VOV4.Êđê - Klei bi lông hriăm jih gưl tlâo thŭn 2022 ƀrư̆ hruê ƀrư̆ truh giăm, klei ruă Covid 19 ăt bluh mâo dleh dưi ksiêm dlăng, dŭm sang hră gưl tlâo ti alŭ wăl čar Dak Lak dôk mâo hdră mtô bi hriăm jăk čiăng bi leh hdră hriăm hlăm thŭn. Boh nik jing mprăp klei thâo săng kơ phung hđeh adŭ 9 lehanăn 12 mprăp jăk kơ klei bi lông hrŏng ruah mŭt hriăm gưl mrâo lehanăn bi lông hriăm ruê̆ gưl tlâo.

Sa thŭn hriăm mdê hĭn hŏng lu gưl bi mlih boh klei hriăm tăp năng nao ti sang hră, tăp năng hriăm online hmaĭ leh kơ hdră hriăm ăt msĕ mơh klei mĭn phung hđeh, boh nik hŏng hđeh adŭ 12. Čiăng kơ phung hđeh hơĭt ai tiê, sang hră gưl 3 Nguyễn Bỉnh Khiêm, kdriêk Krông Pač, čar Dak Lak pŏk ngă leh lu hdră mtô bi hriăm mbruă, djŏ guôp hŏng boh klei ruă tưp. Hlăm anăn, sang hră mđĭ ai tiê đua klam mơ̆ng grăp čô nai mtô sĭt mtô hlăm adŭ, Nai Nguyễn Thị Thuý, nai mtô klei hriăm Hoá Học, sang hră gưl 3 Nguyễn Bỉnh Khiêm brei thâo: “Gĭr ksiêm hriăm klei hâo hưn hlăm Internet, klei bi hriăm mbĭt plah wah phung nai hlăm dŭm sang hră čiăng bi leh mmông hriăm leh anăn rơ̆ng klei thâo klă klơ̆ng hĭn kơ phung hđeh. Leh anăn hŏng djăp klei hriăm tui hlue si klei mĭn phung nai čiăng mđĭ ai phung hđeh khăp hriăm hĭn hŏng klei brei puăng, amâodah hlăm mmông hriăm mâo klei hlăp lêñ čiăng hđeh khăp hriăm hĭn, rơ̆ng kơ klei bi lông anăp truh jăk hĭn.”

Hŏng hđeh sang hră adŭ 12 sang hră gưl 3 Lê Hưũ Trác, kdriêk Čư̆ Mgar, wăt tơdah wưng hđeh mdei čiăng gang mkhư̆ Covid-19 sui, ƀiădah bruă klam, mlih mrâo phung nai đru leh phung hđeh hơĭt ai tiê hĭn. Adei Hoàng Thị Minh Châu, hđeh adŭ 12A1 brei thâo: “Phung nai leh anăn sang hră mjing klei găl jăk hĭn kơ phung hđeh hriăm msĕ si sang hră mđing êmuh kơ bruă hriăm leh anăn gang mkhư̆ klei ruă tưp. Phung nai bi hriăm dŭm mta leh anăn nai kriê dlăng adŭ pioh lu mmông čiăng wĭt lač klei phung hmei êmuh anăn amâo dleh đei ôh.”

Kluôm čar Dak Lak mâo 59 boh sang hră gưl 3, hlăm anăn mâo 48 boh sang hră brei hđeh adŭ 12 nao hriăm ti sang hră. Dŭm sang hră adôk ăt hriăm online, lu jing phung hđeh sang hră ti ƀuôn prŏng Ƀuôn Ama Thuôt leh anăn kdriêk Krông Ƀuk. Phạm Đăng Khoa, Khua Knơ̆ng bruă sang hră mtô bi hriăm Dak Lak brei thâo, mơ̆ng boh klei ruă tưp ti alŭ wăl, dŭm boh sang hră mkŏ mjing klei mtô bi hriăm mbruă, rơ̆ng hnơ̆ng mmông, boh phŭn, mbĭt anăn rơ̆ng klei suaih pral kơ phung knuă druh, nai mtô, mnuih mă bruă, hđeh sang hră. Hjăn hŏng phung hđeh adŭ 12, dŭm boh sang hră brei ksiêm dlăng hnơ̆ng jăk tui hriăm mơ̆ng hđeh čiăng mbha êpul đru bi hriăm mbŏ kơ hđeh leh anăn kƀĭn hriăm boh phŭn dŭm mta klei hriăm bi ruê̆ gưl 3. Phạm Đăng Khoa lač: “Hmei ktrâo lač kơ dŭm sang hră gưl 3 mkŏ mjing dŭm akŏ klei bi lông mơ̆ng Knơ̆ng bruă sang hră mtô bi hriăm čiăng mkŏ mjing klei lông bi lông leh anăn ksiêm dlăng hnơ̆ng jăk mơ̆ng sang hră. Mbĭt anăn mơ̆ng klei tŭ anăn mâo hdră kčah mkŏ mjing mtô bi hriăm kơ phung hđeh, rơ̆ng kơ phung hđeh mâo klei thâo hlăm klei bi lông hriăm jih gưl 3 kơ anăp./.