VOV4.Êđê- Ka bŏ sa mlan dơ̆ng, hđeh sang hră dŭm gưl ti Dak Lak srăng mŭt hlăm thŭn hriăm 2022-2023. Čiăng rơ̆ng kơ hdră mtô leh anăn hriăm, bruă mprăp kdrăp mnơ̆ng hlăk mâo dŭm alŭ wăl mđĭ ktang, mâo dŭm hdră gang mkhư̆, rơ̆ng kơ hđeh hriăm mâo djăp klei găl.

Dŭm hruê akŏ mlan 8 anei, ti Sang hră gưl 1 Čư̆ Pui II, anôk hriăm Ea Rơ̆t, să taih kbưi Čư̆ Pui, kdriêk Krông Bông, sang 2 tal hŏng 6 adŭ hriăm leh anăn dŭm adŭ mkăn dôk mjêč bi leh bruă kpơ̆ng tôl. Dŭm adŭ hriăm hđăp leh anăn adŭ phung nai lŏ dưi wĭt măl êa mil mrâo. Hlăm dŭm adŭ hriăm, jhưng mdhô̆, jhưng jŭ leh anăn kdrăp mtô mjuăt bi hriăm dưi mprăp djăp leh.

Nai Nguyễn Hồng Thuần – Khua kiă kriê sang hră brei thâo, 3 anôk hriăm mơ̆ng sang hră gưl 1 Čư̆ Pui II srăng drông hlăm brô 1.400 čô hđeh sang hră. Ară anei 2 anôk hriăm giăm anôk bruă sang čư êa să dưi mprăp ênŭm leh mnơ̆ng yua, knŏng ti anôk hriăm Ea Rơ̆t dôk ngă bruă mkŏ mkra, truh ti knhal jih mlan 12 kơh dưi leh. Čiăng rơ̆ng kơ bruă mtô mjuăt bi hriăm êjai dôk ngă bruă mkŏ mkra, sang hră mâo leh hdră mkăp:

        “Ară anei dôk rŭ mdơ̆ng 6 adŭ hrăm sang lu tal ƀiădah ka leh ôh, srăng truh ti akŏ wưng hriăm tal 2 kơh dưi leh. Ti anăp, sang hră mâo sa adŭ hriăm hŏng kyâo leh anăn srăng yua adŭ anei jing adŭ hriăm êjai. Sang hră ăt mprăp leh jhưng mdhô̆ kơ adŭ hriăm êjai anei. Êngao kơnăn, sang hră ăt ngă leh hră mơar mơĭt kơ bruă sang čư êa kdriêk akâo ngăn prăk blei thiăm 30 kdrăp jhưng mdhô̆ leh anăn dưi mâo klei bi klă, sĭt blei srăng ba jih hlăm anăn.

Akŏ mlan 8/2022, lu hđeh sang hră ti Sang hră gưl 1 Čư̆ Pui II, ti Ea Rơt, să Čư̆ Pui, kdriêk Krông Bông nao ti sang hră kih mdoh tač sang hră, mprăp kơ thŭn hriăm mrâo

        Thŭn hriăm 2022- 2023, kdriêk Krông Bông mâo 51 bĭt sang hră mơ̆ng sang hră hđeh điêt truh kơ sang hră gưl 2, hŏng 21 êbâo čô hđeh sang hră. Huỳnh Viết Trung, khua adŭ bruă mtô mjuăt, bi hriăm kdriêk brei thâo, čiăng mprăp kơ thŭn hriăm mrâo, bruă sang čư êa kdriêk Krông Bông mkăp brei giăm 24 êkai 500 êklăk prăk duh bi liê rŭ mdơ̆ng 66 adŭ hriăm, mkăp lu ngăn prăk mkăn čiăng mkra bi jăk, mđĭ hnơ̆ng dŭm êtuh adŭ hriăm sô, blei kdrăp yua, jhưng mdhô̆, masin đru kơ klei mtô hriăm. Truh kơ ară anei, jih jang dŭm sang hră dưi hluê ngă djŏ hŏng hdră kčah mâo leh.

       “Bi kơ bruă mprăp mnơ̆ng yua kơ thŭn hriăm 2022 – 2023, adŭ bruă mtô mjuăt bi hriăm kdriêk mprăp leh kơ klei tĭng mkă mơ̆ng thŭn êlâo, mkŏ mjing hdră mơ̆ng kbưi, leh anăn hưn mdah hŏng bruă sang čư êa kdriêk bi klă, boh nik jing dŭm să krĭng taih kbưi. Ară anei hlăm dŭm sang hră dưi bi leh kluôm ênŭm, mâo đa đa dôk bi leh, si srăng ngă čiăng kơ truh mlan 9 anei dưi bi leh, mprăp kơ thŭn hriăm mrâo”.

        Bi ti kdriêk Lăk, thŭn hriăm 2022 -2023 anei, ăt drông giăm 13 êbâo čô hđeh sang hră mơ̆ng hđeh điêt truh kơ sang hră gưl 2. Nguyễn Văn Ngọc, khua adŭ bruă mtô mjuăt bi hriăm kdriêk brei thâo, bruă mđĭ hnơ̆ng mnơ̆ng yua, duh bi liê kdrăp yua mtô bi hriăm mâo adŭ bruă mtô mjuăt bi hriăm hluê ngă truh kơ grăp sang hră mơ̆ng akŏ thŭn anei. Êjai mŭt hlăm yan mdei prŏng, adŭ bruă mtă kơ dŭm sang hră čŏng pô, hluê si ai dưi, ngăn prăk dưi mkăp čiăng hluê ngă dŭm hdră mkra bi jăk, hur har mtrŭt mjhar, ksiêm dlăng dŭm hdră čiăng rơ̆ng djŏ hŏng hdră kčah, mâo hdră mkăp čiăng rơ̆ng tơdah mâo bruă mkŏ mkra amâo dưi leh djŏ hŏng hdră kčah, bruă mtô bi hriăm ăt dưi ngă jăk.

“Adŭ bruă mtô mjuăt bi hriăm ngă pô duh bi liê mkra wĭt 3 sang hră, leh anăn 1 hlăm anăn dưi ngă leh. Dôk 2 sang hră dôk bi leh leh anăn truh ti hruê 15/8 anei ăt srăng bi leh bruă mkra wĭt. Ară anei knŏng dôk mă dŭm bruă mkŏ mkra prŏng srăng bi leh êdei kơ mlan 9, leh anăn bruă anei adŭ bruă čŏng bi mguôp hŏng dŭm sang hră mkŏ mjing hdră ti anăp jing brei hđeh hriăm sa anôk ti adŭ hriăm hđăp amâodah mbha hriăm aguah tlam. Ti anăp srăng rơ̆ng jăk bruă mtô bi hriăm”.

        Hluê si knơ̆ng bruă mtô mjuăt bi hriăm čar Dak Lak, thŭn hriăm 2022 – 2023, kluôm čar mâo 478 êbâo 180 čô hđeh sang hră dôk hriăm ti 1.017 sang hră, mơ̆ng sang hră hđeh điêt truh kơ sang hră gưl 3. Čiăng mprăp jăk kơ thŭn hriăm mrâo, bruă sang čư êa čar bi liê leh giăm 477 êklai prăk duh bi liê mkŏ mkra leh anăn blei kdrăp yua đru kơ bruă mtô mjuăt, bi hriăm. Hlăm anăn, giăm 389 êklai prăk yua rŭ mdơ̆ng adŭ hriăm mrâo, mkra bi jăk 170 adŭ hriăm hđăp, mdơ̆ng mnư̆, tač hlăp lêñ, băng jang kơ lu sang hră, hlăm brô 88 êklai prăk yua blei jhưng mdhô̆, jhưng jŭ leh anăn lu kdrăp yua mtô mjuăt, bi hriăm mkăn.

                                          Pô mblang: Y-Ƀel Êban