Thŭn anei, Dak Lak mâo êbeh 21.200 čô hđeh bi lông, hlăm anăn mâo êbeh 610 čô bi lông êngiê. Čar Dak Lak lŏ dơ̆ng dăp 32 anôk bi lông klă sĭt hŏng 886 adŭ bi lông ti 15 kdriêk, wăl krah leh anăn ƀuôn prŏng. Truh wưng anei, Knơ̆ng bruă sang čư̆ êa čar Dak Lak mkŏ mjing leh Anôk bruă gĭt gai bi lông gưl čar leh anăn gĭt gai dŭm alŭ wăl mkŏ mjing Anôk gĭt gai gưl kdriêk, wăl krah, ƀuôn prŏng, bi leh dŭm hră mơar, ksiêm dlăng, mkra mlih klei hâo hưn mơ̆ng phung bi lông djŏ tui si wưng kčah, mprăp dŭm klei găl kdrăp mnơ̆ng, mnuih mă bruă nao hlăm klei bi lông… H’Yim Kđoh -  K’iăng Khua Knơ̆ng bruă sang čư̆ êa čar Dak Lak, Khua Anôk bruă gĭt gai bi lông gưl čar mtă dŭm gưl, dŭm dhar bruă, alŭ wăl  brei mđĭ bi hgŭm, pral mkŏ mjing hdră bi lông klă klơ̆ng, klă sĭt, rơ̆ng klei bi lông mkŏ mjing êđăp ênang, tŭ dưn, djŏ klei bhiăn. Mđing hĭn kơ bruă hâo hưn mtô mblang kơ klei bi lông.

“Mkăp djăp klei hâo hưn klă mngač klei kčah čiăng êdi djŏ tuôm kơ klei bi  lông. Boh nik, jih ai tiê mđing kơ dŭm sang hră krĭng taih kbưi, krĭng dleh dlan dưi hmư̆ klei hâo hưn mâo hdră kčah đru kơ phung hđeh mâo djăp klei hâo hưn, hmao mprăp jăk  ai tiê kơ klei bi lông”

Thŭn hriăm 2022-2023 ti Dak Lak klă klơ̆ng mjưh ruê̆. Anei ăt jing wưng phung hđeh adŭ 9 ruah klei lŏ hriăm. Bi lông mŭt adŭ 10 dŭm sang hră mă hră amâo mŭt hriăm amâodah ruah bruă hriăm jing klei dưi mđing dlăng. Bruă sang hră leh anăn mtô bi hriăm Dak Lak ăt dôk gĭr ktưn kơ bruă hrŏng ruah mŭt adŭ 10 leh anăn mbha hđeh leh hriăm jih gưl 2.

 Sang hră gưl 3 Chuyên Nguyễn Du, ƀuôn prŏng Ƀuôn Ama Thuôt jing sa hlăm dŭm sang hră mâo lu hđeh sang hră ruah čih anăn bi lông. Hlue si hdră kčah, thŭn hriăm 2023-2024, sang hră srăng ruah 405 čô hđeh sang hră adŭ 10, mâo 9 adŭ thơ̆ng leh anăn 2 boh adŭ amâo thơ̆ng. Wưng mă hră mơar mơ̆ng 25 truh 31/5. Nguyễn Đăng Bồng –  Khua sang hră gưl 2 Chuyên Nguyễn Du, čar Dak Lak brei thâo:

“ Hđeh sang hră bi lông dua tal, tal 1 ksiêm dlăng hră mơar, phung hđeh ngă djŏ 2 klei găl: Tal sa jing klei thâo hriăm leh anăn knhuah hdĭp 4 thŭn hriăm jing jăk kơ dlông leh anăn hriăm jih gưl 2 mơ̆ng mta jăk kơ dlông. Tơdah phung hđeh dưi mâo dua klei anei snăn srăng mŭt hlăm tuôr tal 2 bi lông 4 mta: Toán, Ngữ văn, klei blŭ ala tač êngao leh anăn 1 mta thơ̆ng”.

Ăt hlue si hdră hrŏng ruah mŭt hriăm adŭ 10 thŭn hriăm 2023 – 2024 mơ̆ng čar Dak Lak, mbĭt hŏng sang hră gưl 2 chuyên Nguyễn Du snăn dŭm sang hră gưl 3 mnuih djuê ƀiă Knŭk kna rông ba N’Trang Lơng leh anăn sang hră gưl 3 mnuih djuê ƀiă knŭk kna rông ba Đam san ăt srăng mâo hdră bi lông, Dŭm sang hră gưl 3 knŭk kna mkăn ba yua hdră hrŏng ruah. Bi hŏng dŭm sang hră gưl 3 mâo lu gưl hriăm êngao knŭk kna, hrŏng ruah hjăn mơ̆ng Hdră kčah hrŏng ruah mơ̆ng Knơ̆ng bruă sang čư̆ êa čar.

        Hŏng phung hđeh leh ruê̆ hriăm gưl 2 amâo djăp klei găl čiăng hrŏng ruah hlăm dŭm sang hră gưl 3 snăn ăt mâo lu klei ruah tơdah dŭm anôk mtô bruă ti čar bi leh djăp klei čiăng hriăm bruă êjai mguôp hŏng hriăm hră.  Đỗ Tường Hiệp,  K’iăng Khua Knơ̆ng bruă sang hră mtô bi hriăm Dak Lak brei thâo: Ênoh mbha hđeh sang hră leh ruê̆ gưl 2 ti Dak Lak jing lu, mâo 80% hlăm ênoh hđeh sang hră adŭ 9.

“Hŏng phung hđeh sang hră amâo rơ̆ng klei găl čiăng hriăm hlăm dŭm sang hră gưl 3, dŭm anôk mtô mbruă snăn tă hdră kơ hđeh srăng hriăm mbruă, gưl krah leh anăn mâo hdră mdê mdê. Kyua anăn, hdră mđing kơ bruă hlăm sang hră dưi mđĭ ktang čiăng ktrâo kơ phung hđeh mŭt hlăm klei hdĭp leh anăn hriăm hră, amâo djŏ knŏng hjăn sang hră gưl 3 ôh ƀiădah hŏng hdră mkăn leh anăn mâo klei hdĭp mgi dih”.

 Hlăm dŭm thŭn êgao, dŭm sang hră leh anăn anôk mtô bi hriăm bruă ti Dak Lak bi hgŭm kjăp hlăm bruă mtô bi hriăm bruă kơ hđeh sang hră. Grăp thŭn mâob hlăm brô 3000 čô hriăm hdră mtô jêñ jêñ, mơ̆ng 30 êbâo truh 35 êbâo čô dưi hr8iăm hriăm djŏ hŏng klei thâo leh anăn klei čiăng yua mnuih mă bruă. Gru hmô mtô hrtiăm hră mbĭt hŏng bruă ti dŭm anôk mtô bi hriăm jêñ jêñ dưi pŏk ngă, đru hlăm bruă mbha hđeh sang hră leh ruê̆ gưl 2 hlue si Hdră “Mtô bi hriăm bruă leh anăn tă hdră mbha hđeh sang hră hlăm klei mtô gưl tlâo wưng thŭn 2018-2025.”