VOV4.Êđê -  Tlam mbruê 15/6, bruă Đảng čar Dak Lak mkŏ jing leh klei kƀĭn ksiêm wĭt bruă hluê ngă hdră mtrŭn mrô 10/2002 mơ̆ng phŭn bruă kđi čar kơ klei đĭ kyar bruă duh mkra ala ƀuôn, rơ̆ng bruă lĭng kahan, klei êđăp ênang krĭng Lăn Dăp Kngư wưng thŭn 2001 -2010 leh anăn klei bi klă mrô 12/2011 mơ̆ng phŭn bruă kđĭ čar gưl 11 kơ bruă lŏ dơ̆ng hluê ngă hdră mtrŭn mrô 10/2002 mơ̆ng phŭn bruă kđi čar gưl 9 kơ bruă mđĭ kyar krĭng Lăn Dăp Kngư wưng thŭn 2011 – 2020. Hluê si klei hưn mdah hlăm klei kƀĭn, wưng thŭn 2001 - 2020, bruă duh mkra čar Dak Lak đĭ kah knar giăm 14%, boh prŏng bruă duh mkra đĭ giăm 11 blư̆, mơ̆ng êbeh 5.600 êklai prăk ti thŭn 2002 đĭ 61.800 êklai prăk ti thŭn 2020.

Ênoh prăk ba wĭt kah knar grăp čô hlăm čar mâo klei hơĭt, thŭn 2020 mâo giăm 54 êklăk prăk hlăm sa čô/ sa thŭn, đĭ 18 blư̆ mkă hŏng thŭn 2002. Hnơ̆ng gŏ sang ƀun ƀin wưng thŭn 2016 -2020 dôk mă 6,3% ti knhal jih thŭn 2021. Klei hdĭp mda mnuih ƀuôn sang dưi mâo klei hơĭt leh anăn đĭ hĭn. Blŭ hlăm klei kbĭn, Khua bruă Đảng čar Dak Lak mtă kơ dŭm gưl bruă Đảng, bruă sang čư êa lŏ dơ̆ng mđĭ hĭn ai tiê bruă klam, klei thâo pô đru bi mguôp boh blŭ, bi kluôm leh anăn hưn mdah hŏng gưl dlông čiăng mâo tur knơ̆ng ba mdah hdră mtrŭn mrâo, mkŏ mjing klei găl, boh kdrŭt kơ klei đĭ kyar krĭng Lăn Dăp Kngư hlăm hruê mmông kơ anăp.

Y-Ƀel pô mblang