Hruê akŏ mlan 9,  ti sang čhĭ mnia Nguyễn Quốc Lập, giăm êlan dơ̆ng čar mrô 1, alŭ 5, să Ea Wer, kdriêk Ƀuôn Đon, čar Dak Lak kahan ksiêm să ksiêm dlăng grăp gưl hdră truih mdjiê klei pui ƀơ̆ng. Lập brei thâo, leh hmư̆ klei hâo hưn, ktrâo lač, êbeh 1 thŭn êlâo hgŭm hlăm “Êpul mnuih ƀuôn sang đru gang mkhư̆ klei pui ƀơ̆ng”. Sang čhĭ mnia mâo mprăp kdrăp rơ̆ng kơ klei êđăp ênang, pioh mdrơ̆ng hŏng klei mtuh mâo: Giêt truih mdjiê klei pui ƀơ̆ng, kmŭt. Hjăn tiêng liêng kăp hưn mkŏ leh plah wah dŭm gŏ sang. Lập brei thâo kơ klei bhiăn ngă bruă êpul mnuih ƀuôn sang đru răng mgang truih djiê pui ƀơ̆ng ti sang mnia gŏ sang pô:

“Hlăm êpul anei mâo 10 gŏ sang, dưi mprăp kdrăp hưn klei pui ƀơ̆ng, leh anăn bi hgŭm. Tơdah mâo klei pui ƀơ̆ng leh anăn gư̆ anôk kăp hưn, jih 10 gŏ êsei srăng hmư̆, leh anăn thâo klă anôk pui ƀơ̆ng snăn grăp čô srăng ngă mtam hdră gang mkhư̆, truih mdjiê klei pui ƀơ̆ng.”

Êpul hgŭm đru gang mkhư̆, truih mdjiê klei pui ƀơ̆ng dưi mkŏ mjing ti să Ea Wer mâo dŭm gŏ êsei mnia blei mnơ̆ng yua aguah tlam, hbâo pruê, êa drao krih kơ ana pla mjing, sang mkra êdeh.. bi jĕ giăm. Ayŏng Trần Văn Nam, sa čô hlăm êpul hgŭm mâo sang mkra êdeh p’phŭt brei thâo, dŭm gŏ êsei hgŭm hlăm ai tiê čŏng ngă. Bruă anei kñăm bi kƀĭn grăp čô mnuih bi hgŭm leh anăn dưi dlăng msĕ si phung mkŏ mơ̆ng êpul gang mkhư̆, truih mdjiê klei pui ƀơ̆ng leh anăn đru dŏng. Hlue si ayŏng Nam, gru hmô đru kơ phung hlăm êpul mâo klei thâo leh anăn kdrăp mnơ̆ng čiăng gang mkhư̆, truih mdjiê klei pui ƀơ̆ng ti wưng mphŭn mâo klei pui ƀơ̆ng mtam.

“Hmei tuôm mprăp klei thâo kơ hdră gang mkhư̆, truih mdjiê klei pui ƀơ̆ng leh anăn đru tinăn mtam. Êngao anăn, lŏ mprăp kdrăp kăp hưn, giêt truih mdjiê klei pui ƀơ̆ng, êa, čuah leh anăn mnơ̆ng ênưih mtuh snăn dưm hjăn, tơdah nao ti tač amâodah amâo pŏk sang mkra êdeh snăn kđăl hĕ êlan pui čiăng rơ̆ng êđăp ênang huĭ pui ƀơ̆ng.”

Mơ̆ng dŭm gru hmô dưi mkŏ mjing ti kdriêk Ƀuôn Đon leh anăn dŭm kdriêk, wăl krah, ƀuôn prŏng, truh ară anei čar Dak Lak mkŏ mjing leh 303 “Êpul bi hgŭm đru gang mkhư̆, truih mdjiê klei pui ƀơ̆ng, 71 “Anôk truih mdjiê pui ƀơ̆ng êpul êya”, leh anăn 17 “Gru hmô hdră jih jang mnuih ƀuôn sang truih mdjiê klei pui ƀơ̆ng ti dŭm anôk bruă leh anăn wăl mnuih ƀuôn sang dôk”.

Trung tá Phùng Việt Đức – K’iăng Khua adŭ bruă kahan ksiêm gang mkhư̆, truih mdjiê klei pui ƀơ̆ng leh anăn đru dŏng , kahan ksiêm čar Dak Lak brei thâo, mơ̆ng dŭm gru hmô, êpul bruă djŏ tuôm khăng mkŏ mjing klei hriăm mjuăt hdră gang mkhư̆, truih mdjiê klei pui ƀơ̆ng srăng mâo hlăm klei hdĭp čiăng kơ phung hlăm êpul hgŭm. Mơ̆ng anăn, phung hlăm êpul srăng dưi ngă nanao, mđĭ klei dưi mghaih msir, tơdah mâo klei pui ƀơ̆ng, mtuh. Trung tá Phùng Việt Đức brei thâo:

“Hlăm wưng kơ anăp čang hmăng mnuih ƀuôn sang lŏ dơ̆ng nao ai, hgŭm mkŏ mjing thiăm lu gru hmô “Êpul bi hgŭm đru gang mkhư̆, truih mdjiê klei pui ƀơ̆ng”. Klei hmei lač jing bruă gang mkhư̆, truih mdjiê klei pui ƀơ̆ng jing mơ̆ng mnuih ƀuôn sang, êpul, kdrăp mnơ̆ng pioh yua brei dôk hlăm ƀuôn sang. Si bĕ ngă tơdah mâo klei pui ƀơ̆ng, grăp čô mnuih ƀuôn sang jing sa čô lĭng kahan gang mkhư̆, truih mdjiê klei pui ƀơ̆ng, čiăng kơ pui amâo lar ôh, pui ƀơ̆ng prŏng bi hrŏ klei luč liê kơ mnuih leh anăn kơ ngăn drăp.”

 Bruă bi lar dŭm gru hmô “Êpul hgŭm đru gang mkhư̆, truih mdjiê klei pui ƀơ̆ng” leh anăn “Anôk truih mdjiê klei pui ƀơ̆ng êpul êya” ti čar Dak Lak jing bruă ngă klă sĭt, đru mđĭ hdră jih jang mnuih ƀuôn sang hgŭm gang mkhư̆ truih mdjiê klei pui ƀơ̆ng hlue si klei gĭt gai mơ̆ng Phŭn bruă kahan ksiêm, boh nik hlăm boh klei pui ƀơ̆ng, mtuh mâo dleh ktuê dlăng, đăo knăl. Mơ̆ng anăn bi hrŏ klei luč liê kơ mnuih leh anăn ngăn drăp kyua pui ƀơ̆ng ngă./.