Hluê si klei hưn hlăm klei kƀĭn, mơ̆ng thŭn 2021 truh kơ ară anei, Dak Lak dưi hmao ƀuh, mă giăm 1000 klei ngă soh, êbeh 1.400 čô ngă soh leh anăn soh hŏng klei bhiăn lăn čar kơ matui, hrui mă êbeh 3kg heroin leh anăn giăm 6kg ma tui leh mkra mjing. Kluôm čar mâo 445 čô yua matui soh hŏng hdră bhiăn, 866 čô ră rañ matui mâo hră mơar kriê dlăng. Găn 3 thŭn, hluê ngă dŭm hdră êlan, tŭ dưn hlăm bruă hâo hưn gang mkhư̆ matui dưi mđĭ hĭn. Lu mta phŭn, hdră ngă bruă, hdră êlan hâo hưn dưi bi lu jơr.

Hlăm klei kƀĭn trông, phung bi ala lač phung ngă soh matui ƀrư̆ hruê ƀrư̆ mnêč, bruă hâo hưn, mtrŭt mjhar čiăng kơ mnuih ƀuôn sang mđĭ hĭn klei răng, bi kdơ̆ng hŏng phung ngă soh kơ matui čiăng dưi mđĭ hĭn leh anăn mâo klei mlih djŏ guôp. Hlăm anăn, čiăng mâo klei sa ai mơ̆ng phung khua mduôn, khua ƀuôn, phung mâo kơhưm leh anăn phung khua djă bruă klei đăo čiăng hâo hưn truh hŏng mnuih ƀuôn sang kơ dŭm mnêč mplư mơ̆ng phung ngă soh.