Phan Xuân Bách, k’iăng khua êpul kiă kriê hdră duh bi liê êlan klông leh anăn bruă lŏ hma čar Dak Lak brei thâo, leh lu blư̆ hưn mdah, ti knhal jih mlan 10 thŭn 2023, Phŭn bruă êlan klông leh anăn dŭ mdiăng mâo leh klei bi klă mkra mlih hdră êlan duh bi liê mkra êlan dơ̆ng Hồ Chí Minh êlan dar ngŏ Ƀuôn Ama Thuôt.

Hluê anăn kluôm ênoh prăk duh bi liê kơ hdră mkra mlih mơ̆ng 1.500 êklai prăk jing 1.841 êklai prăk. Ênoh prăk 341 êklai prăk đĭ thiăm yua čiăng bi mbŏ hlăm ênoh prăk ruh mgaih anôk ala lŏ bluh mâo hlăm klei ngă bruă. Leh dưi mkăp djăp ngăn prăk, pô duh bi liê gĭt gai dŭm anôk bruă djŏ tuôm ngă bruă hmar, ruh mgaih anôk ala êjai, ngă bruă êjai čiăng djŏ hŏng hdră kčah bi leh ti thŭn 2024.