Hlăm mmông mă bruă, bruă sang čư̆ êa čar Dak Lak hưn mdah leh 18 boh klei djŏ tuôm hŏng klei dleh dlan, kpăk gun hlăm bruă kriê dlăng mơ̆ng knŭk kna kơ ngăn dŏ leh anăn wăl hdĭp mda. Hlăm anăn, klei dleh kpăk hĭn jing bruă kriê dlăng lăn ala mâo phŭn mơ̆ng lăn đang lŏ hma dliê kyâo. Kdrăp čih pioh kơ lăn dliê ka kluôm dhuôm, ka hrăm mbĭt hŏng klei čih pioh kơ lăn ala. Lu ênhă lăn mâo phŭn mơ̆ng đang lŏ hma dliê kyâo jao wĭt kơ alŭ wăl ară anei ăt kyua mnuih ƀuôn sang gưl să ksiêm dlăng, ka mâo pô kriê dlăng klă sĭt, lu ênhă mâo klei ksĭng mmiă. Mơ̆ng anăn, ngă truh klei dleh dlan kơ alŭ wăl hlăm bruă ba lăn yua hlăm hdră čuăl mklă, hdră kčah. Bruă sang čư̆ êa čar Dak Lak mkŏ mjing leh hdră êlan kluôm hlăm bruă kriê dlăng, yua lăn mâo phŭn mơ̆ng đang lŏ hma kyâo dliê hưn mdah hŏng Phŭn bruă ngăn dŏ leh anăn wăl hdĭp mda leh anăn dŭm anôk bruă gưl dlông ƀiădah truh kơ ară anei ka dưi ksiêm dlăng, gĭt gai. Nguyễn Thiên Văn, k’iăng Khua bruă sang čư̆ êa čar Dak Lak lač klă boh sĭt:

“Klei ksĭng mmiă, bi kčŭt hưn, mjhĭk mtŭl kyua lăn ala ti dŭm hdră đang lŏ hma dliê kyâo leh anăn dŭm knơ̆ng bruă đang lŏ hma dliê kyâo ti alŭ wăl ăt dleh dưi ksiêm dlăng. Bruă mgaih msir klei bi mmiă, kčŭt hưn leh anăn hrui wĭt lăn đang dliê kyâo mâo klei ksĭng mmiă tuôm hŏng lu klei dleh dlan, ka mâo hdră êlan tur knơ̆ng čiăng mgaih msir jih hnơ̆ng.”

Mbĭt hŏng klei dleh dlan, kpăk gŭn djŏ tuôm hŏng bruă kriê dlăng lăn đang lŏ hma dliê kyâo, bruă sang čư êa čar Dak Lak ăt lač klă lu boh klei čiăng mâo Phŭn bruă ngăn dŏ leh anăn wăl hdĭp mda mbĭt hŏng dŭm anôk bruă gưl dlông ksiêm dlăng, mgaih msir. Êdah êdi jing êjai hdră bhiăn djă yua lăn 2024 ka klă sĭt dưi dưn yua, bruă dưn dŭm klei čuăn hdră bhiăn djă yua lăn 2013 leh anăn dŭm hdră hră mơar ti gŭ hdră bhiăn dôk mâo đa đa klei dleh kpăk, klei ka bi djŏ, čiăng mâo klei ksiêm dlăng, mtô lač, mgaih msir. Hnơ̆ng čuăn ba yua lăn mơ̆ng čar Dak Lak truh ti thŭn 2025 mâo Khua knŭk kna mkăp hlăm Klei bi klă mrô 326 thŭn 2022 ka djăp ênŭm klei čiăng hlăm boh sĭt. Hdră bhiăn mnơ̆ng gŭ lăn leh anăn dŭm hră mơar mtô kơ klei ngă hră mơar brei klei dưi mă mnơ̆ng gŭ lăn ăt dôk dleh dưi ksiêm dlăng, dôk bi kdung, ka găl guôp hŏng lu mta mnơ̆ng gŭ lăn ngă mnơ̆ng yua rŭ mjing, boh nik jing mă lăn hli dơr…

Blŭ bi klă hlăm mmông mă bruă, Khua phŭn bruă ngăn dŏ leh anăn wăl hdĭp mda Đặng Quốc Khánh brei thâo, Êpul ngă bruă mơ̆ng phŭn bruă mă bruă hŏng dŭm čar kñăm ruh mgaih klei dleh dlan, kpăk gun kơ alŭ wăl. Mbĭt anăn, mă klei blŭ mguôp mơ̆ng dŭm alŭ wăl čiăng hnưm mkŏ mjing, bi klă Hdră mtrŭn ba hdră bhiăn djă yua lăn thŭn 2024 hlăm klei hdĭp. Anei jing hdră bhiăn mâo boh tŭ yuôm hŏng klei hdĭp, yang ƀuôn. Hlăm anăn, Khua phŭn bruă mñă kơ čar Dak Lak čiăng čŏng pô, hur har hluê ngă hnưm mkŏ mjing hră hưn ênoh lăn, klei čih pioh lăn ala čiăng kơ êla hdră bhiăn mâo klei dưi srăng dưi dưn mtam. Mbĭt anăn, čar srăng mđing mgaih msir dŭm klei dôk mâo mơ̆ng Knơ̆ng bruă ngăn dŏ leh anăn wăl hdĭp mda dưi ngă mtam, năn jing hră tŭ yap klei dưi yua lăn kơ mnuih ƀuôn sang hdĭp hơĭt kjăp, amâo mâo klei bi mmiă, amâo mâo ngă soh hŏng hdră bhiăn lăn čar.

Bi hŏng boh klei hlơr hĭn jing lăn đang lŏ hma dliê kyâo, Khua phŭn bruă Đặng Quốc Khánh mñă kơ čar Dak Lak srăng ksiêm dlăng jih jang leh anăn ksiêk mbha čiăng kơ truh mmông Hdră bhiăn djă yua lăn 2024 dưi dưn srăng dưi mgaih msir mtam ti lu ênhă lăn. Khua phŭn bruă mñă ktang bruă bi kna boh tŭ mơ̆ng mnuih ƀuôn sang leh anăn knơ̆ng bruă hlăm boh klei lăn đang lŏ hma dliê kyâo:

         “Mñă kơ bruă sang čư êa čar, Êpul khua bruă Đảng čar gĭt gai ksiêm dlăng jih jang ênhă lăn đang lŏ hma dliê kyâo. Êlâo dih ba lăn mơ̆ng mnuih ƀuôn sang mŭt hlăm lăn đang lŏ hma dliê kyâo, ară anei êjai ngă cổ phần mâo klei mnuih ƀuôn sang hŏng pô đang dliê kyâo, knơ̆ng bruă bi mmiă. Kyuadah êjai ngă cổ phần, êjai ngă hdră êlan mlih yua lăn amâo mâo klă, amâo mâo mkă klă, amâo mâo ênhă, prŏng prĭn leh anăn mâo klei bi mmiă hŏng hdơ̆ng pô. Kâo mñă brei ksiêk mbha. Mnuih mă bruă ăt jing mnuih ƀuôn sang pô, diñu dôk tinăn dŭm pluh thŭn leh, ya ngă drei ngă dleh dlan. Drei srăng bi kna boh tŭ mơ̆ng mnuih ƀuôn sang, mơ̆ng knơ̆ng bruă leh anăn hƀuê ênuk. Hdră bhiăn dưi dưn, lăn ala mơ̆ng đang lŏ hma dliê kyâo ƀiădah mnuih ƀuôn sang hdĭp hơĭt mơ̆ng thŭn 2004, wăt lăn mkra mjing, lăn dôk mkăp brei kơ mnuih ƀuôn sang. Bi ênhă lăn dôk bi mmiă srăng lŏ hlăk mblang si ngă hƀuê ênuk ñu. Ya dŏ dưi ngă hluê si hdră bhiăn diih srăng ngă êlâo.”

            Khua Phŭn bruă ngăn dŏ leh anăn wăl hdĭp mda ăt mñă kơ čar Dak Lak mđĭ hĭn bruă ksiêm dlăng mơ̆ng knŭk kna kơ mnơ̆ng gŭ lăn, êa jua, mgaih msir djah djâo, mnuih mă bruă kơ bruă ngăn dŏ leh anăn wăl hdĭp mda êjai anăp anei srăng mbha gưl truh 70% bruă knuă mơ̆ng gưl phŭn bruă kơ čar. Khua phŭn bruă ăt mñă kơ čar Dak Lak mđing hĭn kơ bruă gang mkhư̆ klei pui ƀơ̆ng dliê hlăm yan bhang anei, êjai mâo dŭm klei bi knăl brei ƀuh yan bhang thŭn anei amâo mâo jăk êdi./.