Hruê knhal jih mlan 10, giăm 20 čô lĭng kahan gang mkhư̆ truih mdjiê pui ƀơ̆ng leh anăn tui duah đru dŏng, kahan ksiêm čar Dak Lak mbĭt hŏng phung bi ala dŭm gŏ sang mâo ƀô̆ mta ti wăl tač Sang B Hoàng Anh, êlan Nguyễn Công Trứ, ƀuôn prŏng Ƀuôn Ama Thuôt čiăng hriăm ngă bruă bi mdrơ̆ng hŏng klei pui ƀơ̆ng ti sang lu tla. Phung nao hgŭm klă anăp mâo klei mtô kơ hdră yua giêt truih mdjiê pui, đĭng kčhiêt êa, yua êñan trŭn đru kơ phung kpăk đuôm hlăm anôk pui ƀơ̆ng, dŏng mdrao phung mâo klei truh… Bùi Huy Phước, Pô bi ala êpul kriê dlăng sang dôk Hoàng Anh brei thâo, grăp thŭn, knơ̆ng bruă mkŏ mjing klei hlăk mblang, hriăm kơ hdră êlan gang mkhư̆ truih mdjiê pui ƀơ̆ng leh anăn tui duah đru dŏng truh kơ grăp gŏ sang hdĭp sang sang lu tal anei. Êngao kơnăn lŏ hâo hưn, mtrŭt mjhar grăp čô hluê ngă djŏ dŭm klei čuăn leh anăn mdưm ênŭm kdrăp gang mkhư̆ klei pui ƀơ̆ng.

 “Êpul kriê dlăng sang dôk bi mguôp hŏng Anôk bruă gang mkhư̆, truih mdjiê pui ƀơ̆ng tal sa jing hâo hưn leh anăn tal 2 mñă kơ dŭm gŏ sang ƀăng bhă gang amâo mâo êlan đuê̆ srăng hmar mgaih msir ngă ƀăng đuê̆ mjêč. Gưl mrâo anei lu gŏ sang ngă leh, knŏng dôk mă ƀiă gŏ sang ka mâo ƀô̆ mta hlăm wưng anei hmei srăng lŏ dơ̆ng mtrŭt mjhar, mñă kơ diñu leh wĭt srăng ngă mtam, čiăng kơ êla tam klei klei truh pô mâo êlan đuê̆ dưi êđăp ênang kơ pô leh anăn gŏ sang.”

Ayŏng Nguyễn Tuấn Anh, Sa čô mnuih ƀuôn sang hdĭp ti Sang B Hoàng Anh – Ƀuôn Ama Thuôt mâo hŏng anei giăm 10 thŭn brei thâo, bruă mnuih ƀuôn sang dưi mkăp klei hriăm, klei mtô kơ bruă gang mkhư̆, truih mdjiê pui ƀơ̆ng ti sang lu tal jing klei năng mjêč êdi. Tơdah tăm mâo klei pui ƀơ̆ng găp čô mâo klei hơĭt dưn yua dŭm klei hriăm čiăng răng mgang kơ asei pô, bi mguôp hŏng êpul êya ngă bruă bi mdrơ̆ng hŏng klei pui ƀơ̆ng leh anăn đru kơ grăp čô hriăm mbĭt tlaih mơ̆ng klei arưp aram. Ayŏng Nguyễn Tuấn Anh brei thâo:

 “Gŏ sang kâo ăt hur har nao hgŭm hlăm adŭ hriăm gang mkhư̆, truih mdjiê pui ƀơ̆ng, leh anăn ăt čŏng blei kdrăp yua gang mkhư̆ klei pui ƀơ̆ng hlăm sang tơdah tam mâo klei truh thâo mgaih msir leh anăn čŏng pô bi mtaih pô. Kâo ƀuh bruă bi hriăm gang mkhư̆ klei pui ƀơ̆ng anei jing năng mjêč êdi, ăt hmăng hmưi mnuih ƀuôn sang dŭm sang lu tal mkăn mâo ênŭm ƀô̆ mta čiăng kơ Êpul gang mkhư̆ truih mdjiê pui ƀơ̆ng leh anăn tui duah đru dŏng mtô brei klei thâi êjai mâo klei truh tăm mâo srăng bi mguôp leh anăn dưl tlaih.”

Hluê si klei hưn mơ̆ng êpul kahan gang mkhư̆ truih mdjiê pui ƀơ̆ng leh anăn tui duah đru dŏng, kahan ksiêm čar Dak Lak, mơ̆ng krah mlan 12/2022 truh kơ ară anei, ti čar Dak Lak mâo 17 klei pui ƀơ̆ng, ngă kơ sa čô djiê, bi êka dŭm pluh čô, hmăi kơ ngăn dŏ mâo ênoh êbeh 5,55 êklai prăk. Ênoh klei pui ƀơ̆ng mbĭt hŏng wưng anei thŭn dih hrŏ 3 klei, ƀiădah hnơ̆ng klei kjham lŏ đĭ ktang, ênoh mnuih êka lu hĭn. Êpul êya djŏ tuôm mkŏ mjing leh klei hlăk mblang klei bhiăn lăn čar, mtô kơ bruă kahan gang mkhư̆ truih mdjiê pui ƀơ̆ng leh anăn tui duah đru dŏng kơ dŭm êbâo čô, pŏk 101 adŭ hriăm kahan gang mkhư̆ truih mdjiê pui ƀơ̆ng leh anăn tui duah đru dŏng kơ hlăm brô 9.300 čô nao hgŭm gang mkhư̆ truih mdjiê pui ƀơ̆ng leh anăn tui duah đru dŏng ti nah gŭ…

Trung tá Phùng Việt Đức – k’iăng khua adŭ bruă kahan gang mkhư̆ truih mdjiê pui ƀơ̆ng leh anăn tui duah đru dŏng, kahan ksiêm čar Dak Lak bi klă, bruă dŭm êbâo čô mâo klei hâo hưn, ktuê dlăng, hriăm kơ bruă gang mkhư̆ truih mdjiê pui ƀơ̆ng leh anăn tui duah đru dŏng srăng mđĭ klei thâo djŏ tuôm kơ bruă gang mkhư̆ truih mdjiê pui ƀơ̆ng leh anăn tui duah đru dŏng ăt msĕ hŏng klei dŏng mdrao mơ̆ng êlâo, mơ̆ng anăn bi hrŏ jih hnơ̆ng klei hmăi kơ mnuih leh anăn ngăn dŏ hlăm dŭm klei pui ƀơ̆ng. Trung tá Phùng Việt Đức brei thâo:

 “Hŏng dŭm mta bruă mtô kơ bruă gang mkhư̆, truih mdjiê klei pui ƀơ̆ng, mnuih ƀuôn sang leh anăn phung hđeh sang hră, sinh viên, mnuih mă bruă mđĭ klei thâo bruă klam pô hlăm bruă gang mkhư̆, truih mdjiê klei pui ƀơ̆ng leh anăn thâo klă dŭm hdră êlan kơ bruă gang mkhư̆, truih mdjiê klei pui ƀơ̆ng hŏng gŏ sang, sang êpul, dŭm sang lu tal amâodah sang dôk hđeh sang hră. Hluê anăn dưi thâo dŭm hdră êlan truih mdjiê puị leh anăn boh nik jing klei thâo mgaih msir boh klei êjai mâo klei truh pui ƀơ̆ng.”

Klei pui ƀơ̆ng, klei mtuh jing dŭm klei truh amâo mâo pô čiăng, ƀiădah mâo kreh tăm mâo hlăm djăp mnĭt mmông. Bruă mâo klei thâo, ai tiê kjăp hlăm bruă gang mkhư̆, truih mdjiê pui mơ̆ng phŭn bluh mrâo ăt msĕ hŏng dŭm hdră êlan taih đuê̆ mơ̆ng klei pui ƀơ̆ng jing klei năng mjêč êdĭ hŏng jih jang mnuih. Mơ̆ng anăn, dưi bi hrŏ jih hnơ̆ng klei hmăi kơ mnuih leh anăn ngăn dŏ tơdah mâo klei pui ƀơ̆ng./.