VOV4.Êđê - Hdră mkra mđĭ êlan dơ̆ng čar mrô 1 wưng 2 mơ̆ng km 49 truh km 62 mkŏ kdriêk Ea Sup hŏng Ƀuôn Đon, čar Dak lak mâo hnơ̆ng duh bi liê giăm 84 êklai prăk. Anei jing hdră bruă êlan klông dưi mđing duh bi liê kñăm mđĭ kyar bruă duh mkra-ala ƀuôn krĭng knông lăn, khădah dŭm anôk bruă djŏ ruah rŭ mdơ̆ng bruă amâo rơ̆ng ôh dŭm klei găl kơ klei êđăp ênang hlăm êlan klông huĭdah ngă mâo klei truh hlăm êlan klông, hnơ̆ng jăk dŭm mta hdră bruă amâo jăk.

Amai Hoàng Thị Tiến, sang ti djiêu êlan dơ̆ng čar mrô 1, să Čư Mlêñ, kdriêk Ea Soup brei thâo, mơ̆ng hruê dŭm anôk bruă dôk mkra êlan ti anăp sang, alŭ wăl anei luč klei êđăp ênang kyua mâo nanao klei truh hlăm êlan klông. Phung ngă bruă mkra êlan, êlan mđuê̆ êa kăn ƀuh kpơ̆ng knăl čiăng dhiăng klei amâodah dưm pŏk mdah hưn brei răng lei. Kyuanăn, alŭ wăl anei mâo leh lu klei truh hlăm êlan klông. Klei truh mrâo anei hĭn păt čiăng ngă kơ sa čô êkei djiê. Amai Hoàng Thị Tiến yăl dliê. “Kdrêč êlan mơ̆ng sang kâo truh ti wăl krah mâo leh 4 – 5 blư̆ klei truh hlăm êlan klông, knŏng ti anăp sang mâo leh 3 blư̆. Hmăng hmưi bruă sang čư êa mñă kơ phung ngă bruă hmar hĭn, mâo klei răng hĭn, lui êlan, mnuôr êa sơnăn jing arưp truh klei jhat êdi”.

Bi kơ Trương Kim Hoàn, ăt mâo sang ti djiêu êlan dơ̆ng čar mrô 1 găn nao wăl krah Ea Soup brei thâo, amâo djŏ knŏng ngă bruă amâo mâo rơ̆ng klei êđăp ênang hlăm hlăm êlan klông, hnơ̆ng tŭ jăk mơ̆ng dŭm bruă mkŏ mkra anăn ăt kăn mâo lei. Msĕ si dŭm pŏk kđhăp pioh kđăl ƀăng mđuê̆ êa dua nah êlan mrâo dưm, mnuih leh anăn êdeh êdâo găn mă mčah jih yơh. Dlăng hŏng ală ăt ƀuh klei amâo mâo đuôm ôh msei hŏng bê tông. Trương Kim Hoàn brei thâo: “Dŭm pŏk kđhăp kđăl ƀăng mđuê̆ êa ti anăp sang, pô đĭ êdeh găn dlông anăn hlŏng mčah hĕ yơh. Dŭm pŏk kđhăp anăn hơăi mang đei, đĭ kơ dlông hlŏng mčah yơh. Hŏng ală ăt ƀuh klei amâo mâo đuôm ôh msei hŏng ƀê tông. Kâo ƀuh dŭm pŏk kđhăp anei hơăi mang êdi.

Hluê si Nguyễn Xuân Hà – khua bruă sang čư̆ êa să Čư̆ Mlêñ, klei lŏ pŏk phai, mkra bi jăk êlan dơ̆ng čar mrô 1 găn nao să Čư̆ Mlêñ mâo boh taih êbeh 1 km dưi ngă bruă mơ̆ng akŏ thŭn 2021. Kdrêč êlan anei mơ̆ng knơ̆ng bruă Hoàn Ân, mâo anôk ngă bruă ti ƀuôn prŏng Ƀuôn Ama Thuôt mkra mjing. Truh kơ ară anei, ngă jih leh bruă tuh gŭ drŏng, dŭm mta mkăn msĕ si êlan mđuê̆ êa, gơ̆ng knăl, mdhă hưn brei răng ăt dôk mkra mjing.

Nguyễn Xuân Hà bi klă, khua gĭt gai bruă sang čư êa să mâo leh lu klei hưn mdah mơ̆ng mnuih ƀuôn sang kơ klei pô ngă bruă amâo mâo uêñ klei êđăp ênang hlăm êlan klông êjai ngă bruă. Bruă sang čư êa să mklin leh klei hưn mdah mơ̆ng mnuih ƀuôn sang leh anăn mơĭt kơ gưl dlông mtă kơ phung ngă bruă hluê ngă djăp ênŭm dŭm hdră êlan rơ̆ng klei êđăp ênang hlăm êlan klông ăt msĕ hŏng hnơ̆ng tŭ jăk bruă mkŏ mkra. “Hlăm klei ksiêm dlăng ƀuh knơ̆ng bruă Hoài Ân mkra êlan mđuê̆ êa amâodah gơ̆ng knăl, mdhă hưn brei răng amâo mâo rơ̆ng klei êđăp ênang hlăm êlan klông, mâo klei hŭi hyưt mâo klei truh hlăm êlan klông. Bruă sang čư êa mâo leh klei hưn mdah hŏng adŭ bruă duh mkra nah gŭ kdriêk, êpul ksiêm dlăng hdră mkra êlan čar mtă kơ phung ngă bruă rơ̆ng djăp ênŭm hnơ̆ng čoh čuăn mkra mjing êlan klông čiăng mâo klei êđăp ênang kơ mnuih ƀuôn sang êrô êbat”.

Bruă mkra bi jăk êlan dơ̆ng čar mrô 1 wưng tal 2 (mơ̆ng Km 49 truh kơ km 62 mkŏ kdriêk Ea Soup hŏng kdriêk Ƀuôn Đon) mâo kluôm ênoh prăk duh bi liê giăm 84 êklai prăk. Klei ngă bruă mơ̆ng lu knơ̆ng bruă bi mguôp mâo: Knơ̆ng bruă Hoài Ân, knơ̆ng bruă mkra mjing êlan klông Việt Đức, knơ̆ng bruă mkra mjing êlan klông Đức Nguyên leh anăn knơ̆ng bruă mđĭ kyar Đại Việt, pô bi ala phung duh bi liê jing êpul ksiêm dlăng hdră mkăp duh bi liê mkŏ mkra êlan klông leh anăn bruă lŏ hma, mđĭ kyar krĭng ƀuôn sang Dak Lak. Truh kơ ară anei, phung ngă bruă dưi ngă leh 80% dŭm mta hlăm hdră dôk mkra êlan. Anei jing hdră tal êlâo kñăm mđĭ kyar bruă duh mkra – ala ƀuôn ti krĭng knông lăn mơ̆ng čar leh anăn mâo ênoh prăk duh bi liê truh kơ dŭm pluh êklai prăk. Pô duh bi liê čiăng ƀuah mkra ktang phĭt phung ngă bruă amâo mâo klei răng, ăt msĕ hŏng ksiêm dlăng, mtrŭt mjhar phung ngă bruă, rơ̆ng klei êđăp ênang hlăm êlan klông, dêč đuê̆ kơ klei truh hlăm êlan klông ăt msĕ hŏng hnơ̆ng tŭ jăk dŭm mta hlăm hdră ngă bruă.