VOV4.Êđê - Klei bi lông gưl 3 thŭn 2022 mkŏ mjing hlăm 2 hruê, 7 lehanăn 8/7. Čar Dak Lak mâo êbeh 20.400 čô hđeh nao bi lông ti 32 anôk bi lông mơ̆ng 15 kdriêk, wăl krah, ƀuôn prŏng hlăm čar. Phạm Đăng Khoa, Khua knơ̆ng bruă Sang hră m’ar mtô bi hriăm čar Dak Lak brei thâo: Klei bi lông thŭn anei, Phŭn bruă Sang hră m’ar mtô bi hriăm jao kơ alŭ wăl tŭ đua klam mkŏ mjing klei bi lông.

Kyua anăn, knơ̆ng bruă Sang hră m’ar mtô bi hriăm čar Dak Lak čih mkra leh hdră kčah mơ̆ng hnưm. Truh ară anei, hdră mprăp kơ klei bi lông gưl 3 thŭn 2022 dưi pŏk ngă djŏ hdră kčah. Dŭm sang hră mâo hđeh nao bi lông dôk hriăm mbŏ, bi kjăp klei thâo, mkŏ mjing hdră tĭng dlăng, bi mklă hnơ̆ng thâo phung hđeh čiăng lŏ hriăm mbŏ. Kơ mnuih ngă bruă hlăm klei bi lông, knơ̆ng bruă Sang hră m’ar mtô bi hriăm čar Dak Lak hưn mâo êbeh 2.700 čô knuă druh mă bruă ti dŭm anôk bi lông. Čiăng kơ klei bi lông dưi mkŏ mjing êđăp ênang, kpă mngač, djŏ klei bhiăn, Knơ̆ng bruă mđing mjuăt bi hriăm kơ knuă druh ngă bruă ksiêm dlăng klei bi lông./.

H’Nêč pô mblang