VOV4.Êđê- Klei bi lông hriăm jih gưl 3 thŭn 2022 giăm truh, klei ruă Covid-19 ăt dleh ktuê dlăng, dŭm sang hră gưl 3 ti čar Dak Lak dôk mprăp klei mtô bi hriăm rơ̆ng bi leh hdră hriăm jih thŭn. Boh nik bruă mprăp klei thâo kơ hđeh knhal jih gưl hruăm mprăp kơ klei bi lông ruê̆ hriăm leh anăn hrŏng ruah anăp truh.  Kluôm čar Dak Lak mâo 59 sang hră gưl 3, hlăm anăn mâo 48 sang hră brei hđeh adŭ 12 nao hriăm ti sang hră. Dŭm sang hră adôk ăt hriăm online, lu jing phung hđeh sang hră ti ƀuôn prŏng Ƀuôn Ama Thuôt leh anăn kdriêk Krông Ƀuk. Phạm Đăng Khoa, Khua Knơ̆ng bruă sang hră mtô bi hriăm Dak Lak brei thâo, mơ̆ng boh klei ruă tưp ti alŭ wăl, dŭm boh sang hră mkŏ mjing klei mtô bi hriăm mbruă, rơ̆ng hnơ̆ng mmông, boh phŭn, mbĭt anăn rơ̆ng klei suaih pral kơ phung knuă druh, nai mtô, mnuih mă bruă, hđeh sang hră.

Pô mblang: H’Zawut Ƀuôn Yă