Năng mđing, čar mtă kơ dŭm alŭ wăl bi leh klei mkra mđĭ sang jhat rai êlâo hruê 30/11; dăp anôk dôk êjai êđăp ênang leh anăn mkra mrâo, lŏ mkra anôk dôk mrâo dŭm gŏ êsei mâo sang dlưh rai, êa đung êlâo hruê 31/01/2026. Hlue si hră mơar, adiê hjan hrŏ leh, êa lip hrŏ leh mơh; dŭm alŭ wăl brei păn kjăp anôk bruă nah gŭ, boh nik krĭng wăl êngăp êlam, bi ktlah hjăn, čiăng păn kjăp boh klei leh anăn pŏk ngă bruă klam msir mgaih hŏng ai tiê mjêč, tŭ dưn.

Mđing mrô sa jing đru kơ jih jang gŏ êsei bi ktlah hjăn, đru ba mjêč mnơ̆ng ƀơ̆ng huă, êa mnăm, mnơ̆ng čiăng êdi; amâo brei mnuih ƀuôn sang ư̆ êpa ôh. Čar Dak Lak ba nao êpul kahan, kahan ksiêm, phung êdam êra leh anăn mnuih ƀuôn sang kih mdoh pưk sang, sang hră, anôk mdrao mgŭn, êlan klông; hnưm kơrŭ wĭt pui kmlă, êa, dang kông. Dŭm alŭ wăl brei ktuê dlăng, ksiêm yap klei luč liê; tŭ mă leh anăn mbha mnơ̆ng đru dŏng klă mngač, mtăp mđơr, djŏ mnuih.