VOV4.ÊđêTlam mbruê 29/7, Êpul gơ̆ng bruă ƀuôn sang čar Dak Lak mkŏ mjing leh klei kƀĭn thơ̆ng kơ klei čih tal 4 čiăng ksiêm dlăng, bi klă bruă mkra mlih hdră mtrŭn kơ hdră duh bi liê mkra wĭt, mđĭ hnơ̆ng dŭm knơ̆ng kdơ̆ng êa. Hdră mtrŭn mrô 11/2022 mơ̆ng Êpul gơ̆ng bruă ƀuôn sang čar Dak Lak dưi bi klă ti mlan 6/2022, mâo 8 hdră kdrêč, hŏng ênoh prăk duh bi liê 134 êklai prăk mơ̆ng ngăn prăk gưl dlông. Ti knhal krah mlan 7 mrâo êgao, phŭn bruă hdră êlan leh anăn duh bi liê mâo hră mtrŭn lač bruă bi klă 8 hdră mkăp hlăm hdră mtrŭn mrô 11 mơ̆ng čar Dak Lak jing ka djŏ ôh hŏng hră anăn leh anăn ênoh prăk duh bi liê kơ dŭm bruă klam, hdră mkăp hlăm hdră krŭ wĭt leh anăn mđĭ kyar bruă duh mkra ala ƀuôn, čiăng mâo klei mkra mlih djŏ guôp. Kyuanăn hlăm klei kƀĭn anei, Êpul gơ̆ng bruă ƀuôn sang čar Dak Lak mkra mlih ênoh prăk duh bi liê kơ 8 hdră anăn jing 134 êklai prăk, hlăm anăn mâo 123 êklai prăk mơ̆ng ngăn prăk gưl dlông leh anăn êbeh 11 êklai prăk mơ̆ng ngăn prăk alŭ wăl.      

 Pô mblang: Y-Ƀel Êban