mơak leh anăn ktưn hưn snăk. Tường Vy brei thâo, bruă dưi mŭt Đảng đru ñu thiăm ai ktưn lŏ dơ̆ng gĭr, mtô mjuăt hlăm dŭm thŭn hriăm gưl prŏng kơ anăp.

“Dưi mŭt hlăm êpul Đảng Cộng sản Việt Nam snăn kâo ƀuh pô đua klam hĭn, hŏng bruă klam jing sa čô đảng viên srăng gĭr hĭn grăp hruê, čiăng bi hriăm pô jăk hĭn, mă bruă kơ lăn čar”

 Hlue si nai Nguyễn Thị Mai Phương –  K’iăng Khua dlăng bruă Đảng, Khua sang hră gưl 3 Nguyễn Bỉnh Khiêm, kdriêk Krông Pač, čar Dak Lak, hlăm dŭm thŭn giăm anei, bruă mđĭ kyar Đảng hŏng phung hđeh sang hră mâo sang hră mđing leh anăn mâo boh tŭ dưn jăk. Mơ̆ng thŭn 2020 truh ară anei, sang hră bi mŭt leh hlăm Đảng 19 čô hđeh sang hră êdah êdi:

“Mơ̆ng thŭn 2019 Anôk mkŏ mjing bruă Đảng kdriêk ktrâo lač mđĭ kyar đảng viên hlăm gưl hđeh sang hră snăn bruă đảng hmei mđing snăk kơ bruă anei leh anăn hmei kčah hđeh sang hră dưi hưn mthâo hriăm mbŏ đảng čiăng jing đảng viên snăn klei tal êlâo jing brei phung hđeh thâo, knuih hdĭp jăk. Hmei mâo dŭm mta klei jăk lehh snăn srăng jao kơ Êpul êdam êra lŏ dơ̆ng hriăm mbŏ leh anăn kơ phung hđeh hgŭm hlăm lu hdră čiăng thâo ƀuh lu klei phung hđeh thâo.”

Wưng 2020 – 2025 bruă Đảng kdriêk Krông Pač gĭr bi mŭt đảng 100 čô ti dŭm sang hră gưl 3 leh anăn Anôk bruă sang hră mtô bi hriăm jêñ jêñ. Yap truh mkan 6 thŭn 2024, bruă Đảng kdriêk Krông Pač mđĭ kar leh 83 čô đảng viên mrâo jing phung êdah êdi dôk hriăm ti dŭm sang hră gưl 3 ti kdriêk. Hlăm anăn, thŭn 2023 bi mŭt 25 čô hđeh sang hră; 6 mlan akŏ thŭn 2024 mâo 29 čô hđeh sang hră dưi bi mŭt. Trần Hồng Tiến –  Khua dlăng bruă Đảng kdriêk Krông Pač, čar Dak Lak brei thâo, bruă mđĭ kyar đảng viên hlăm dŭm snag hră đru kơ hđeh mŭt đảng viên ti kdriêk. Tơdah wĭt kƀĭn hŏng êpul bruă đảng ti alŭ wăl snăn phung hđeh mâo bruă đảng nah gŭ lŏ dơ̆ng mtô, hriăm mbŏ čiăng jing phung êdah êdi:

“Mđĭ kyar Đảng tinei amâo djŏ knŏng jing mđĭ kyar kơ bruă đảng mơ̆ng kdriêk ôh ƀiădah mđĭ kyar kơ Êpul bruă Đảng. Duah kơ êpul bruă Đảng phung đảng viên êdah êdi. Ară anei tơdah drei dưi ruah phung êdam êra êdah êdi, hriăm thâo ti dŭm sang hră čiăng mđĭ kyar đảng, leh anăn hưn mthâo phung hđeh mŭt hlăm dŭm sang hră Gưl prŏng čiăng lŏ dơ̆ng đru snăn mâo phung hđeh sinh viên jing đảng viên. Leh anăn leh digơ̆ ruĕ hriăm nao mă bruă hlăm dŭm anôk bruă snăn drei mâo leh phung đảng viên êdah êdi snăn.”

 Bruă mkŏ mjing bi mŭt Đảng viên hlăm sang hră gưl 3 ti kdriê Krông Pač, čar Dak Lak jing klei thâo ƀuh, tŭ yap klei gĭr mơ̆ng phung hđeh êdah êdi, mjing klei găl mđĭ kyar Đảng hlăm êpul phung mda asei, đru mđĭ hnơ̆ng jăk êpul đảng viên leh anăn mbŏ phung mă bruă mrâo, hnơ̆ng jăk kơ Đảng./.